អ្នកសង្កេតការអាស៊ានអាចមកឃ្លាំមើលការបោះឆ្នោតនៅភូមា
ភូមាដែលនឹងត្រូវរៀបចំការបោះឆ្នោតសភាមួយភាគនៅខែមេសាខាងមុខនេះគ្រោងថា នឹងទទួលយកក្រុមអ្នកសង្កេតការមកពីបណ្តាប្រទេសអាស៊ីអាគ្នេយ៍។ នេះបើយោងទៅតាមសេចក្តីថ្លែងការមួយនៃអគ្គលេខាធិការដ្ឋានរបស់អាស៊ាន។ ព័ត៌មាននេះបានធ្លាក់មកដល់ជួនចំពេលដែលលោកអគ្គលេខាធិការរបស់អាស៊ានSurin Pitsuwan កំពុងបំពេញទស្សនកិច្ចនៅក្នុងប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
លោកប្រធានាធិបតីភូមាThein Sein បានជួបជាមួយលោកអគ្គលេខាធិការរបស់អាស៊ាន Surin Pitsuwan នៅថ្ងៃអង្គារទី២១កុម្ភៈនេះ។ គឺនៅក្រោយជំនួបប្រាស្រ័យនេះហើយដែលអគ្គលេខាធិការដ្ឋានរបស់អាស៊ានបានចេញសេចក្តីថ្លែងការមួយបញ្ជាក់ថា ភូមាគ្រោងនឹងទទួលយកក្រុមអ្នកសង្កេតការអាស៊ាន ដើម្បីតាមឃ្លាំមើលការបោះឆ្នោតសភាមួយភាគនៅខែមេសាខាងមុខនេះ។
បើជាការពិតមែន ព័ត៌មាននេះស្តែងឲ្យឃើញថា របបថ្មីភូមារបស់លោកThein Sein បោះមួយជំហានទៀតយ៉ាងធំទៅរកលទ្ធិប្រជាធិបតេយ្យ តាមរយៈការខ្នះខ្នែងធ្វើឲ្យមានតម្លាភាពនៅក្នុងដំណើរការបោះឆ្នោត។ សូមជម្រាបថា សហរដ្ឋអាមេរិកនិងសហភាពអឺរ៉ុបដែលគាំទ្រនយោបាយកែទម្រង់នៅភូមា បានសន្យាថានឹងលើកចេញបណ្តើរៗទណ្ឌកម្មសេដ្ឋកិច្ច បើសិនជាការបោះឆ្នោតនៅខែមេសាខាងមុខនេះប្រព្រឹត្តទៅដោយសេរីនិងយុត្តិធម៌។
កាលពីថ្ងៃចន្ទទី២០កុម្ភៈម្សិលមិញនេះ អាជ្ញាធរភូមាដែលដើមដំបូងបានហាមមិនឲ្យគណបក្សសម្ព័ន្ធដើម្បីលទ្ធិប្រជាធិបតេយ្យរបស់លោកស្រីAung San Suu Kyi ធ្វើមីទីងនយោបាយនៅក្នុងពហុកីឡាដ្ឋាន បានលើកបម្រាមនេះចេញវិញនៅទីបំផុត។ សូមជម្រាបថាលោកស្រីAung San Suu Kyi កំពុងបន្តធ្វើយុទ្ធនាការឃោសនាបោះឆ្នោត។ លោកស្រីជ័យលាភីរង្វាន់ណូបែលផ្នែកសន្តិភាពបានឈរឈ្មោះជាបេក្ខនារីតំណាងរាស្រ្តនៅក្នុងមណ្ឌលមួយមិនឆ្ងាយប៉ុន្មានពីទីក្រុងRangoon៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ