សេដ្ឋកិច្ចជប៉ុនជាប់គាំងស្ទះទាំងស្រុង
ក្រោយពីមានការរញ្ជួយផែនដីនិងមានមហារលកយក្សបោកបក់មកលើប្រទេសជប៉ុនរួចមក ប្រទេសជប៉ុនត្រូវធ្វើការប្រឈមមុខទល់នឹងគ្រោះថ្នាក់ដ៏ធំមួយទៀតគឺគ្រោះថ្នាក់នុយក្លេអ៊ែរ។ ទាំងនេះបានបណ្តាលឲ្យឧស្សាហកម្មជប៉ុនជួបនឹងវិបត្តិដ៏សែនធ្ងន់ធ្ងរ។ ផលិតកម្មជួបនឹងការគាំងស្ទះក៏ពីព្រោះតែគមនាគមន៍តាមផ្លូវថ្នល់និងតាមផ្លូវដែកស្គាល់ការខូចខាតយ៉ាងដំណំ ដែលជាមូលហេតុធ្វើឲ្យមានកង្វះខាតផ្នែកគ្រឿងខ្ចៅខ្ចងនិងឧបករណ៍សព្វបែបយ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
នៅពេលនេះ សូម្បីតែរថយន្តមួយគ្រឿងក៏គេពុំឃើញមានផលិតចេញពីរោងចក្រជប៉ុនដែរ។ បីថ្ងៃ ក្រោយពីមានការរញ្ជួយផែនដីនិងមានមហារលកយក្សបោកបក់មកលើប្រទេសជប៉ុនរួចមក ក្រុមហ៊ុនផលិតរថយន្តជប៉ុនToyota Honda និង Nissanបានផ្អាកបញ្ឈប់ផលិតកម្មរបស់ខ្លួនទាំងស្រុង ដោយហេតុតែមានកង្វះខាតផ្នែកគ្រឿងខ្ចៅខ្ចងនិងឧបករណ៍សព្វបែបយ៉ាង។ គេពុំដឹងឡើយថាតើគេត្រូវចាប់មានសកម្មភាពឡើងវិញនៅពេលណា?
សូមបញ្ជាក់ថា រោងចក្រជាច្រើននៃក្រុមហ៊ុនផលិតរថយន្តជប៉ុនទាំងនោះឋិតនៅក្នុងតំបន់រងគ្រោះនឹងការរញ្ជួយផែនដីហើយនិងមហារលកយក្ស ពោលគឺនៅតំបន់ប៉ែកឦសាននៃប្រទេស។ ក្រុមហ៊ុនផលិតរថយន្តToyota បានបិទទ្វាររោងចក្ររបស់ខ្លួនអស់១២កន្លែងដែលបច្ចុប្បន្ននេះធ្វើឲ្យក្រុមហ៊ុនតូយ៉ូតាខាតបាត់បង់អស់ប្រាក់ប្រមាណ៧២លានដុល្លារក្នុងមួយថ្ងៃ។
តំបន់Sendai ដែលបានទទួលរងគ្រោះដោយការរញ្ជួយផែនដីនិងមហារលកយក្សយ៉ាងសែនធ្ងន់ធ្ងរនោះក៏ជាតំបន់ឧស្សាហកម្មមួយដ៏សែនសំខាន់ ជាពិសេសក្នុងវិស័យអេឡិចត្រូនិកនិងក្នុងវិស័យទូរគមនាគមន៍។ ក្រុមហ៊ុនSony បានផ្អាកបញ្ឈប់សកម្មភាពនៃរោងចក្ររបស់ខ្លួនប្រមាណ៧កន្លែង។ រីឯក្រុមហ៊ុនCanon ដែលជាផលិតករទីមួយក្នុងលោកផ្នែកឧបករណ៍សម្រាប់ថតរូបវិញបានថ្លែងប្រាប់ថា គេនឹងបិទទ្វាររោងចក្ររបស់គេប្រមាណ៨កន្លែង។ ក្រុមហ៊ុនPanasonic ក៏ដូចគ្នាអ៊ីចឹងដែរ។
នៅសឹងគ្រប់ទីកន្លែង រោងចក្រជប៉ុនបាននាំគ្នាបិទទ្វារផ្អាកបញ្ឈប់សកម្មភាពរបស់ខ្លួន ដែលបណ្តាលមកពីខ្វះថាមពលអគ្គិសនីសម្រាប់ប្រើប្រាស់និងបញ្ហាគមនាគមន៍។ ក្រុមហ៊ុនអយស្ម័យយានជប៉ុនដែលបម្រើអ្នកដំណើរនៅតាមជាយទីក្រុងតូក្យូឈ្មោះEast Japan Railways បានផ្អាកបញ្ឈប់សកម្មភាពរបស់ខ្លួនប្រមាណ៨០%។
ហេតុដូច្នេះហើយ បានជាទីផ្សារភាគហ៊ុននៃទីក្រុងតូក្យូក្រោយពីបានធ្លាក់បាត់បង់អស់ប្រមាណ៦,១៨%កាលពីម្សិលមិញ នៅថ្ងៃអង្គារទី១៥មីនានេះបានធ្លាក់ដាំដូងបាត់បង់អស់ប្រមាណ១០,៥៥%បន្ថែមទៀតដែលជាកម្រិតបាត់បង់មួយដ៏សែនធ្ងន់ធ្ងរនៅក្នុងប្រវត្តិសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ