ចិន-តួកគី -

អត្ថបទចុះផ្សាយនៅថ្ងៃ អង្គារ 21 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 21 កុម្ភៈ 2012

អនុប្រធានាធិបតីចិនអញ្ជើញទៅតួកគីដើម្បីរឹតចំណងនយោបាយនិងពាណិជ្ជកម្ម

លោកអនុប្រធានាធិបតីចិន Xi Jinping

Reuters/David Moir

ដោយ សៀក សារិន

លោកអនុប្រធានាធិបតីចិន Xi Jinping បានអញ្ជើញទៅដល់ទីក្រុងអង់ការ៉ានៅល្ងាចថ្ងៃចន្ទទី២០កុម្ភៈឆ្នាំ២០១២ ដោយឲ្យសារៈសំខាន់ទៅលើវិស័យពាណិជ្ជកម្មនិងវិនិយោគ ហើយនិងទៅលើបញ្ហាតំបន់មួយចំនួន ជាពិសេសវិបត្តិនៃប្រទេសស៊ីរីដែលមានជាប់ព្រំដែនជាមួយប្រទេសតួកគី។

សេចក្តីរាយការណ៍របស់ សៀក សារិន

ស្តាប់ (01:57)

21/02/2012 by សៀក សារិន

ក្រោយពីទស្សនកិច្ចរបស់លោកនៅសហរដ្ឋអាមេរិក លោកអនុប្រធានាធិបតីចិន Xi Jinping បានអញ្ជើញទៅបំពេញទស្សនកិច្ចចំនួនបីថ្ងៃនៅប្រទេសអៀរឡង់ មុននឹងធ្វើដំណើរទៅកាន់ទីក្រុងអង់ការ៉ានៃប្រទេសតួកគី។ មានប្រជាជនអៀរឡង់នៅសហរដ្ឋអាមេរិកច្រើនជាងនៅក្នុងប្រទេសអៀរឡង់ ហេតុដូច្នេះហើយបានជាប្រទេសអៀរឡង់ក្លាយទៅជាប្រទេសសមាជិកនៃតំបន់អឺរ៉ូដែលសហរដ្ឋអាមេរិកយកមកប្រើធ្វើជា “ស្ពាន” សម្រាប់សហគ្រាសអាមេរិកឆ្លងចូលទ្វីបអឺរ៉ុប។ ចំណែកឯប្រទេសតួកគីវិញ គឺជាសម្ព័ន្ធមិត្តដ៏ស្និទ្ធរបស់អាមេរិកនៅក្នុងតំបន់។

តើមានមូលហេតុអ្វីមកជំរុញឲ្យអនុប្រធានាធិបតីចិន Xi Jinping អញ្ជើញទៅបំពេញទស្សនកិច្ចនៅប្រទេសអៀរឡង់ និងនៅប្រទេសតួកគី?
លោក Xi Jinping ជ្រើសយកប្រទេសអៀរឡង់ ដើម្បីពង្រឹងពង្រីកទំនាក់ទំនងពាណិជ្ជកម្ម ហើយលោកជ្រើសយកប្រទេសតួកគីដើម្បីពិភាក្សាពីវិបត្តិដ៏ក្តៅគគុកនៅប្រទេសស៊ីរី។

ម្យ៉ាងទៀត ប្រទេសតួកគីជាសមាជិកនៃបក្សសម្ព័ន្ធអូតង់ ហើយក៏ជាមហាអំណាចយោធាមួយក្នុងតំបន់។ ទីក្រុងអង់ការ៉ាជាអ្នកផ្តល់ជំនួយនិងទទួលផ្គត់ផ្គង់ក្រុមអ្នកប្រឆាំងស៊ីរី។ ចំណែកឯប្រទេសចិនក៏ដូចជាប្រទេសរុស្ស៊ីបានប្រើសិទ្ធិវេតូប្រឆាំងទល់នឹងគម្រោងសេចក្តីសម្រេចចិត្តរបស់អ.ស.ប.ធ្វើការថ្កោលទោសទៅលើទង្វើវាយបង្ក្រាបដ៏ហិង្សាឃោរឃៅនៃរបបគ្រប់គ្រងផ្តាច់ការរបស់បាស្ហារអាល-អាស្សាដ។

ប្រទេសតួកគីចង់ពន្យល់បញ្ចុះបញ្ចូលប្រទេសចិនឲ្យយល់ឃើញដូចខ្លួនថា “ស្ថានភាពដ៏ហិង្សានិងការបង្ហូរឈាមនៅប្រទេសស៊ីរីពុំអាចមានបន្តទៅទៀតបានឡើយ គេត្រូវតែបញ្ឈប់ការបង្ហូរឈាមបែបនេះ”។ ដូច្នេះ ជំហរខុសផ្ទុយគ្នាស្រឡះរវាងប្រទេសចិននិងប្រទេសតួកគីអាចនឹងធ្វើឲ្យប៉ះពាល់ដល់ទំនាក់ទំនងសេដ្ឋកិច្ច ដែលការដោះដូរពាណិជ្ជកម្មរវាងប្រទេសទាំងពីរបានគុណមួយជាម្ភៃនារយៈកាល១០ឆ្នាំចុងក្រោយនេះ។ សូមបញ្ជាក់ថា ការដោះដូរពាណិជ្ជកម្មរវាងប្រទេសចិននិងប្រទេសតួកគីបានស្ទុះកើនឡើងដល់ទៅ២០ពាន់លានដុល្លារក្នុង១ឆ្នាំ៕