នៅឆ្នាំ២០៥០អាស៊ីនឹងមានសម្បត្តិទ្រព្យសម្បូណ៌រុងរឿងដូចអឺរ៉ុប
អាស៊ីអាចនឹងមានសម្បត្តិទ្រព្យសម្បូណ៌រុងរឿងដូចអឺរ៉ុបនៅរវាងឆ្នាំ២០៥០ខាងមុខ ក៏ប៉ុន្តែលុះត្រាណាតែអាស៊ីចេះប្រយុទ្ធយកបានជោគជ័យទៅលើបញ្ហាវិសមភាព បញ្ហាពុករលួយ បញ្ហាអាកាសធាតុ។ នេះជាការថ្លែងប្រាប់ដោយការសិក្សាមួយរបស់ធនាគារអភិវឌ្ឍន៍អាស៊ីនៅថ្ងៃអង្គារទី២សីហាឆ្នាំ២០១១នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
បើប្រសិនជាការវិវឌ្ឍន៍បច្ចុប្បន្ននៅតែបន្តមានបែបនេះ ទ្វីបអាស៊ីនឹងប្រមូលផលិតផលសេដ្ឋកិច្ចពិភពលោកបានប្រមាណពាក់កណ្តាលនៅរវាងឆ្នាំ២០៥០ខាងមុខនេះ។ ដូច្នេះបានសេចក្តីថា នឹងមានប្រជាជនប្រមាណបីពាន់លាននាក់ទៀតក្នុងលោកនឹងឈានចូលទៅក្នុងវឌ្ឍនភាពសម្បូណ៌សប្បាយរុងរឿង ហើយដែលម្នាក់ៗមានប្រាក់ចំណូលស្មើនឹងប្រជាជននៅអឺរ៉ុបបច្ចុប្បន្ន។ នេះបើយោងតាមរបាយការណ៍ឈ្មោះ “អាស៊ី២០៥០៖ សមិទ្ធិសតវត្សរ៍អាស៊ី”។
ដំណើរឈានទៅកាន់វឌ្ឍនភាពរបស់អាស៊ីនេះអូសទាញដោយ៧ប្រទេសដែលមានប្រជាជនជាងបីពាន់លាននាក់ ក្នុងនោះមាន៖ ប្រទេសចិន ឥណ្ឌា ឥណ្ឌូនេស៊ី ជប៉ុន កូរ៉េខាងត្បូង ថៃ និងប្រទេសម៉ាឡេស៊ី។
បើយោងតាមសេណារីយោដ៏សុទិដ្ឋិនិយម ផលិតផលដុលសរុបនៃប្រទេសអាស៊ីទាំងនោះច្របាច់បញ្ចូលគ្នា គិតទាំងប្រទេសដូចជាប្រទេសឡាវនិងប៉ាគីស្ថានផង ដែលមានប្រមាណ១៧ ០០០ពាន់លានដុល្លារនៅឆ្នាំ២០១០នឹងស្ទុះកើនឡើងដល់១៧៤ ០០០ពាន់លានដុលា្លរនៅឆ្នាំ២០៥០ឬត្រូវជា៤០ ៨០០ដុល្លារផលិតផលដុលសម្រាប់ប្រជាជនម្នាក់ៗ។
ក៏ប៉ុន្តែដើម្បីឲ្យទ្វីបអាស៊ីសម្រេចបាននូវជោគជ័យនេះ ពួកគេត្រូវយកតម្រាប់តាមប្រទេសជប៉ុន កូរ៉េខាងត្បូងឬសិង្ហបុរី ដែលចេះជំរុញឲ្យមានកំណើនសេដ្ឋកិច្ចប្រកបដោយសមធម៌។
ហើយដើម្បីឲ្យការអភិវឌ្ឍន៍អាស៊ីមានចីរកាល តំបន់អាស៊ីត្រូវធ្វើការប្រយុទ្ធប្រឆាំងនឹងភាពក្រីក្រ ធានាឲ្យមានសមធម៌ អភិវឌ្ឍវិស័យអប់រំ អភិវឌ្ឍបច្ចេកវិទ្យា ប្រយុទ្ធប្រឆាំងនឹងអំពើពុករលួយ ហើយត្រូវប្រយុទ្ធប្រឆាំងនឹងអភិបាលកិច្ចពុំត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ