លោកស្រីប្រមុខបក្សប្រឆាំងភូមាទៅជាន់ដីរបស់ជនជាតិភាគតិច Kachin
លោកស្រីប្រមុខបក្សប្រឆាំងភូមាAung San Suu Kyi កំពុងបន្តធ្វើយុទ្ធនាការឃោសនាបោះឆ្នោតសភាមួយភាគ ដែលនឹងត្រូវប្រព្រឹត្តទៅនៅខែមេសាខាងមុខនេះ។ នៅថ្ងៃព្រហស្បតិ៍ទី២៣កុម្ភៈនេះ លោកស្រីជ័យលាភីរង្វាន់ណូបែលផ្នែកសន្តិភាពរូបនេះ ឋិតនៅតំបន់ចុងប៉ែកខាងជើងនៃប្រទេសដែលជាដែនដីរបស់ពួកជនជាតិKachin។ លោកស្រីAung San Suu Kyiបានឆ្លៀតអំពាវនាវសុំឲ្យរដ្ឋាភិបាលនិងពួកKachinឈប់បាញ់គ្នា និងបង្រួបបង្រួមគ្នា ដើម្បីឯកភាពជាតិ។ របបថ្មីភូមាដែលដឹកនាំដោយលោកប្រធានាធិបតីThein Sein បាននិងកំពុងបន្តចរចាស្វែងរកសន្តិភាពជាមួយពួកជនជាតិភាគតិច ដើម្បីបញ្ចប់សង្គ្រាមទ័ពព្រៃដែលមានមកតាំងពីឆ្នាំ១៩៤៨ម្ល៉េះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
នៅភូមា មានជនជាតិភាគតិចចំនួនជាង៤០សហគមន៍ដែលតំណាង៣០%នៃប្រជាជនភូមាទាំងស្រុង។ ក្នុងចំណោមជនជាតិភាគតិចទាំងនោះ រួមមានជាអាទិ៍ពួកKaren ពួកChan និងពួកKachin។ តាំងពីឆ្នាំ១៩៤៨មកម្ល៉េះ ពោលគឺតាំងពីភូមាបានទទួលឯករាជ្យពីប្រទេសអង់គ្លេសរួចមក ពួកជនជាតិភាគតិចសំខាន់ៗ ដូចយ៉ាងពួកKaren និងពួកKachin បានចាប់អាវុធប្រយុទ្ធតស៊ូ ដើម្បីផ្តាច់ខ្លួនចេញពីការត្រួតត្រារបស់រដ្ឋាភិបាលភូមា។
មកទល់ពេលថ្មីៗនេះ រដ្ឋអំណាចភូមាបានប្រើមធ្យោបាយធម៌ក្តៅវាយបង្ក្រាបយ៉ាងសាហាវព្រៃផ្សៃជាទីបំផុតទៅលើពួកជនជាតិភាគតិចបះបោរ។ ជាក់ស្តែងរហូតមកដល់ពេលថ្មីៗនេះ កងទ័ពភូមានៅបន្តវាយប្រហារទៅលើកងកម្លាំងដើម្បីឯករាជ្យKachin នៅក្នុងតំបន់ចុងប៉ែកខាងជើងនៃប្រទេស នៅជាប់ព្រំដែនជាមួយប្រទេសចិន។
ចាប់ពីខែវិច្ឆិកាឆ្នាំ២០១១មក របបថ្មីភូមាក្រោមការដឹកនាំរបស់លោកប្រធានាធិបតីThein Sein បាននិងកំពុងបន្តចរចាជាមួយជនជាតិភាគតិច ដើម្បីបញ្ចប់សង្គ្រាមទ័ពព្រៃ ដែលធ្វើឲ្យសេដ្ឋកិច្ចនៃប្រទេសមិនអាចអភិវឌ្ឍទៅមុខលឿនរហ័សបាន។ លទ្ធផលនៃកិច្ចចរចា គឺការសម្រេចបាននូវកិច្ចឈប់បាញ់គ្នាមួយនៅខែធ្នូឆ្នាំ២០១១រវាងរដ្ឋាភិបាលនិងទ័ពព្រៃនៃជនជាតិភាគតិចChan។
យ៉ាងណាក៏ដោយ ដោះស្រាយបញ្ហាជនជាតិភាគតិច មិនមែនជារឿងងាយស្រួលទេ ពីព្រោះរដ្ឋាភិបាលភូមាមិនអាចបណ្តោយឲ្យដែនដីទាំងអម្បាលម៉ានរបស់ពួកជនជាតិភាគតិចរបូតចេញពីការគ្រប់គ្រងរបស់ខ្លួនឡើយ។ ទន្ទឹមនេះ រដ្ឋអំណាចភូមាក៏ដឹងច្បាស់ដែរថាសន្តិភាពនឹងមិនអាចកើតឡើងបានទេ បើសិនជានៅតែគ្មានទេនោះការឆ្លើយតបវិជ្ជមានសមស្របទៅ នឹងការទាមទារឯករាជ្យឬស្វ័យភាពរបស់ជនជាតិភាគតិចទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ