ប្រទេសភូមាបដិសេធថាពុំបានរកបង្កើតអាវុធនុយក្លេអ៊ែរតាមរយៈជំនួយកូរ៉េខាងជើងឡើយ
លោកប្រធានាធិបតី ថេន សេន បានបដិសេធជាថ្មីម្តងទៀតថា ប្រទេសភូមាពុំបានរិះរកបង្កើតអាវុធនុយក្លេអ៊ែរតាមរយៈជំនួយកូរ៉េខាងជើង ដូចការសង្ស័យរបស់ប្រទេសលោកខាងលិចមួយចំនួននោះឡើយ។ នេះជាការឆ្លើយបដិសេធរបស់លោក ថេន សេន នៅថ្ងៃអង្គារនេះ នាឱកាសទស្សនកិច្ចជាផ្លូវការនៅសិង្ហបុរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
“យើងពុំបានទិញសព្វាវុធនុយក្លេអ៊ែរពីប្រទេសកូរ៉េខាងជើងឡើយ”។ នេះជាការថ្លែងអះអាងដោយលោកប្រធានាធិបតីភូមា ថេន សេននៅក្នុងសារព័ត៌មានសិង្ហបុរីឈ្មោះ “The Straits Times”។ លោក ថេន សេន បានថ្លែងបន្ថែមទៀតថា “ការចោទប្រកាន់របស់លោកខាងលិចគឺជាការចោទប្រកាន់ដែលគ្មានមូលដ្ឋានត្រឹមត្រូវ”។
គួរបញ្ជាក់ថា សហគមន៍អន្តរជាតិបារម្ភពីទំនាក់ទំនងរវាងទីក្រុងព្យុងយ៉ាងនិងទីក្រុង Naypyidaw ជាពិសេសពាក់ព័ន្ធនឹងបញ្ហាកម្មវិធីនុយក្លេអ៊ែរ ទោះបីជាអ្នកដឹកនាំភូមាខិតខំថ្លែងអះអាងយ៉ាងណាក៏ដោយ។
នាឱកាសទស្សនកិច្ចជាប្រវត្តិសាស្ត្រនៅប្រទេសភូមានៅដើមខែធ្នូកន្លងទៅនេះ លោកស្រីគ្លីនតុនរដ្ឋមន្ត្រីក្រសួងការបរទេសអាមេរិកបានទាមទារឲ្យរបបគ្រប់គ្រងភូមាបច្ចុប្បន្នកាត់ផ្តាច់ "ទំនាក់ទំនងមិនស្របច្បាប់" ជាមួយប្រទេសកូរ៉េខាងជើង។
លោកស្រីគ្លីនតុនបានថ្លែងបញ្ជាក់ទៀតថា លោកស្រីទទួលបានការធានាអះអាងដ៏ជាក់ច្បាស់ពីលោកប្រធានាធិបតីភូមា ថេន សេន ស្ដីពីការគោរពពាក្យសន្យារបស់ប្រទេសភូមាពាក់ព័ន្ធនឹងបញ្ហាមិនសាយភាយអាវុធនុយក្លេអ៊ែរហើយនិងការគោរពសេចក្តីសម្រេចចិត្តរបស់ក្រុមប្រឹក្សាសន្តិសុខនៃអង្គការសហប្រជាជាតិដែលបានហាមឃាត់ពុំឲ្យប្រទេសកូរ៉េខាងជើងនាំអាវុធចេញទៅលក់ក្រៅប្រទេស។
សូមបញ្ជាក់ថា នៅក្នុងរបាយការណ៍មួយរបស់អ.ស.ប.នៅឆ្នាំ២០១០បានចោទប្រទេសកូរ៉េខាងជើងថា ជាអ្នកបានផ្តល់អាវុធនុយក្លេអ៊ែរឲ្យប្រទេសអ៊ីរ៉ង់ ស៊ីរី និងប្រទេសភូមា។
ហើយនាឱកាសទស្សនកិច្ចជាផ្លូវការបួនថ្ងៃនៅសិង្ហបុរី លោកប្រធានាធិបតីភូមា ថេន សេន បានសន្យាថា “នឹងបង្កើតឲ្យមានលទ្ធិប្រជាធិបតេយ្យដ៏រឹងមាំមួយនៅប្រទេសភូមា"។ អ្នកដឹកនាំភូមាចង់ឲ្យប្រជាជនចូលរួមចំណែកដ៏សំខាន់ក្នុងអភិក្រមធ្វើកំណែទម្រង់ប្រជាធិបតេយ្យ ហើយនិងចង់ឲ្យលទ្ធិប្រជាធិបតេយ្យរីកចម្រើននៅក្នុងប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ