ជប៉ុនយល់ព្រមឲ្យមានបេសកកម្មរបស់AIEAនៅហ្វ៊ូគូស្ហ៊ីម៉ា
អាជ្ញាធរជប៉ុនកំពុងខិតខំធ្វើការទប់ទល់នឹងផលវិបាកដែលកើតចេញ ពីវិបត្តិនុយក្លេអ៊ែរនៅហ្វ៊ូគូស្ហ៊ីម៉ា។ ដំបូលគ្របការពារម៉ាស៊ីនប្រតិកម្មនុយក្លេអ៊ែរទី៥និងទី៦បានត្រូវគេ ចោះទម្លុះដើម្បីបញ្ចៀសកុំឲ្យកើតមានការផ្ទុះដែលបង្កឡើងដោយ ឧស្ម័នHydrogène។ នៅចន្លោះពេលនេះ ម៉ាស៊ីនប្រតិកម្មនុយក្លេអ៊ែរជាច្រើននៅតែបន្តជះសារធាតុវិទ្យុសកម្ម ទៅក្នុងលំហអាកាស។ ក្រោយពីមានការទាមទារពីសំណាក់ទីភ្នាក់ងារអន្តរជាតិខាងថាមពល នុយក្លេអ៊ែរAIEA ប្រទេសជប៉ុនក៏បានយល់ព្រមឲ្យមានបេសកកម្មរបស់AIEAនៅ ហ្វ៊ូគូស្ហ៊ីម៉ា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ក្រុមហ៊ុនគ្រប់គ្រងមជ្ឈមណ្ឌលនុយក្លេអ៊ែរនៅហ្វ៊ូគូស្ហ៊ីម៉ាឈ្មោះTepco ឬTokyo Electric Power Company កំពុងខិតខំរៀបចំឲ្យមានចរន្តអគ្គិសនីឡើងវិញ ដើម្បីធ្វើឲ្យម៉ាស៊ីនប្រតិកម្មនុយក្លេអ៊ែរបាត់បង់កំដៅខ្លាំងរបស់ខ្លួន ហើយនិងកំពុងខិតខំធ្វើការទប់ទល់នឹងការសាយភាយនៃសារធាតុវិទ្យុសកម្ម។
វិធានការនិងបេសកកម្មរបស់ទីភ្នាក់ងារអន្តរជាតិខាងថាមពលនុយក្លេអ៊ែរAIEA មានលក្ខណៈខុសពីរដ្ឋាភិបាលជប៉ុន។ ជាលើកទីមួយហើយដែលព័ត៌មានពាក់ព័ន្ធនឹងវិបត្តិនុយក្លេអ៊ែរនៅហ្វ៊ូគូស្ហ៊ីម៉ានឹងចេញពីប្រភពឯករាជ្យ ពុំមែនចេញពីប្រភពរដ្ឋាភិបាល។ ទាំងនេះក៏ដោយសារតែមានការអញ្ជើញទៅទីក្រុងតូក្យូនិងមានការទាមទារដោយអគ្គនាយកនៃទីភ្នាក់ងារអន្តរជាតិខាងថាមពលនុយក្លេអ៊ែរAIEAលោកYukiya Amano។
ជាច្រើនថ្ងៃមកហើយដែលប្រទេសភាគច្រើនដែលជាសមាជិកនៃទីភ្នាក់ងារអន្តរជាតិខាងថាមពលនុយក្លេអ៊ែរAIEA បានទាមទារឲ្យមានវិធានការថ្មីនេះ។ ប្រទេសចិននិងប្រទេសរុស្ស៊ីហើយនិងប្រទេសជិតខាងរបស់ជប៉ុនមួយចំនួនទៀតបារម្ភខ្លាចក្រែងមានសារធាតុវិទ្យុសកម្មសាយភាយដល់ដែនដីរបស់ខ្លួនដែលអាចធ្វើឲ្យប៉ះពាល់ដល់សុខភាពរបស់ប្រជាជន។ ប្រទេសទាំងនោះលែងទទួលចង់បានព័ត៌មានដែលចេញពីប្រភពរដ្ឋាភិបាលជប៉ុនទៀតហើយ។
ដោយអនុលោមតាមសន្ធិសញ្ញា ប្រទេសជប៉ុនត្រូវតែយល់ព្រមតាមការទាមទាររបស់ទីភ្នាក់ងារអន្តរជាតិខាងថាមពលនុយក្លេអ៊ែរAIEA ។ ហើយបើរដ្ឋាភិបាលជប៉ុនពុំយល់ព្រមតាមការទាមទាររបស់ទីភ្នាក់ងារអន្តរជាតិខាងថាមពលនុយក្លេអ៊ែរAIEA ឲ្យមានតម្លាភាពក្នុងការផ្តល់ព័ត៌មានពិតប្រាកដជូនសាធារណជននោះ ប្រជាជនជប៉ុនច្បាស់ជាពុំយល់ព្រមហើយកើតមានកំហឹងក្រេវក្រោធជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ