វៀតណាម -

អត្ថបទចុះផ្សាយនៅថ្ងៃ សុក្រ 18 វិច្ឆិកា 2011 - ព័ត៌មានទើបកែប្រើលើកចុងក្រោយ ថ្ងៃ សុក្រ 18 វិច្ឆិកា 2011

អ្នកកាន់សាសនាកាតូលិកវៀតណាមធ្វើបាតុកម្មទាមទារឲ្យអាជ្ញាធរប្រគល់សងដីឲ្យពួកគេវិញ

លោកនាយករដ្ឋមន្ត្រីវៀតណាម Nguyen Tan Dung

ដោយ សៀក សារិន

នៅថ្ងៃសុក្រទី១៨វិច្ឆិកាឆ្នាំ២០១១នេះ អ្នកកាន់សាសនាកាតូលិកវៀតណាមប្រមាណ១០០ប្លាយនាក់បាននាំគ្នាធ្វើបាតុកម្មនៅទីក្រុងហាណូយ ដើម្បីទាមទារឲ្យអាជ្ញាធរប្រគល់សងដីឲ្យពួកគេវិញ។ ដីមួយកន្លែងដែលអ្នកកាន់សាសនាកាតូលិកបានតវ៉ាទាមទារជាយូរយារមកហើយ។

សេចក្តីរាយការណ៍របស់ សៀក សារិន

ស្តាប់ (01:30)

18/11/2011 by សៀក សារិន

ភាពតានតឹងបានផ្ទុះកើតឡើងនៅល្ងាចថ្ងៃពុធកន្លងទៅរវាងបព្វជិតកាតូលិកនិងរដ្ឋអំណាចកុម្មុយនិស្តវៀតណាម ដោយហេតុតែមានការសាងសង់ស្ថាបនាអាងដ៏ធំមួយសម្រាប់សម្អាតទឹកកខ្វក់នៅលើដីមួយកន្លែងដែលតវ៉ាទាមទារដោយអ្នកកាន់សាសនាកាតូលិកវៀតណាម។

នៅថ្ងៃសុក្រនេះ ក្រុមបាតុករដែលអ្នកខ្លះប្រកបដោយសម្លៀកបំពាក់ជាអ្នកកាន់សាសនាកាតូលិក បាននាំគ្នាលើកបដាដែលមានសរសេរដាក់ថា “ត្រូវសងដីប្រគល់ឲ្យទៅវិហារកាតូលិកវិញ”។ ពួកគេបាននាំគ្នាស្រែកច្រៀងនិងដង្ហែរជាក្បួនដោយសន្តិភាពនៅជុំវិញបឹង Hoan Kiem ដែលជាទីកន្លែងកម្សាន្តឋិតនៅកណ្តាលទីក្រុងហាណូយ មុននឹងដង្ហែរទៅកាន់វិហារកាតូលិក។

គួរកត់សម្គាល់ថា ធ្វើបាតុកម្មនៅប្រទេសវៀតណាមកុម្មុយនិស្តគឺជារឿងមួយដ៏កម្រមាន។ បាតុករម្នាក់បានថ្លែងប្រាប់អ្នកកាសែតថា ពួកគេបានបញ្ជូនលិខិតជាផ្លូវការទាមទារឲ្យអាជ្ញាធរនៃទីក្រុងហាណូយប្រគល់សងដីនោះមកឲ្យវិហារកាតូលិកវិញ។ ដីមួយកន្លែងនោះដែលអាជ្ញាធរវៀតណាមត្រូវសាងសង់ជាមន្ទីរពេទ្យដែលកាលពីដើមធ្លាប់ជាវិហារកាតូលិក។ ដីមួយកន្លែងនេះធ្លាប់បានក្លាយជាមូលហេតុនៃការធ្វើបាតុកម្មនៅឆ្នាំ២០០៨ម្តងរួចទៅហើយ។

សូមបញ្ជាក់ថា ក្រោយពីបានទទួលឯករាជ្យនៅឆ្នាំ១៩៥៤ រដ្ឋអំណាចកុម្មុយនិស្តវៀតណាមបានធ្វើការរិបអូសយកដីធ្លីជាច្រើនរបស់វិហារកាតូលិក។ ទាំងនេះបានបណ្តាលឲ្យកើតមានអធិករណ៍រវាងទីក្រុងហាណូយនិងបុរីវ៉ាទីកង់ដែលគ្មានទំនាក់់ទំនងទូតនឹងគ្នា ក៏ប៉ុន្តែភាគីទាំងពីរបានធ្វើការចរចាគ្នាអស់រយៈពេលជាច្រើនឆ្នាំមកហើយ នៅប៉ុន្មានឆ្នាំចុងក្រោយនេះ៕