ក្រុង Brisbane របស់អូស្រ្តាលីជួបគ្រោះទឹកជំនន់ដ៏ធំមិនធ្លាប់មានតាំងពីជាង១សតវត្សរ៍
នៅអូស្រ្តាលី ទឹកកំពុងតែជោរជន់លិចទីក្រុងប៊្រីសបិន (Brisbane) ដែលជាក្រុងដ៏ធំទី៣ របស់អូស្រ្តាលី ស្ថិតនៅក្នុងរដ្ឋ Queensland។ ផ្ទះចំនួន ៣ម៉ឺនខ្នងត្រូវទឹកជន់លិច។ មនុស្សចំនួន ១២នាក់ បានបាត់បង់ជីវិត និង ៦៧នាក់ផ្សេងទៀត កំពុងបាត់ខ្លួន។ អាជ្ញាធរបានព្យាករថា កម្រិតកំពស់ទឹកនឹងបន្តកើនឡើងកាន់តែខ្ពស់ថែមទៀត នៅយប់ថ្ងៃពុធនេះ។
ចុះផ្សាយនៅថ្ងៃ៖
សេចក្តីរាយការណ៍របស់ សេង ឌីណា
នៅថ្ងៃពុធនេះ ទីប្រជុំជនក្រុងប៊្រីសបិន ដែលជាក្រុងសេដ្ឋកិច្ចដ៏សំខាន់របស់អូស្រ្តាលី បានក្លាយទៅជាស្ងាត់ជ្រងំ ប្រៀបបាននឹង “ទីក្រុងខ្មោច”។ អ្នកក្រុងប៊្រីសបិនរាប់ម៉ឺននាក់បាននាំគ្នាភៀសខ្លួនចេញពីផ្ទះ ទៅរកកន្លែងទួល ដើម្បីគេចពីទឹកជំនន់។ ផ្ទះរាប់ម៉ឺនខ្នង និងផ្លូវជាង២ពាន់ខ្សែ ត្រូវទឹកជន់លិច។ ចរន្តអគ្គិសនីត្រូវបានកាត់ផ្តាច់។ សេវាកម្មដឹកជញ្ជូនតាមរថយន្តក្រុង និងការប្រមូលសំរាមត្រូវបានផ្អាកទាំងស្រុង។
អភិបាលរដ្ឋQueensland បានថ្លែងថា ប៊្រីសបិនកំពុងប្រឈមមុខនឹងទឹកជំនន់ដ៏ធំមិនធ្លាប់មានអស់រយៈពេលជាងមួយសតវត្សរ៍កន្លងមកហើយ ពោលគឺ ចាប់តាំងពីឆ្នាំ១៨៩៣មក។
នៅថ្ងៃពុធនេះ នៅប៊្រីសបិន ភ្លៀងបានរាំង ហើយមេឃចាប់ផ្តើមស្រឡះ។ ក៏ប៉ុន្តែ អាជ្ញាធរបានព្យាករថា ទឹកទន្លេនឹងបន្តឡើង ហើយនឹងឡើងដល់កម្រិតខ្ពស់បំផុត នៅយប់ថ្ងៃពុធ និងព្រឹកថ្ងៃព្រហស្បតិ៍នេះ។
លោកស្រីជូលៀ ហ្គីឡាដ (Julia Gillard) នាយករដ្ឋមន្រ្តីអូស្រ្តាលី បានទៅដល់ប៊្រីសបិន ដើម្បីពិនិត្យមើលស្ថានភាពទឹកជំនន់។ លោកស្រីបានអំពាវនាវឲ្យប្រជាជនមានការប្រុងប្រយ័ត្ន ចៀសវាងការធ្វើដំណើរចេញពីផ្ទះ ប្រសិនបើមិនមានការចាំបាច់ និងឲ្យសន្សំសំចៃទឹកស្អាត ទុកក្នុងករណីការផ្គត់ផ្គង់ទឹកស្អាត នៅប៊្រីសបិន ត្រូវកាត់ផ្តាច់។
គួររំឭកឡើងវិញថា រដ្ឋ Queensland ដែលស្ថិតនៅប៉ែកឦសានអូស្រ្តាលី បានទទួលរងនូវគ្រោះទឹកជំនន់ដ៏ធំអស់រយៈពេលជាច្រើនសប្តាហ៍កន្លងមកហើយ។ ផ្ទុយទៅវិញ នៅប៉ែកខាងលិចអូស្រ្តាលីឯណោះវិញ បែរជាជួបនឹងអាកាសធាតុស្ងួតហួតហែងទៅវិញ ដែលធ្វើឲ្យអាជ្ញាធរត្រូវប្រឈមមុខនឹងបញ្ហាភ្លើងឆេះព្រៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ