អ្នកកាសែតភូមាត្រូវកាត់ទោស ដោយសារចុះផ្សាយអត្ថបទស្តីពីការលួចផលិតអាវុធគីមី
នៅភូមា អ្នកកាសែត៥នាក់ ត្រូវបានតុលាការបើកសវនាការជំនុំជម្រះ បន្ទាប់ពីពួកគេបានចុះផ្សាយអត្ថបទទាក់ទងនឹងទីតាំងដែលគេសង្ស័យមានការលួចផលិតអាវុធគីមីរបស់រដ្ឋាភិបាល។ តាមកាសែតផ្លូវការរបស់រដ្ឋភូមា ដែលចុះផ្សាយ នៅថ្ងៃអាទិត្យនេះ អ្នកកាសែតទាំងនោះត្រូវជាប់ចោទពីបទបករឿងការណ៍សម្ងាត់របស់រដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
សវនាការស្តីពីការបើកកកាយរឿងសម្ងាត់របស់រដ្ឋភូមា បានបើកធ្វើនៅទីក្រុងPakokka ទីក្រុងនៅចំកណ្តាលប្រទេសភូមា ជាទីដែលមានតាំងទីមូលដ្ឋានទ័ពភូមា។ មូលដ្ឋានទ័ពភូមាដែលកាសែតUnity បានសរសេរចុះផ្សាយនៅក្នុងអត្ថបទរបស់ខ្លួន។ កាលពីដើមខែកុម្ភៈនេះ គណៈកម្មាធិការការពារអ្នកកាសែតCPJបានទាមទារ ឲ្យអាជ្ញាធរដោះលែងអ្នកកាសែតទាំង៥រូប និងថា អ្នកកាសែតមិនគួរទទួលការគំរាមកំហែង ឬចាប់ខ្លួន ដោយសារតែបានចុះផ្សាយដំណឹងសំខាន់ទាក់ទងនឹងបញ្ហាជាតិ ឬអន្តរជាតិ។
គណៈកម្មាធិការការពារអ្នកកាសែតCPJ បានរាយការណ៍ថា កាសែតប្រចាំសប្តាហ៍Unity Journal របស់អ្នកកាសែតទាំង៥នាក់ បានចុះផ្សាយពីដំណឹងមួយដែលថា តាំងពីឆ្នាំ ២០០៩ អាជ្ញាធរភូមាកំពុងកសាង បង្កើតបណ្តាញរូងក្រោមដី ក្នុងទំហំដី ១២០០ហិចតា។ កាសែតUnity ដែលបានដកស្រង់សំដីពីកម្មករធ្វើការនៅក្នុងការដ្ឋានសម្ងាត់នោះ បានសរសេរថា មូលដ្ឋានទ័ពសម្ងាត់នឹងប្រើក្នុងគោលដៅផលិតអាវុធគីមី។
កាលពីសប្តាហ៍មុន រដ្ឋាភិបាលភូមាបានបដិសេធនឹងដំណឹងចុះផ្សាយ ដោយថា ទីតាំងដែលកាសែតបានចុះសរសេរនោះ នឹងមិនត្រូវប្រើ ដើម្បីផលិតអាវុធគីមីទេ។ សូមបញ្ជាក់ថា របបភូមាដែលបានប្រែក្លាយខ្លួនជារដ្ឋាភិបាលស៊ីវិល កាលពីឆ្នាំ ២០១១ តែងតែរុញច្រានចោលការចោទប្រកាន់ដែលថា ខ្លួនកំពុងលួចផលិតអាវុធគីមី ដើម្បីយកទៅប្រើប្រឆាំងនឹងក្រុមឧទ្ទាមជនជាតិភាគតិច។
អគ្គនាយករបស់អង្គការដើម្បីហាមឃាត់អាវុធគីមី វិញ បានប្រកាស កាលពីខែធ្នូកន្លងទៅថា ភូមាបានប្រកាសត្រៀមខ្លួន ដើម្បីចុះហត្ថលេខាលើអនុសញ្ញាអន្តរជាតិស្តីពីការហាមឃាត់អាវុធគីមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ