សហភាពអឺរ៉ុបគ្រោងចាប់លើកចេញទណ្ឌកម្មឲ្យប្រទេសភូមានៅខែកុម្ភៈខាងមុខនេះ
សហភាពអឺរ៉ុបកំពុងពិនិត្យមើលពីការសម្រាលទណ្ឌកម្មឲ្យប្រទេសភូមានៅខែកុម្ភៈខាងមុខនេះ ហើយនិងគ្រោងផ្តល់ជំនួយសេដ្ឋកិច្ចដើម្បីធ្វើការស្វាគមន៍ដល់កំណែទម្រង់ដោយរដ្ឋាភិបាលភូមា។ ក៏ប៉ុន្តែដំណើរការនេះបានបង្កឲ្យកើតមានកិច្ចចរចានៅក្នុងរង្វង់ប្រទេសសមាជិកនៃសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ទស្សនកិច្ចរបស់ប្រមុខការទូតនៃសហភាពអឺរ៉ុបលោកស្រី Catherine Ashton នៅទីក្រុង Naypidaw រដ្ឋធានីថ្មីនៃប្រទេសភូមាប្រហែលជាអាចប្រព្រឹត្តទៅនៅពេលឆាប់ៗខាងមុខនេះ ទោះបីជា លោកស្រី Catherine Ashton មានកិច្ចការមមាញឹកយ៉ាងណាក៏ដោយ។
កិច្ចការទាំងនេះគ្រោងលើកយកមកពិភាក្សានាឱកាសជំនួបរដ្ឋមន្ត្រីក្រសួងការបរទេសនៃសហភាពអឺរ៉ុបនៅថ្ងៃចន្ទខាងមុខនេះនៅទីក្រុងព្រុចសែល ហើយសេចក្តីសម្រេចចិត្តពាក់ព័ន្ធនឹងការលើកចេញនូវទណ្ឌកម្មមួយចំនួនឲ្យប្រទេសភូមាប្រហែលជាអាចកើតមាននៅខែកុម្ភៈឆ្នាំ២០១២។
ចំណែកឯរដ្ឋមន្ត្រីក្រសួងការបរទេសបារាំងនិងអង់គ្លេស លោក Alain Juppé និងលោក William Hague ចង់ស្នើនៅថ្ងៃចន្ទខាងមុខនេះឲ្យមាន “ការសើរើមើលឡើងវិញបន្តិចម្តងៗ” ពីទណ្ឌកម្មដែលបានដាក់ទៅលើប្រទេសភូមា។ នេះជាការថ្លែងឲ្យដឹងដោយអ្នកនាំពាក្យនៃក្រសួងការបរទេសបារាំងលោក Bernard Valero។
គួរកត់សម្គាល់ថា រដ្ឋមន្ត្រីក្រសួងការបរទេសបារាំងនិងអង់គ្លេស លោក Alain Juppé និងលោក William Hague ដែលបានអញ្ជើញទៅប្រទេសភូមានៅពេលថ្មីៗកន្លងទៅនេះ បានថ្លែងថា « សហភាពអឺរ៉ុបត្រូវតែមានការប្រុងប្រយ័ត្ន”។
រីឯប្រទេសអឺរ៉ុបខាងជើងមួយចំនួនវិញ បានស្នើឲ្យមានការប្រយ័ត្នប្រយែងមែនទែន ដោយសង្កត់ធ្ងន់ទៅលើការចាំបាច់ក្នុងការគោរពសិទ្ធិសេរីភាពក្នុងការបញ្ចេញមតិ ហើយនិងការដោះលែងអ្នកទោសនយោបាយ។
សម្រាប់សហភាពអឺរ៉ុប ការបោះឆ្នោតសភាមួយភាគដែលគ្រោងរៀបចំធ្វើនៅថ្ងៃទី១កុម្ភៈគឺពិតជា test មួយដ៏សំខាន់សម្រាប់បញ្ជាក់បង្ហាញឲ្យឃើញពីសុឆន្ទៈរបស់រដ្ឋាភិបាលភូមា។ ដូច្នេះ ការបោះឆ្នោតសភានៅថ្ងៃទី១កុម្ភៈខាងមុខនេះត្រូវតែប្រព្រឹត្តទៅក្នុងលក្ខណៈ “ត្រឹមត្រូវ សេរី និងយុត្តិធម៌”។នេះជាការគូសបញ្ជាក់របស់អ្នកការទូតអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ