តំណាងនៃប្រទេសចិនជួបលោកស្រីប្រមុខបក្សប្រឆាំងភូមា
លោកឯកអគ្គរដ្ឋទូតចិនប្រចាំនៅភូមាបានជួបជាមួយលោកស្រីប្រមុខបក្សប្រឆាំងភូមាអ៊ុង សាន់ស៊ូជី។ ត៌មាននេះត្រូវបានក្រសួងការបរទេសចិនទម្លាយឲ្យដឹងនៅថ្ងៃព្រហស្បតិ៍ទី១៥ធ្នូនេះ។ តែគេមិនដឹងទេថា ជំនួបប្រាស្រ័យនេះបានប្រព្រឹត្តទៅនៅពេលណា។
ចុះផ្សាយនៅថ្ងៃ៖
ស្តាប់ - ០១:៤២
គឺជាលើកទីមួយបង្អស់ហើយ ដែលអ្នកតំណាងនៃប្រទេសចិន គឺលោកឯកអគ្គរដ្ឋទូតចិនប្រចាំនៅប្រទេសភូមាជួបជាមួយលោកស្រីប្រមុខបក្សប្រឆាំងភូមា អ៊ុង សាន់ស៊ូជី។ ជំនួបនេះ ត្រូវបានអ្នកនាំពាក្យនៃក្រសួងការបរទេសចិនបង្ហើបឲ្យដឹង នៅព្រឹកថ្ងៃព្រហស្បតិ៍ទី១៥ធ្នូនេះ។អ្នកនាំពាក្យនៃក្រសួងការបរទេសចិន បានគូសបញ្ជាក់ថា ឯកអគ្គរដ្ឋទូតចិនបានជួបលោកស្រីអ៊ុង សាន់ស៊ូជី ស្របទៅតាមការស្នើសុំជាច្រើនលើកច្រើនសារបស់លោកស្រី និងថាជំនួបប្រាស្រ័យនេះ មិនមែនបានន័យថា ចិនជ្រៀតជ្រែកក្នុងបញ្ហាផ្ទៃក្នុងរបស់ភូមាទេ។
យ៉ាងណាក៏ដោយ ជំនួបនេះរវាងអ្នកតំណាងនៃប្រទេសចិននិងលោកស្រីជ័យលាភីរង្វាន់ណូបែលសន្តិភាពជាព្រឹត្តិការណ៍មួយសំខាន់ ពីព្រោះរហូតមកទល់ពេលនេះ ថ្នាក់ដឹកនាំចិនមិនដែលព្រមជួបប្រមុខបក្សប្រឆាំងភូមាទេ។ តាមមើលទៅ ជំនួបនេះមិនមែនជារឿងចៃដន្យទេ ត្បិតវាបានប្រព្រឹត្តទៅ ក្រោយពីមានទស្សនកិច្ចជាប្រវត្តិសាស្រ្តនៅប្រទេសភូមារបស់លោកស្រីរដ្ឋមន្ត្រីការបរទេសអាមេរិកាំងហ៊ីឡារី គ្លីនតុន កន្លងទៅថ្មីៗនេះ។ ដូចគ្នាអ៊ីចឹងដែរ នៅសប្តាហ៍ក្រោយនេះ អ្នកទទួលខុសត្រូវជាន់ខ្ពស់មួយរូបនៃក្រសួងការបរទេសចិន នឹងទៅបំពេញទស្សនកិច្ចនៅភូមាហើយក៏អាចនឹងជួបប្រាស្រ័យជាមួយលោកស្រីអ៊ុងសាន់ស៊ូជីដែរ។
សូមជម្រាបថា មកទល់ពេលនេះ ភូមារកស៊ីសឹងផ្តាច់មុខតែជាមួយប្រទេសចិនប៉ុណ្ណោះហើយទំនាក់ទំនងដ៏ល្អបែបនេះជាមួយប្រទេសចិន បានជួយកាត់បន្ថយមិនតិចទេផលវិបាកនៃទណ្ឌកម្មពីសំណាក់លោកខាងលិច។ ទើបតែថ្មីៗនេះ សហរដ្ឋអាមេរិកបានសម្រេចចិត្តបន្ទន់ឥរិយាបថបន្តិចមកវិញ នៅចំពោះមុខរបបផ្តាច់ការភូមាដែលបានផ្តើមធ្វើកំណែទម្រង់នយោបាយជាក់ស្តែង តាមរយៈការផ្តល់សេរីភាពទៅឲ្យលោកស្រីអ៊ុង សាន់ ស៊ូជី និងទៅឲ្យអ្នកទោសនយោបាយជាច្រើនសិបនាក់ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ