អាមេរិក-កូរ៉េខាងជើង -

អត្ថបទចុះផ្សាយនៅថ្ងៃ ព្រហស្បតិ៍ 23 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 23 កុម្ភៈ 2012

អាមេរិកនិងកូរ៉េខាងជើងជួបគ្នានៅប៉េកាំងប្រទេសចិន

លោកGlyn Davies ប្រធានគណប្រតិភូអាមេរិកាំងជួបជាមួយគណប្រតិភូកូរ៉េខាងជើងនៅប៉េកាំងប្រទេសចិន

ដោយ តាន់ ហ្សង់-ហ្វ្រង់ស្វ័រ

អាមេរិកនិងកូរ៉េខាងជើងជួបគ្នានៅទីក្រុងប៉េកាំងប្រទេសចិននៅថ្ងៃព្រហស្បតិ៍ទី២៣កុម្ភៈនេះ។ គឺជាលើកទីមួយហើយតាំងពីមរណភាពរបស់លោក Kim Jong-Il មកដែលភាគីទាំងពីរបានជួបប្រាស្រ័យគ្នាដើម្បីពិភាក្សាអំពីសំណុំរឿងនុយក្លេអ៊ែរនៃរបបព្យុងយ៉ាង។

សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ

ស្តាប់ (01:44)

23/02/2012 by តាន់ ហ្សង់-ហ្វ្រង់ស្វ័រ

នៅក្នុងឱកាសជំនួបប្រាស្រ័យថ្ងៃនេះ គណប្រតិភូអាមេរិកាំង បានសាកល្បងស្ទង់មើលចិត្តគំនិតរបស់កូរ៉េខាងជើងដែលសព្វថ្ងៃឋិតនៅក្រោមការដឹកនាំរបស់លោកKim Jong-Un ក្រោយពីលោកKim Jong-Il បានទទួលមរណភាពកាលពីខែធ្នូឆ្នាំ២០១១។ តើកូរ៉េខាងជើងព្រមវិលត្រឡប់មករកតុចរចាប្រាំមួយភាគីវិញដែរឬទេ ក្រោយពីបានដើរចេញអស់រយៈពេលជិតបីឆ្នាំកន្លងមកហើយ?

គួរជម្រាបថា នេះជាលើកទីបីហើយដែលអាមេរិកនិងកូរ៉េខាងជើងបានជួបគ្នាផ្ទាល់ជាឧភតោភាគី។ តាមការគ្រោងទុក ជំនួបលើកទីបីនេះត្រូវប្រព្រឹត្តទៅនៅខែធ្នូឆ្នាំ២០១១ តែវាបានអាក់ខានទៅវិញ ដោយសារតែមរណភាពរបស់លោកKim Jong-Il និងអន្តរកាលដែលរបបកុម្មុយនិស្តទីក្រុងព្យុងយ៉ាងត្រូវឆ្លងកាត់។

អាមេរិកលួចសង្ឃឹមថា កូរ៉េខាងជើងដែលមានអ្នកដឹកនាំថ្មីអាចយល់ព្រមវិលត្រឡប់មកតុចរចាដោយមិនដាក់លក្ខខណ្ឌ។ ទន្ទឹមនេះ ទីក្រុងវ៉ាស៊ីនតោនក៏បានពឹងពាក់ចិនឲ្យនិយាយជាមួយថ្នាក់ដឹកនាំថ្មីនៃរបបព្យុងយ៉ាងដែរ។ អ្វីដែលអាមេរិកចង់បាន គឺឈប់ឲ្យកូរ៉េខាងជើងរករឿងកូរ៉េខាងត្បូង។

រីឯប្រទេសចិនវិញ អាចជំរុញកូរ៉េខាងជើងឲ្យធ្វើកំណែទម្រង់សេដ្ឋកិច្ច និងលះបង់ចោលកម្មវិធីនុយក្លេអ៊ែររបស់ខ្លួន។ មែនទែនទៅ ចិនមិនចង់ឃើញប្រទេសមិត្តមួយនេះរបស់ខ្លួនប្រដាប់ដោយអាវុធនុយក្លេអ៊ែរទេ ពីព្រោះប្រការនេះអាចនឹងញ៉ាំងឲ្យជប៉ុន កូរ៉េខាងត្បូងនិងតៃវ៉ាន់មានគំនិតចង់បង្កើតអាវុធនុយក្លេអ៊ែរដែរ ឬក៏ញ៉ាំងឲ្យអាមេរិកចូលមកលូកដៃកាន់តែជ្រៅក្នុងបញ្ហាឧបទ្វីបកូរ៉េ។

យ៉ាងណាក៏ដោយ សកម្មភាពការទូតទាំងនេះ ពីសំណាក់អាមេរិក ក៏ដូចពីសំណាក់ចិន មិនច្បាស់ថានឹងទទួលជោគជ័យទេ ដ្បិតកូរ៉េខាងជើងយល់ឃើញថា មានតែអាវុធនុយក្លែអ៊ែរមួយទេ ដែលអាចជួយរក្សារបបនយោបាយរបស់ខ្លួនឲ្យនៅឋិតថេរបានយូរលង់តទៅមុខទៀត៕