អ.ស.បចេញសេចក្តីសម្រេចដាក់ទណ្ឌកម្មលើអ្នកប្រមាញ់ និងជួញដូរភ្លុកសត្វ
ការសម្លាប់សត្វដើម្បីយកភ្លុក នៅអាហ្វ្រិកមិនមែនគ្រាន់តែជាសកម្មភាពបំផ្លាញបរិស្ថានប៉ុណ្ណោះទេ ប៉ុន្តែ វានឹងក្លាយជាបទឧក្រិដ្ឋ។ កាលពីសប្តាហ៍ ក្រុមប្រឹក្សាសន្តិសុខរបស់អង្គការសហប្រជាជាតិបានបោះឆ្នោត ចេញសម្រេច ជាលើកទីមួយថ្កោលទោស ដាក់ទណ្ឌកម្ម ទៅលើអ្នកដែលប្រមាញ់សត្វ ដើម្បីយកភ្លុក។ អង្គការការពារសត្វដែលជិតផុតពូជបានអបអរ ស្វាគមគំនិតផ្តួចផ្តើមរបស់អង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកដែលត្រូវជាប់សំណាញ់ទណ្ឌកម្មរបស់ក្រុមប្រឹក្សាសន្តិសុខ គឺអ្នកប្រមាញ់ និងជួញដូរភ្លុកសត្វ នៅសាធារណរដ្ឋអាហ្រ្វិកកណ្តាល និងសាធារណរដ្ឋប្រជាធិបតេយ្យកុងហ្គោ។ តាមការវាយតម្លៃរបស់ក្រុមប្រឹក្សាសន្តិសុខ ក្រុមប្រមាញ់ និងក្រុមជួញដូរ សត្វព្រៃទាំងនោះជាអ្នកផ្តល់លុយដល់ក្រុមប្រដាប់អាវុធ ដែលកំពុងបង្កសង្រ្គាម សម្លាប់មនុស្ស និងបានឆ្លៀតកេងយកចំណេញ ពីជម្លោះប្រដាប់អាវុធ នៅអាហ្វ្រិក កណ្តាល។
អង្គការសហប្រជាជាតិ ដែលមានតួនាទីរក្សាសន្តិភាព និងសន្តិសុខនៅក្នុងពិភពលោក បានបោះឆ្នោតដាក់ទណ្ឌកម្មជាពិសេស លើក្រុមឧទ្ទាមដែលកំពុងមានសកម្មភាពខ្លាំង នៅសាធារណរដ្ឋកុងហ្គោ។ ក្រុមប្រឹក្សាសន្តិសុខសង្ស័យផងដែរថា ក្រុមប្រដាប់អាវុធអ៊ូហ្គង់ដាដែលជាក្រុមសាហាវឃោឃៅ កំពុងលួចជួញដូរភ្លុកសត្វ ដើម្បីយកលុយមកទិញអាវុធ។
ប្រធានកម្មវិធីការពារសត្វព្រៃដែលជិតផុតពូជបាននិយាយថា នេះជាលើកទីមួយ ដែលអ្នកប្រមាញ់ និងអ្នកជួញដូរសត្វព្រៃ ធ្លាក់ក្នុងសំណាញ់ទណ្ឌកម្មរបស់អង្គការសហប្រជាជាតិ។ ទណ្ឌកម្មរបស់អង្គការសហប្រជាជាតិមានចែងពីការរឹបអូស ផ្អឹបទ្រព្យសម្បត្តិ និងហាមមិនអ្នកដែលស្ថិតនៅក្នុងបញ្ជីខ្មៅធ្វើដំណើរចេញចូលទៅបរទេស។
តាមអង្គការការពារសត្វព្រៃ WWF ចាប់តាំងពីឆ្នាំ ២០០៩ ទំហំប្រមាញ់សត្វព្រៃកាន់តែរីកធំ សឹងក្លាយជាឧស្សាហកម្ម សម្លាប់ និងជួញដូរ បន្ទាប់ពីគេចាប់រឹបអូសបានភ្លុកច្រើនជាង ៥០០គីឡូក្រាម។ នៅឆ្នាំ ២០១៣ ឆ្លៀតឱកាសដែលអាហ្រ្វិកកណ្តាលជួបភាពវឹកវរ ក្រុមប្រមាញ់បានប្រើកាំភ្លើងបាញ់សម្លាប់សត្វដំរី២៦ក្បាល នៅក្នុងឧទ្យានសត្វ ដែលត្រូវបានចាត់ចូល នៅក្នុងបញ្ជីបេតិកភណ្ឌពិភពលោក។ អ្នកជំនាញបានវាយតម្លៃថា សកម្មភាពសម្លាប់សត្វយកភ្លុក បានធ្វើឲ្យចំនួនសត្វដំរីបានថយចុះពាក់កណ្តាល មកនៅត្រឹម៥សែនក្បាល បើប្រៀបធៀបនឹងឆ្នាំ១៩៨០ ក្នុងពេលដែលសត្វមានភ្លុកផ្សេងទៀត ដូចជាដំរីទឹក រមាស អាចឈានទៅរកការផុតពូជ។
ការជួញដូរភ្លុក ជាអាជីវកម្មផ្តល់ប្រាក់ចំណេញច្រើន នាំមុខការជួញដូរថ្នាំញៀន ឬការផលិតលុយក្លែងក្លាយ។ អាជីវកម្មនេះផ្តល់ប្រាក់ប្រមាណ១៤ពាន់លានដុល្លារ ដល់ក្រុមប្រមាញ់ និងជួញដូរ។ តាមអ្នកការទូតម្នាក់របស់ក្រុមប្រឹក្សាសន្តិសុខ ចំណាត់ប្រឆាំងនឹងសម្លាប់សត្វព្រៃត្រូវធ្វើទាំងទៅលើក្រុមប្រមាញ់ និងអ្នកដែលប្រើប្រាស់។ ប្រទេសនៅអាស៊ី ដូចជាចិន និងថៃ ត្រូវបានគេចាត់ទុកជាទីផ្សារដ៏ធំដែលស្រូបទិញភ្លុកពី អាហ្រ្វិក។ ចំណែកវៀតណាម ម៉ាឡេស៊ី កេនយ៉ា ឬតង់ហ្សានី ជាកន្លែងឆ្លងកាត់ សម្រាប់ក្រុមជួញដូរភ្លុកសត្វព្រៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ