ឥណ្ឌា-សេដ្ឋកិច្ច -

អត្ថបទចុះផ្សាយនៅថ្ងៃ ពុធ 29 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 29 កុម្ភៈ 2012

កំណើនសេដ្ឋកិច្ចឥណ្ឌាប្រចាំត្រីមាសបានធ្លាក់មកនៅ៦,១%ក្នុង១ឆ្នាំ

លោកប្រមុខរដ្ឋាភិបាលឥណ្ឌា Manmohan Singh

Reuters/Press Information Bureau of India

ដោយ សៀក សារិន

អត្រានៃកំណើនសេដ្ឋកិច្ចឥណ្ឌានៅត្រីមាសទី៤ឆ្នាំ២០១១បានធ្លាក់ស្រុតចុះមកនៅ៦,១%ក្នុងមួយឆ្នាំ ដែលជាកម្រិតមួយដ៏ទាបសម្រាប់រយៈកាលជាងពីរឆ្នាំចុងក្រោយនេះ។ ទាំងនេះក៏ពីព្រោះតែមានការដំឡើងអត្រាការប្រាក់ជាច្រើនលើកដោយធនាគារកណ្តាលឥណ្ឌា ហើយនិងដោយហេតុតែវិបត្តិសេដ្ឋកិច្ចពិភពលោក។

សេចក្តីរាយការណ៍របស់ សៀក សារិន

ស្តាប់ (02:14)

29/02/2012 by សៀក សារិន

សន្ទុះកំណើនសេដ្ឋកិច្ចឥណ្ឌានៅត្រីមាសទី៤ឆ្នាំ២០១១បានស្គាល់ការថយស្រុតចុះ ធ្លាក់មកនៅ៦,១%ក្នុងមួយឆ្នាំ ដែលខុសពីការគ្រោងទុកថា អាចមានដល់ទៅ៦,៣%។ នេះពិតជាអត្រាកំណើនសេដ្ឋកិច្ចប្រចាំត្រីមាសដ៏សែនទាបសម្រាប់ប្រទេសឥណ្ឌាបើគិតតាំងពីត្រីមាសទី២ឆ្នាំ២០០៩មក។

តើទាំងនេះបណ្តាលមកពីមូលហេតុអ្វី?
មូលហេតុដែលនាំឲ្យអត្រានៃកំណើនសេដ្ឋកិច្ចរបស់មហាអំណាចសេដ្ឋកិច្ចទីបីអាស៊ីមួយនេះធ្លាក់ស្រុតចុះបែបនេះមានច្រើន៖
ទី១- បណ្តាលមកពីនយោបាយប្រយុទ្ធប្រឆាំងនឹងបញ្ហាអតិផរណាដែលនាំឲ្យធនាគារកណ្តាលឥណ្ឌាធ្វើការដំឡើងអត្រាការប្រាក់នាំមុខជាច្រើនលើក។
ទី២- ការធ្លាក់បាត់បង់ទំនុកចិត្តកក់ក្តៅរបស់វិនិយោគិននិងអតិថិជន។
ទី៣- រដ្ឋាភិបាលឥណ្ឌានៅគាំងបាត់បង់សកម្មភាពនិងគំនិតផ្តួចផ្តើមរបស់ខ្លួន ដោយហេតុតែវិបត្តិសេដ្ឋកិច្ចពិភពលោក។

ការប្រយុទ្ធប្រឆាំងទល់នឹងបញ្ហាអតិផរណាដែលជាអាទិភាពចម្បងរបស់រដ្ឋាភិបាលបានធ្វើឲ្យប៉ះពាល់ដល់សកម្មភាពសេដ្ឋកិច្ចប្រទេសឥណ្ឌាដែលមានប្រជាជន១ ២០០លាននាក់រស់នៅ។ ហើយដើម្បីធ្វើការទប់ទល់នឹងបញ្ហាទំនិញឡើងថ្លៃដែលមានដល់ទៅ១០% ធនាគារកណ្តាលឥណ្ឌាបានធ្វើការដំឡើងអត្រាការប្រាក់នាំមុខដល់ទៅ១៣លើក បើគិតតាំងពីខែមីនាឆ្នាំ២០១០មក។

ប្រទេសឥណ្ឌាដែលបានស្គាល់សន្ទុះកំណើនសេដ្ឋកិច្ចប្រមាណ៨,៥%នៅឆ្នាំ២០១០-២០១១ សង្ឃឹមថានឹងអាចសម្រេចបាន៩%នៅឆ្នាំ២០១១-២០១២ ឥឡូវនេះបានបន្ថយមហិច្ឆតារបស់ខ្លួនមកនៅត្រឹម៧%ប៉ុណ្ណោះសម្រាប់ឆ្នាំ២០១១-២០១២។

ទោះបីជាប្រទេសលោកខាងលិចមើលឃើញអត្រានៃកំណើនសេដ្ឋកិច្ចឥណ្ឌាហាក់បីដូចជាមានសភាពខ្ពស់គួរឲ្យចង់បានក្តី សម្រាប់រដ្ឋាភិបាលឥណ្ឌាវិញ អត្រានៃកំណើនសេដ្ឋកិច្ចនេះនៅមានលក្ខណៈតិចទាបពេកសម្រាប់ជួយប្រយុទ្ធប្រឆាំង ហើយនិងជួយកាត់បន្ថយភាពក្រីក្ររបស់ប្រជាជន។

លោកប្រមុខរដ្ឋាភិបាលឥណ្ឌា Manmohan Singh យល់ថា ប្រទេសឥណ្ឌាត្រូវមានសន្ទុះកំណើនសេដ្ឋកិច្ចយ៉ាងតិច១០%ក្នុងមួយឆ្នាំៗ ទើបអាចជួយកាត់បន្ថយភាពក្រីក្ររបស់ប្រជាជនឥណ្ឌារាប់រយលាននាក់បានដោយប្រសិទ្ធិភាព៕