អ.ស.ប-ស៊ីរី-រុស្ស៊ី -

អត្ថបទចុះផ្សាយនៅថ្ងៃ អាទិត្យ 05 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 05 កុម្ភៈ 2012

ស៊ីរី៖ ប្រតិកម្មលោកខាងលិចក្រោយពីវេតូរបស់រុស្ស៊ីនិងចិននៅអ.ស.ប.

លោកប្រមុខការទូតរុស្ស៊ី Sergueï Lavrov

(Photo : AFP)

ដោយ សៀក សារិន

ប្រទេសរុស្ស៊ីនិងប្រទេសចិនបានប្រើសិទ្ធិវេតូរបស់ខ្លួននៅថ្ងៃសៅរ៍ម្សិលមិញ ប្រឆាំងទល់នឹងគម្រោងសេចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.ប.ដើម្បីថ្កោលទោសទៅលើការវាយបង្ក្រាបយ៉ាងហិង្សាទៅលើបាតុករស៊ីរីដោយទាហានរបស់ប្រធានាធិបតីបាស្ហារអាល-អាស្សាដ។ នេះជាលើកទីពីរហើយនារយៈពេលបួនខែចុងក្រោយនេះដែលទីក្រុងម៉ូស្គូនិងទីក្រុងប៉េកាំងបានប្រើសិទ្ធិវេតូរបស់ខ្លួន ដើម្បីប្រឆាំងទល់នឹងគម្រោងសេចក្តីសម្រេចចិត្តរបស់អ.ស.ប.។

បទវិភាគរបស់ សៀក សារិន

ស្តាប់ (08:11)

05/02/2012 by សៀក សារិន

ប្រទេសរុស្ស៊ីតាមរយៈសំឡេងរបស់លោក Vitaly Churkin ឯកអគ្គរដ្ឋទូតរបស់ខ្លួនប្រចាំអ.ស.ប.បានថ្លែងឲ្យដឹងថា ផែនការរបស់ប្រទេសសម្ព័ន្ធអារ៉ាប់ដែលទាមទារឲ្យកងកម្លាំងយោធាស៊ីរីដកខ្លួនថយគឺជាផែនការពុំត្រឹមត្រូវ ដោយហេតុថា “នៅពេលដែលកងកម្លាំងយោធារបស់រដ្ឋាភិបាលដកខ្លួនថយ នៅពេលនោះក្រុមប្រដាប់អាវុធនៃពួកអ្នកប្រឆាំងស៊ីរីក៏បានឆ្លៀតមកកាន់កាប់ទីកន្លែង។ ដូច្នេះ គ្មានអ្វីមកបង្ខំឲ្យក្រុមប្រឹក្សាសន្តិសុខនៃអ.ស.ប.អនុម័តតាមសេចក្តីសម្រេចចិត្តរបស់អង្គការតំបន់មួយនេះឡើយ។ សេចក្តីសម្រេចចិត្តរបស់អង្គការតំបន់មួយនេះ ពុំមែនជាគម្ពីរ Coran អ៊ីស្លាម ហើយក៏ពុំមែនជាគម្ពីរ Bible សម្រាប់អ្នកកាន់គ្រឹស្តសាសនាដែរ »។ នេះជាពាក្យសំដីរបស់លោក Vitaly Churkin ឯកអគ្គរដ្ឋទូតរុស្ស៊ីប្រចាំអ.ស.ប.។

ម្យ៉ាងទៀតប្រទេសរុស្ស៊ីនៅតែមិនបោះបង់សម្ព័ន្ធមិត្តស៊ីរីចាស់របស់គេ ដោយនៅបន្តធ្វើការលក់សព្វាវុធឲ្យទៅទីក្រុងដាម៉ាស។ គួរកត់សម្គាល់ថា ប្រទេសស៊ីរីគឺជាអតិថិជនដ៏សំខាន់របស់ប្រទេសរុស្ស៊ីនៅក្នុងតំបន់ដើមបូព៌ា ទីក្រុងដាម៉ាសនាំចូលពីរុស្ស៊ីនូវរថក្រោះ កាំភ្លើងតូចធំនិងយន្តហោះប្រដេញ ហើយនៅសប្តាហ៍នេះទៀតទីក្រុងម៉ូស្គូបានបញ្ជាក់ទៀតថា គេនៅតែបន្តធ្វើការនាំចេញនូវសព្វាវុធលក់ទៅឲ្យប្រទេសស៊ីរី។

ពិសេសជាងនេះគឺប្រទេសរុស្ស៊ីនឹងពុំព្រមសោះឡើយឲ្យគេលូកដៃចូលទៅក្នុងបញ្ហាផ្ទៃក្នុងរបស់ប្រទេសស៊ីរីឬជំរុញដំណើរការប្រជាធិបតេយ្យនៅក្នុងប្រទេសនេះ។ ទាំងនេះបណ្តាលមកពីមូលហេតុអ្វី? ទាំងនេះក៏ពីព្រោះតែរដ្ឋអំណាចរុស្ស៊ីបច្ចុប្បន្នកំពុងត្រូវធ្វើការប្រឈមមុខទល់នឹងបាតុកម្មនិងការងើបប្រឆាំងបះបោរយ៉ាងខ្លាំងក្លានៅក្នុងប្រទេសរុស្ស៊ីក្រោមការដឹកនាំរបស់លោកមេដវេដេវនិងលោកពូទីន។

មូលហេតុអស់ទាំងនេះហើយដែលបានជំរុញឲ្យលោកប្រមុខការទូតរុស្ស៊ី Serguei Lavrov ថ្លែងប្រកាសហើយប្រកាសទៀតប្រឆាំងទល់នឹងការប្រើកម្លាំងយោធាដើម្បីធ្វើអន្តរាគមន៍ ហើយនិងរាល់សេចក្តីសម្រេចចិត្តដែលគ្រោងដាក់ទណ្ឌកម្មជាឯកតោភាគីទៅលើរបបគ្រប់គ្រងរបស់បាស្ហារអាល-អាស្សាដ ដែលទាំងនេះអាចនាំឲ្យឈានទៅរកសេណារីយោបែបលីប៊ី។

លោកប្រមុខការទូតរុស្ស៊ី Serguei Lavrov នៅតែបន្តមានជំនឿទៅលើការរិះរកដំណោះស្រាយនយោបាយដោយសន្តិវិធីនៅក្នុងវិបត្តិស៊ីរីដ៏ហិង្សានេះ។ គឺនៅក្នុងទស្សនវិស័យនេះហើយដែលលោកប្រមុខការទូតរុស្ស៊ីនឹងធ្វើដំណើរនៅថ្ងៃអង្គារខាងមុខទៅទីក្រុងដាម៉ាសដើម្បីចរចាជាមួយលោកប្រធានាធិបតីស៊ីរីបាស្ហារអាល-អាស្សាដ។

សម្រាប់ទីក្រុងប៉េកាំង ការប្រើសិទ្ធិវេតូប្រឆាំងទល់នឹងគម្រោងសេចក្តីសម្រេចិត្តរបស់ក្រុមប្រឹក្សាសន្តិសុខនៃអ.ស.ប.គឺធ្វើឡើងដើម្បីអនុញ្ញាតឲ្យមានការបន្តស្វែងរកដំណោះស្រាយឲ្យវិបត្តិស៊ីរីដោយសន្តិវិធី។ ទីភ្នាក់ងារព័ត៌មានផ្លូវការចិនឈ្មោះ “ចិនថ្មី”បានគូសបញ្ជាក់ទៀតថា "គេត្រូវការពេលវេលានិងអំណត់អត់ធន់ដើម្បីស្វែងរកដំណោះស្រាយនយោបាយដោយសន្តិវិធីឲ្យវិបត្តិស៊ីរី និងដើម្បីកុំឲ្យប្រជាជនស៊ីរីទទួលរងគ្រោះតទៅទៀត”។

សូមបញ្ជាក់ថា នេះជាលើកទីពីរហើយដែលទីក្រុងម៉ូស្គូនិងទីក្រុងប៉េកាំងបានប្រើសិទ្ធិវេតូប្រឆាំងទល់នឹងគម្រោងសេចក្តីសម្រេចចិត្តរបស់អ.ស.ប. ដើម្បីថ្កោលទោសទៅលើអំពើហិង្សានៃរបបគ្រប់គ្រងរបស់បាស្ហារអាល-អាស្សាដដែលបានបណ្តាលឲ្យប្រជាជនស៊ីរីប្រមាណ៦ពាន់នាក់ស្លាប់។

ឯកអគ្គរដ្ឋទូតជាច្រើនប្រទេសបារម្ភខ្លាចក្រែងការប្រើវេតូរបស់ប្រទេសរុស្ស៊ីនិងប្រទេសចិននេះ ធ្វើឲ្យប្រធានាធិបតីស៊ីរី បាស្ហារអាល-អាស្សាដ ភ័ន្តយល់ថា ជាការសញ្ញាភ្លើងខៀវអាចឲ្យរបបគ្រប់គ្រងស៊ីរីបច្ចុប្បន្នបន្តធ្វើការវាយបង្ក្រាបបាតុករកាន់តែខ្លាំងឡើងៗបន្ថែមទៀត។

សម្រាប់លោកស្រីប្រមុខការទូតអាមេរិក ហ៊ីឡារីគ្លីនតុន “ប្រទេសរុស្ស៊ីនិងប្រទេសចិនត្រូវមានការទទួលខុសត្រូវក្នុងការប្រើសិទ្ធិវេតូរបស់ខ្លួន ហើយបើគ្មានសកម្មភាពរួមគ្នាមួយរបស់សហគមន៍អន្តរជាតិទេ នោះខ្ញុំបារម្ភខ្លាចកើតមានសង្គ្រាមស៊ីវិលនៅក្នុងប្រទេសស៊ីរី”។

រីឯប្រមុខការទូតអង់គ្លេស លោក William Hague វិញបានថ្លែងថា “ទីក្រុងម៉ូស្គូនិងទីក្រុងប៉េកាំងជាអ្នកបានបោះបង់ប្រជាជនស៊ីរី ហើយនិងជាអ្នកគាំទ្ររបបគ្រប់គ្រងដ៏សាហាវរបស់បាស្ហារអាល-អាស្សាដ”។

ចំណែកឯលោកប្រធានាធិបតីបារាំងនីកូឡាសាកូហ្ស៊ីវិញបានថ្លែងព្រមាននៅល្ងាចថ្ងៃសៅរ៍ម្សិលមិញថា “ប្រទេសបារាំងពុំព្រមចុះញ៉មនឹងវេតូរបស់រុស្ស៊ីនិងចិនឡើយ។ ទីក្រុងប៉ារីសនឹងពិភាក្សាជាមួយប្រទេសជាដៃគូដើម្បីបង្កើតឲ្យមាន “ក្រុមប្រទេសមិត្តរបស់ប្រជាជនស៊ីរី”។

“ក្រុមប្រទេសមិត្តរបស់ប្រជាជនស៊ីរី”នេះ នឹងនាំមកនូវជំនួយពីសហគមន៍អន្តរជាតិ ដើម្បីសម្រេចឲ្យបាននូវគំនិតផ្តួចផ្តើមរបស់ក្រុមប្រទេសសម្ព័ន្ធអារ៉ាប់។ “ក្រុមប្រទេសសម្ព័ន្ធអារ៉ាប់” ដែលបានអនុម័តកាលពីថ្ងៃទី២២មករាកន្លងទៅនូវផែនការមួយដើម្បីបិទបញ្ចប់អំពើហិង្សានៅក្នុងប្រទេសស៊ីរី ជូនសំឡេងឲ្យប្រជាជនស៊ីរីអាចបញ្ចេញមតិរបស់ខ្លួនក្នុងការបោះឆ្នោតជ្រើសតាំងអ្នកដឹកនាំ ឲ្យប្រធានាធិបតីបាស្ហារអាល-អាស្សាដចាកចេញពីតំណែង ដោយរក្សាទុកនូវរចនាសម្ព័ន្ធរបស់រដ្ឋ ដើម្បីបញ្ចៀសកុំឲ្យប្រទេសស៊ីរីធ្លាក់ទៅក្នុងសង្គ្រាមស៊ីវិល។

ពិតមែនដែលការរិះរកដំណោះស្រាយឲ្យវិបត្តិស៊ីរីតាមរយៈអ.ស.ប.នៅតែគាំងស្ទះមកទល់ពេលនេះមានរយៈពេលជិតមួយឆ្នាំហើយ បើអ្នកប្រឆាំងស៊ីរីមានលទ្ធភាពផ្សេងទៀត ក្រៅពីសេចក្តីសម្រេចចិត្តរបស់អ.ស.ប. នោះពួកគេច្បាស់ជាយកលទ្ធភាពនោះមកប្រើហើយ គេពុំឲ្យខាតពេលវេលាដល់ទៅជិត១ឆ្នាំ ហើយនិងបានបណ្តាលឲ្យមានប្រជាជនស៊ីរីស្លាប់ដល់ទៅ៦ ០០០នាក់នោះទេ។

យើងក្រឡេកទៅមើលស្ថានភាពរបស់ប្រទេសស៊ីរី។ ប្រទេសជិតខាងរបស់ស៊ីរីមាន៖ ប្រទេសតួកគី លីបង់ អ៊ីស្រាអែល អ៊ីរ៉ង់ អ៊ីរ៉ាក់ និងប្រទេសហ្សកដានី។ ក្នុងចំណោមប្រទេសទាំងនោះ ប្រទេសប្រឆាំងរបបគ្រប់គ្រងស៊ីរីបាស្ហារអាល-អាស្សាដ ហើយមានលទ្ធភាពជាងគេគឺ ប្រទេសតួកគី ដែលជាសមាជិកនៃបក្សសម្ព័ន្ធអូតង់ ពុំអាចធ្វើអន្តរាគមន៍អ្វីកើតឡើយ បើគ្មានសេចក្តីសម្រេចចិត្តរបស់អ.ស.ប.អនុញ្ញាតឲ្យចូលធ្វើអន្តរាគមន៍នៅក្នុងប្រទេសស៊ីរីទេនោះ។ ប្រទេសអ៊ីស្រាអែលវិញ ជាសត្រូវសួពូជរបស់ប្រទេសអារ៉ាប់ រិតតែគ្មានលទ្ធភាពទៅទៀត។ ងាកទៅមើលប្រទេសអ៊ីរ៉ាក់ គេកំពុងតែត្រូវដោះស្រាយវិបត្តិដ៏វឹកវរផ្ទៃក្នុងរបស់គេ។ ប្រទេសលីបង់និងប្រទេសហ្សកដានីជាប្រទេសតូចតាច។ នៅសល់តែប្រទេសអ៊ីរ៉ង់ ក៏ប៉ុន្តែអ៊ីរ៉ង់ជាប្រទេសមិត្តរបស់របបគ្រប់គ្រងផ្តាច់ការបាស្ហារអាល-អាស្សាដ។

ដូច្នេះ ឃើញថាគេគ្មានជម្រើសអ្វីក្រៅតែពីខិតខំបញ្ចុះបញ្ចូលឬដាក់សម្ពាធទៅលើប្រទេសរុស្ស៊ីនិងប្រទេសចិនឲ្យប្តូរប្រែឥរិយាបថ ឈប់ប្រើវេតូហើយងាកមកគាំទ្រគម្រោងសេចក្តីសម្រេចចិត្តរបស់អ.ស.ប.ឡើយ៕