Delicious
Digg
Facebook
Twitter
Yahoo!
Technorati
សុក្រ 12 សីហា 2011
ប្រេងឆៅចុះថ្លៃជាឱកាសល្អសម្រាប់សេដ្ឋកិច្ចពិភពលោក
“OPEP” អង្គការនាំប្រេងឆៅចេញទៅលក់ក្រៅប្រទេស
© Reuters
ការធ្លាក់ស្រុតចុះនៃតម្លៃប្រេងឆៅបាននាំឲ្យសេដ្ឋកិច្ចពិភពលោក មានក្តីសង្ឃឹមបន្តិចឡើងវិញ។ សេដ្ឋកិច្ចពិភពលោកដែលបានឆ្លងកាត់ពពកដ៏ខ្មៅងងឹតនៃវិបត្តិ ហិរញ្ញវត្ថុនិងវិបត្តិសេដ្ឋកិច្ចពុំចេះឈប់ឈរនារយៈពេលប៉ុន្មានឆ្នាំ ចុងក្រោយនេះ។
តម្លៃប្រេងឆៅ១២៦ដុល្លារ៧៦សេនក្នុង១បារីលកាលនៅថ្ងៃទី៨មេសាឆ្នាំ២០១១ ឥឡូវនេះបានធ្លាក់មកនៅប្រមាណ១០២ដុល្លារនារយៈពេលប៉ុន្មានថ្ងៃចុងក្រោយនេះ។
តម្លៃប្រេងឆៅអាចមានឥទ្ធិពលខ្លាំងក្នុងការជួយរក្សាឲ្យមាន “ស្ថិរភាព” ជាពិសេសក្នុងខណៈពេលដែលហិរញ្ញវត្ថុនិងសេដ្ឋកិច្ចពិភពលោកកំពុងជួបនឹងស្ថានភាពរំជើបរំជួលពុំចេះចប់។
គួរកត់សម្គាល់ថា នៅខណៈពេលដែលសេដ្ឋកិច្ចពិភពលោកមានកំណើនស្ទុះលឿនទៅមុខ តម្លៃប្រេងឆៅក៏កើនឡើងថ្លៃទៅតាមសន្ទុះនៃការនាំប្រេងឆៅចូលដោយប្រទេសឧស្សាហកម្មដែរ។ ហើយតម្លៃប្រេងឆៅខ្ពស់វាក៏ជាកត្តាអវិជ្ជមានមួយមកធ្វើការកាត់បន្ថយ “អំណាចទិញ”ផងដែរ។ បើគ្មានកំណើនអំណាចទិញ វាក៏គ្មានដែរកំណើនសេដ្ឋកិច្ច។
ដូច្នេះ ការធ្លាក់ស្រុតចុះនៃតម្លៃប្រេងឆៅគឺពិតជាឱកាសមួយដ៏ល្អសម្រាប់សេដ្ឋកិច្ចនៃប្រទេសឧស្សាហកម្មក៏ដូចជាសម្រាប់ប្រទេសកំពុងអភិវឌ្ឍន៍ ហើយនិងសម្រាប់សេដ្ឋកិច្ចពិភពលោកទាំងមូល។
ប្រឈមមុខទល់នឹងការគំរាមទៅលើសេដ្ឋកិច្ចពិភពលោកដោយដំណើរសេដ្ឋកិច្ចដើរថយក្រោយ ការធ្លាក់ស្រុតចុះនៃតម្លៃប្រេងឆៅគឺពិតជាកត្តាដ៏វិជ្ជមានមកជួយដល់រដ្ឋអំណាចដែលកំពុងជួបនឹងកង្វះវិធានការគ្រប់គ្រាន់សម្រាប់ប្រយុទ្ធប្រឆាំងទប់ទល់នឹងវិបត្តិហិរញ្ញវត្ថុនិងវិបត្តិសេដ្ឋកិច្ចពិភពលោក។
សម្រាប់មហាអំណាចសេដ្ឋកិច្ចទី១ពិភពលោកដូចជាសហរដ្ឋអាមេរិកដែលត្រូវការនាំចូលប្រេងឆៅយ៉ាងច្រើនលើសលុបសម្រាប់ឧស្សាហកម្មរបស់ខ្លួនក៏ដូចជាសម្រាប់ប្រជាជនអាមេរិក ការធ្លាក់ស្រុតចុះនៃតម្លៃប្រេងឆៅអាចធ្វើឲ្យសេដ្ឋកិច្ចអាមេរិកសន្សំសំចៃបានប្រមាណ៧៥ពាន់លានដុល្លារ។ នេះបើយោងតាមការវិភាគរបស់ធនាគារ Deutsch Bank។
នៅប្រទេសឯទៀតៗក្នុងលោក អ្នកដឹកនាំកំពុងលួចញញឹមពេញចិត្តដោយឃើញតម្លៃប្រេងឆៅចុះថ្លៃ។ ដោយហេតុថា ការស្ទុះកើនឡើងនៃតម្លៃវត្ថុធាតុដើម ជាពិសេសតម្លៃប្រេងឆៅបានបង្កនាំឲ្យមានបញ្ហាទំនិញឡើងថ្លៃ ដូចជានៅប្រទេសចិនបច្ចុប្បន្ននេះដែលកំពុងជួបនឹងបញ្ហាទំនិញឡើងថ្លៃយ៉ាងខ្លាំង។ អត្រាអតិផរណានៅប្រទេសចិនឥឡូវនេះមានដល់ទៅ៦,៥%។ ចំណែកឯប្រទេសប្រេស៊ីលក៏ដូចជាប្រទេសឥណ្ឌា ពួកគេក៏គេចពុំរួចពីបញ្ហាទំនិញឡើងថ្លៃដូចគ្នាអ៊ីចឹងដែរ។ ហេតុដូច្នេះហើយបានជាធនាគារកណ្តាលនៃប្រទេសទាំងនោះបាននាំគ្នាដំឡើងអត្រាការប្រាក់នាំមុខ ដើម្បីធ្វើការប្រយុទ្ធទប់ទល់នឹងបញ្ហាទំនិញឡើងថ្លៃ។ ក៏ប៉ុន្តែអត្រាការប្រាក់ខ្ពស់គឺពិតជាកត្តាដ៏អវិជ្ជមានសម្រាប់ជំរុញឲ្យមានសន្ទុះកំណើនសេដ្ឋកិច្ច។
ដូច្នេះ បើប្រសិនជាតម្រូវការប្រេងឆៅធ្លាក់ស្រុតចុះដូចការប្រមាណទុក នោះតម្លៃប្រេងឆៅច្បាស់ជាបន្តធ្លាក់ស្រុតចុះបន្ថែមទៀត។ “OPEP”អង្គការនាំប្រេងឆៅចេញទៅលក់ក្រៅប្រទេសពុំពេញចិត្តសោះឡើយ នៅពេលឃើញតម្លៃប្រេងឆៅធ្លាក់ស្រុតចុះបែបនេះ។ “OPEP”ដែលក្តោបក្តាប់បានប្រមាណ៤០%នៃផលិតផលប្រេងឆៅសរុបក្នុងលោក ច្បាស់ជារិះរកធ្វើការកាត់បន្ថយបរិមាណនៃផលិតផលរបស់ខ្លួនដើម្បីរក្សាកុំឲ្យតម្លៃប្រេងឆៅធ្លាក់ស្រុតចុះទៀត។
ក៏ប៉ុន្តែ មុននឹងឈានដល់ដំណាក់ការនេះ តម្លៃប្រេងអាចនឹងបន្តធ្លាក់ស្រុតចុះទៀត។ ទោះបីជាប្រទេសអារ៉ាប៊ីសាអ៊ូឌីតជាប្រទេសផលិតប្រេងឆៅធំជាងគេក្នុងលោក ដែលកំពុងតែត្រូវធ្វើការចំណាយសាធារណៈយ៉ាងច្រើនមហិមា ដើម្បីទប់ទល់នឹងការពុំសប្បាយចិត្តរបស់ពួកអ្នកប្រឆាំង។ ប្រទេសអារ៉ាប៊ីសាអ៊ូឌីតអាចធ្វើឲ្យថវិកាជាតិរបស់ខ្លួនមាន “តុល្យភាព” ដោយតម្រូវឲ្យតម្លៃប្រេងឆៅឋិតនៅចន្លោះ៨០-៨៥ដុល្លារក្នុង១បារីល។ នេះជាការប៉ាន់ប្រមាណរបស់ Deutsch Bank។
សូមបញ្ជាក់ថា ដោយមានកង្វះសន្ទុះកំណើនសេដ្ឋកិច្ចនៅក្នុងប្រទេសឧស្សាហកម្ម តម្លៃប្រេងឆៅក្នុងរង្វង់៨០ដុល្លារមួយបារីលនៅតែជាតម្លៃមួយដ៏ខ្ពស់ ដើម្បីជាបច្ច័យជួយបន្ធូរសម្រាលសម្ពាធនៃវិបត្តិហិរញ្ញវត្ថុនិងវិបត្តិសេដ្ឋកិច្ចពិភពលោក៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
