ស៊ីរី-អាមេរិក -

អត្ថបទចុះផ្សាយនៅថ្ងៃ សៅរ៍ 11 មិថុនា 2011 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 11 មិថុនា 2011

ស៊ីរី៖ សហរដ្ឋអាមេរិកទាមទារឲ្យទីក្រុងដាម៉ាសបញ្ឈប់អំពើហិង្សាជាបន្ទាន់

លោក Jay Carney អ្នកនាំពាក្យនៃសេតវិមាន

ដោយ សៀក សារិន

រដ្ឋបាលអាមេរិកាំងបានបញ្ចេញប្រតិកម្មយ៉ាងខ្លាំងក្លានៅចំពោះមុខទង្វើ ហិង្សាដ៏ឃោរឃៅនៃរបបផ្តាច់ការបាស្ហារអាល-អាស្សាដដែលបានប្រព្រឹត្ត ទៅលើបាតុករស៊ីរី។ បាតុករស៊ីរីដែលបាននាំគ្នាចុះថ្នល់ស្រែកទាមទារឲ្យមេដឹកនាំ ផ្តាច់ការបាស្ហារអាល-អាស្សាដចាកចេញពីមុខតំណែង។

សេចក្តីរាយការណ៍របស់ សៀក សារិន

ស្តាប់ (01:39)

11/06/2011 by សៀក សារិន

នៅគ្រាដំបូងនៃការងើបបះបោររបស់ប្រជាជនស៊ីរី សហរដ្ឋអាមេរិកនៅសម្តែងឲ្យឃើញនូវការអត់ឱនខ្លះឲ្យរបបគ្រប់គ្រងស៊ីរី។ ក៏ប៉ុន្តែ ឥឡូវនេះរដ្ឋបាលរបស់លោកបារ៉ាក់អូបាម៉ាបានទាមទារឲ្យទីក្រុងដាម៉ាសបញ្ឈប់អំពើហិង្សាដែលបានប្រព្រឹត្តទៅលើបាតុករស៊ីរីជាបន្ទាន់។

លោក Jay Carney អ្នកនាំពាក្យនៃសេតវិមាន បានថ្លែងថា “រដ្ឋាភិបាលបាស្ហារអាល-អាស្សាដកំពុងតែដឹកនាំប្រទេសស៊ីរីឆ្ពោះទៅកាន់មាគ៌ាមួយដែលពោរពេញទៅដោយគ្រោះថ្នាក់ សហរដ្ឋអាមេរិកថ្កោលទោសយ៉ាងធ្ងន់ទៅលើទង្វើវាយបង្ក្រាបដ៏សាហាវឃោរឃៅរបស់កងកម្លាំងសន្តិសុខស៊ីរីទៅលើបាតុករ”។

លោក Jay Carney បានគូសបញ្ជាក់ទៀតថា “កងកម្លាំងសន្តិសុខស៊ីរីនៅតែបន្តធ្វើការបាញ់ប្រហារឬចាប់ឃុំខ្លួនបាតុករនិងអ្នកទោសនយោបាយ។ ហើយគឺទង្វើដ៏ហិង្សាឃោរឃៅទាំងនេះហើយដែលបាននាំឲ្យសហរដ្ឋអាមេរិកងាកទៅគាំទ្រគម្រោងសេចក្តីសម្រេចចិត្តរបស់ប្រទេសបារាំង អង់គ្លេសនិងអាល្លឺម៉ង់ដើម្បីទាមទារឲ្យក្រុមប្រឹក្សាសន្តិសុខនៃអ ស ប ដាក់ទណ្ឌកម្មទៅលើរបបផ្តាច់ការ បាស្ហារអាល-អាស្សាដ។

ទីក្រុងវ៉ាស៊ីនតោនតាមរយៈអ្នកនាំពាក្យនៃសេតវិមានបានថ្លែងឲ្យដឹងទៀតថា សហរដ្ឋអាមេរិកគាំទ្រប្រជាជនស៊ីរីដែលបានសម្ដែងឲ្យឃើញនូវសេចក្តីក្លាហានរបស់ខ្លួនក្នុងការទាមទារ “សេចក្តីថ្លៃថ្នូរ” និង “ការគោរពលទ្ធិប្រជាធិបតេយ្យ”។

គួរកត់សម្គាល់ថា ប្រទេសបារាំង អង់គ្លេស ព័រទុយហ្កាល និងអាល្លឺម៉ង់គ្រោងទាមទារឲ្យក្រុមប្រឹក្សាសន្តិសុខនៃអ ស ប ដាក់ទណ្ឌកម្មទៅលើរបបផ្តាច់ការ បាស្ហារអាល-អាស្សាដហើយនិងដាក់ទោសទៅលើកងកម្លាំងសន្តិសុខស៊ីរីដែលបានប្រព្រឹត្តអំពើឧក្រិដ្ឋកម្មប្រឆាំងមនុស្សជាតិ៕

tags: ស៊ីរី