យេម៉ែន -

អត្ថបទចុះផ្សាយនៅថ្ងៃ អង្គារ 21 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 21 កុម្ភៈ 2012

ការបោះឆ្នោតប្រធានាធិបតីដើម្បីឈានជើងចេញពីរបបចាស់

អនុប្រធានាធិបតីនៃរបបចាស់នឹងក្លាយជាប្រធានាធិបតីនៃរបបថ្មី

ដោយ តាន់ ហ្សង់-ហ្វ្រង់ស្វ័រ

ពលរដ្ឋយេម៉ែនចំនួនជាង១២លាននាក់ ត្រូវបោះឆ្នោតជ្រើសរើសប្រធានាធិបតីថ្មី នៅថ្ងៃអង្គារទី២១កុម្ភៈនេះ ដើម្បីជំនួសលោកAli Abdallah Salech ដែលបានចុះចេញពីតំណែងក្រោយពីមានចលនាបដិវត្តន៍កើតឡើងអស់រយៈពេលជាច្រើនខែ។ ក៏ប៉ុន្តែអ្នកបោះឆ្នោតគ្មានជម្រើសទេ ពីព្រោះមានតែបេក្ខជនម្នាក់គត់ នោះគឺលោកAbd Rabbo Mansour Hadi ដែលមានតំណែងជាអនុប្រធានាធិបតីនៅក្នុងរបបចាស់។

សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ

ស្តាប់ (01:17)

21/02/2012 by តាន់ ហ្សង់-ហ្វ្រង់ស្វ័រ

នៅក្នុងការបោះឆ្នោតប្រធានាធិបតីថ្ងៃអង្គារទី២១កុម្ភៈនេះ មានបេក្ខជនឈរឈ្មោះតែម្នាក់គត់ គឺលោកAbdo Rabbo Mansour Hadi ដែលជាអនុប្រធានាធិបតីនៅក្នុងរបបចាស់របស់លោកAli Abdallah Salech។ នេះមិនមែនជារឿងមួយចម្លែកទេ ពីព្រោះមុននឹងចុះចេញពីតំណែង លោកSalechដែលពួកអ្នកប្រឆាំងបានធ្វើបដិវត្តន៍រំលំពីអំណាចបានចុះហត្ថលេខាលើកិច្ចព្រមព្រៀងមួយតម្រូវឲ្យអនុប្រធានាធិបតីរបស់លោកឡើងធ្វើជាប្រធានាធិបតី នៅក្នុងសម័យអន្តរកាល។

ម្ល៉ោះហើយ សូម្បីតែបក្សប្រឆាំងal-Islahដែលជាចលនាអ៊ីស្លាមជ្រុលនិយម ក៏អំពាវនាវឲ្យប្រជាពលរដ្ឋនាំគ្នាទៅចូលរួមបោះឆ្នោតដែរ។ ទាំងនេះស្តែងឲ្យឃើញថា នៅក្នុងអន្តរកាលក្រោយសម័យបដិវត្តន៍ ប្រជាជនយេម៉ែនគិតពីប្រយោជន៍រួមរបស់ប្រទេសជាតិ ជាងប្រយោជន៍នយោបាយរបស់គណបក្សនីមួយៗ។

នៅក្នុងអន្តរាគមន៍មួយផ្សាយផ្ទាល់តាមទូរទស្សន៍កាលពីយប់មិញ លោកអនាគតប្រធានាធិបតីនៃប្រទេសយេម៉ែន បានគូសបញ្ជាក់ថា អ្វីដែលសំខាន់នៅពេលខាងមុខ គឺការរួបរួមជាតិ ឯកភាពរបស់កងទ័ព កំណែទម្រង់នយោបាយដើម្បីឈានទៅរកលទ្ធិប្រជាធិបតេយ្យ និងការប្រយុទ្ធទប់ទល់នឹងឥទ្ធិពលរបស់អង្គការភេរវកម្មអាល់កៃដានៅក្នុងប្រទេស។ លោកបានបន្ថែមទៀតថា ដើម្បីធ្វើកិច្ចការទាំងអស់នេះ លោកត្រូវការជំនួយពីសហគមន៍អន្តរជាតិ៕