សហរដ្ឋអាមេរិក-អូស្ត្រាលី -

អត្ថបទចុះផ្សាយនៅថ្ងៃ ពុធ 16 វិច្ឆិកា 2011 - ព័ត៌មានទើបកែប្រើលើកចុងក្រោយ ថ្ងៃ ពុធ 16 វិច្ឆិកា 2011

លោកអូបាម៉ាទៅអូស្ត្រាលីដើម្បីរឹតចំណងសហប្រតិបត្តិការយោធាប្រឈមទល់នឹងប្រទេសចិន

លោក Obama នៅលើយន្តហោះ Air Force ធ្វើដំណើរទៅប្រទេសអូស្ត្រាលីនៅថ្ងៃទី១៥វិច្ឆិកាឆ្នាំ២០១១2011.

Reuters/Jason Reed

ដោយ សៀក សារិន

លោកបារ៉ាក់អូបាម៉ាអញ្ជើញទៅបំពេញទស្សនកិច្ចនៅប្រទេសអូស្ត្រាលីនៅថ្ងៃពុធទី១៦វិច្ឆិកាឆ្នាំ២០១១។ ជាលើកទីមួយហើយក្នុងអាណត្តិប្រធានាធិបតីរបស់លោកដែលលោកអូបាម៉ាអញ្ជើញទៅប្រទេសអូស្ត្រាលី។ អូស្ត្រាលីគឺជាសម្ព័ន្ធមិត្តដែលលោកអូបាម៉ាចង់រឹតចំណងសហប្រតិបត្តិការយោធាបន្ថែមទៀតដើម្បីធ្វើការប្រឈមទល់នឹងមហិច្ឆតាតំបន់របស់ប្រទេសចិន។ ទស្សនកិច្ចនេះក៏ចង់គូសបញ្ជាក់ឲ្យឃើញនូវខួបឆ្នាំទី៦០នៃសម្ព័ន្ធភាពរវាងប្រទេសទាំងពីរ ហើយក៏ជាឱកាសសម្រាប់ប្រកាសឲ្យដឹងពីការពង្រឹងវត្តមានយោធាអាមេរិកនៅប្រទេសអូស្ត្រាលីដែរ។

សេចក្តីរាយការណ៍របស់ សៀក សារិន

ស្តាប់ (02:07)

16/11/2011 by សៀក សារិន

លោកប្រធានាធិបតីអាមេរិកបារ៉ាក់អូបាម៉ាដែលតែងស្រឡាញ់ទីក្រុង Sydney កាលលោកនៅមានវ័យក្មេង។ លើកនេះ លោកគ្មានពេលវេលានឹងអញ្ជើញទៅទីក្រុង Sydney ឡើយ។ ដោយហេតុថា ក្រោយពីរដ្ឋធានី Canberra លោកអូបាម៉ាត្រូវអញ្ជើញទៅប៉ែកខាងជើងនៃប្រទេសអូស្ត្រាលីដើម្បីថ្លែងទៅកាន់កងទ័ពអូស្ត្រាលីថា សហរដ្ឋអាមេរិកនិងប្រទេសអូស្ត្រាលីត្រូវពង្រឹងពង្រីកសហប្រតិបត្តិការយោធា ដែលនឹងអនុញ្ញាតឲ្យកងទ័ពអាមេរិកាំងយកមូលដ្ឋានយោធានៅ Darwin ធ្វើជាមជ្ឈមណ្ឌលសម្រាប់បង្ហាត់ហ្វឹកហ្វឺន។

ប្រទេសអូស្ត្រាលីជាសម្ព័ន្ធមិត្តរបស់សហរដ្ឋអាមេរិកហើយក៏ជាដៃគូពាណិជ្ជកម្មដ៏សំខាន់របស់ប្រទេសចិនផងដែរ។ ក៏ប៉ុន្តែ សំណួរមួយចោទសួរថា “តើទីក្រុងប៉េកាំងចាត់ទុកមជ្ឈមណ្ឌលសម្រាប់បង្ហាត់ហ្វឹកហ្វឺននៅ Darwin ថាជាចំណែកមួយនៃយុទ្ធសាស្ត្ររបស់អាមេរិកសម្រាប់ឡោមព័ទ្ធប្រទេសចិនឬយ៉ាងណា?”។ កាលពីមុន ទីក្រុងប៉េកាំងធ្លាប់បានកាត់បន្ថយទំនាក់ទំនងសេដ្ឋកិច្ចនៅពេលដែលចិនពុំសប្បាយពេញចិត្ត។ ប៉ុន្តែ លើកនេះប្រទេសចិននៅរង់ចាំមើលថា “តើមូលដ្ឋានយោធានៅ Darwin គ្រាន់តែជាមជ្ឈមណ្ឌលសម្រាប់បង្ហាត់ហ្វឹកហ្វឺន ឬ សម្រាប់អាមេរិកយកគ្រឿងសម្ភារៈមកស្តុកទុកប៉ុណ្ណោះឬយ៉ាងណា?”។

ក៏ប៉ុន្តែ នាឱកាសទស្សនកិច្ចរបស់លោកអូបាម៉ា នៅថ្ងៃពុធនេះ លោកស្រីនាយករដ្ឋមន្ត្រីអូស្ត្រាលីបានប្រកាសប្រាប់ថា “សហរដ្ឋអាមេរិកនឹងដាក់ពង្រាយទាហានម៉ារីនប្រមាណ២៥០នាក់នៅប៉ែកខាងជើងនៃប្រទេសអូស្ត្រាលីចាប់ពីពាក់កណ្តាលឆ្នាំ២០១២ទៅ។

ទាំងនេះបានបណ្តាលឲ្យអ្នកនាំពាក្យនៃក្រសួងការបរទេសចិនលោក Liu Weimin ថ្លែងប្រកាសថា “ការពង្រឹងពង្រីកសម្ព័ន្ធយោធានៅពេលនេះពុំសមស្របនឹងកាលទេសៈឡើយ ហើយវាក៏ខុសផ្ទុយពីផលប្រយោជន៍របស់តំបន់ផងទៀត”។

ភ្លាមភ្លែត សហរដ្ឋអាមេរិកក៏បានបដិសេធប្រតិកម្មរបស់ទីក្រុងប៉េកាំងនៅថ្ងៃពុធនេះ ដោយបានថ្លែងថា “ការពង្រឹងវត្តមានយោធាអាមេរិកនៅអូស្ត្រាលីគឺជាវិធានការត្រឹមត្រូវសមស្របតាមកាលទេសៈ”។

គួរកត់សម្គាល់ថា ទាំងនេះធ្លាក់ចំពេលដែលសហរដ្ឋអាមេរិកកំពុងរៀបចំដកទ័ពចេញពីប្រទេសអ៊ីរ៉ាក់និងប្រទេសអាហ្វហ្កានីស្ថាន ហើយត្រូវធ្វើការប្រឈមតទល់នឹងមហិច្ឆតាយោធាដែលកើនកាន់តែខ្លាំងឡើងៗរបស់ប្រទេសចិន។ កត្តាទាំងនេះហើយដែលនាំឲ្យលោកប្រធានាធិបតីបារ៉ាក់អូបាម៉ាបង្វែរនយោបាយសន្តិសុខអាមេរិកាំងងាកទៅរកតំបន់អាស៊ី៕