ឥណ្ឌា និងវៀតណាម ចុះកិច្ចព្រមព្រៀងយុទ្ធសាស្ត្រ ស្ដីពីភាពជាដៃគូការពារជាតិ
ឥណ្ឌានិងវៀតណាម ចុះកិច្ចព្រមព្រៀងយុទ្ធសាស្ត្រ ស្ដីពីភាពជាដៃគូការពារជាតិ។ ជាកិច្ចព្រមព្រៀងដែលត្រូវបានចុះហត្ថលេខាដោយប្រមុខរដ្ឋាភិបាល ឥណ្ឌា និងសមភាគីរបស់លោក នៅថ្ងៃអង្គារទី២៨តុលាម្សិលមិញ។ កិច្ចព្រមព្រៀងនេះ ត្រូវបានធ្វើឡើងនៅក្នុងដំណើរទស្សនកិច្ចរយៈពេលពីរថ្ងៃរបស់លោក នាយករដ្ឋមន្ដ្រីវៀតណាម នៅប្រទេសឥណ្ឌាពីថ្ងៃទី២៧ ដល់ថ្ងៃទី២៨ខែតុលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
កិច្ចព្រមព្រៀងចំនួន៧ ស្ដីពីយុទ្ធសាស្ត្រ ការការពារជាតិ និងភាពជាដៃគូផ្នែកវប្បធម៌ ត្រូវបានចុះហត្ថលេខានៅថ្ងៃអង្គារទី២៨តុលា ដោយលោកនាយករដ្ឋមន្ដ្រីឥណ្ឌា នរិន្ត្រ មូឌី និងលោកនាយករដ្ឋមន្ដ្រីវៀតណាម ង្វៀន តាន់យ៉ុង។ ក្នុងនោះ ប្រមុខរដ្ឋាភិបាលឥណ្ឌាក៏បានប្រកាសផងដែរថា ឥណ្ឌានឹងផ្គត់ផ្គង់នាវាដល់វៀតណាមនៅក្នុងពេលដ៏ឆាប់ខាងមុខ។ នេះជាការបញ្ជូននាវាយោធាដំបូងបំផុត ពីឥណ្ឌាទៅវៀតណាម នៅក្នុងពេលដែលជម្លោះដែនទឹកជាមួយចិន មិនទាន់មានភាពធូរស្រាលនៅឡើយ។
លោកនាយករដ្ឋមន្ដ្រីឥណ្ឌា លោកនរិន្ត្រ មូឌី ប្រាប់អ្នកសារព័ត៌មានថា កិច្ចសហការនៅក្នុងការការពារជាតិជាមួយវៀតណាម ស្ថិតនៅក្នុងបញ្ហាដ៏សំខាន់បំផុតរបស់ឥណ្ឌា។ និងថា វានឹងត្រូវបានពង្រីកឲ្យកាន់តែធំជាងនេះទៀត នៅពេលអនាគត។
ក្រៅពីបញ្ហាយោធា និងការពារជាតិ ឥណ្ឌា និងវៀតណាម ក៏បានចុះកិច្ចព្រមព្រៀងមួយ បើកដៃឲ្យក្រុមហ៊ុនប្រេងដ៏ធំរបស់ឥណ្ឌា រុករកប្រេងនៅសមុទ្រចិនខាងត្បូង ក្រោមកិច្ចសហការជាមួយក្រុមហ៊ុនប្រេងរបស់វៀតណាមផងដែរ។ កន្លងមក ចិនតែងតែរិះគន់ចំពោះកិច្ចសហការរវាងឥណ្ឌានិងវៀតណាម នៅក្នុងវិស័យប្រេង និងឧស្ម័នហ្គាស ដោយលើកឡើងថា ការរុករកប្រេងនៅឈូងសមុទ្រវៀតណាម គឺខុសច្បាប់។ យ៉ាងណាក៏ដោយ ឆ្លើយតបទៅនឹងកិច្ចព្រមព្រៀងលើកនេះ ចិនបែរជានិយាយថា វាមិនចោទជាបញ្ហាអ្វីនោះទេ ប្រសិនបើការរុករកនោះ ធ្វើឡើងនៅក្រៅតំបន់ដែលកំពុងមានជម្លោះ។
គួរជម្រាបជូនថា ឥណ្ឌានិងវៀតណាម សុទ្ធតែមានជម្លោះដែនអធិបតេយ្យជាមួយចិន។ ឥណ្ឌាមានជម្លោះព្រំដែនគោកជាមួយចិន នៅតំបន់ភ្នំហិម៉ាល័យ។ ចំណែកវៀតណាម មានជម្លោះដែនទឹកជាមួយចិន នៅសមុទ្រចិនខាងត្បូង។ ទីក្រុងញ៉ូដេលី និងទីក្រុងហាណូយ បានបង្កើនការការពារខ្លួន បើទោះបីជាពួកគេ ព្យាយាមបង្កើនទំនាក់ទំនងពាណិជ្ជកម្មជាមួយចិន ដែលជាប្រទេសមហាអំណាចសេដ្ឋកិច្ចធំទី២របស់ពិភពលោកក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ