កម្ពុជា-អាស៊ាន-ចិន -

អត្ថបទចុះផ្សាយនៅថ្ងៃ ចន្ទ 22 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 22 តុលា 2012

ឧត្តមមន្ត្រីអាស៊ាន-ចិននឹងជជែកអំពីដំណោះស្រាយសមុទ្រចិនខាងត្បូង

រដ្ឋមន្រ្តីការបរទេសកម្ពុជា ពេលជួបជជែកជាមួយរដ្ឋមន្រ្តីការបរទេសឥណ្ឌូណេស៊ី អំពីជម្លោះសមុទ្រចិនខាងត្បូង

RFI/Delux Leang

ដោយ លាង ដឺលុច

នៅខណៈដែលប្រមុខការទូតឥណ្ឌូនេស៊ីមកគោរពវិញ្ញាណក្ខន្ធព្រះបរមសពសម្តេចឪនៅថ្ងៃចន្ទនេះ លោកប្រមុខការទូត ម៉ារទី ណាតាឡេហ្កាវ៉ាបានឆ្លៀតជួបពិភាក្សាការងារ ជាមួយប្រមុខការទូតកម្ពុជាលោកឧបនាយករដ្ឋមន្ត្រីហោ ណាំហុងតែម្តង។ របៀបវារៈនៃជំនួបគឺបញ្ហាតំបន់ដ៏សំខាន់នៃជម្លោះសមុទ្រចិនខាងត្បូង។ រដ្ឋមន្ត្រីកម្ពុជាលោកហោ ណាំហុងបានថ្លែងអោយដឹងថា កម្ពុជាបានជំរុញអោយមានការជួបគ្នាជាផ្លូវការរវាងឧត្តមមន្ត្រីអាស៊ាន និងចិនដើម្បីបន្តជជែកបញ្ហាក្រមប្រតិបត្តិស្តីពីដំណោះស្រាយបញ្ហាសមុទ្រចិនខាងត្បូងនេះ។

សេចក្តីរាយការណ៍របស់លាង ដឺលុច ពីភ្នំពេញ

ស្តាប់ (02:06)

22/10/2012

រដ្ឋមន្ត្រីការបរទេសកម្ពុជាបានស្នើទៅរដ្ឋមន្ត្រីការបរទេសនៃប្រទេសអាស៊ានទាំងអស់ដើម្បីរៀបចំអោយមានការប្រជុំផ្លូវការរវាងឧត្តមមន្ត្រីអាស៊ានស្តីអំពីក្រមប្រតិបត្តិទាក់ទងនឹងដំណោះស្រាយបញ្ហាសមុទ្រចិនខាងត្បូង។ នេះបើតាមការបញ្ជាក់របស់លោកហោ ណាំហុង រដ្ឋមន្ត្រីការបរទេសកម្ពុជាប្រាប់អ្នកសារព័ត៌មាននៅព្រឹកថ្ងៃចន្ទទី២២តុលានេះ។
លោកប្រមុខការទូតកម្ពុជាបានថ្លែងយ៉ាងនេះបន្ទាប់ពីបានជួបពិភាក្សាការងារជាមួយសមភាគីឥណ្ឌូនេស៊ី លោកម៉ារទី ណាតាឡេហ្កាវ៉ា ដែលមកប្រទេសកម្ពុជាដើម្បីគោរពព្រះវិញ្ញាណក្ខន្ធសម្តេចឪនរោត្តម សីហនុ។

លោក ហោ ណាំហុងបានរៀបរាប់អោយដឹងថា លោកបានស្នើទៅរដ្ឋមន្ត្រីការបរទេសអាស៊ានរួចហើយឲ្យមានការប្រជុំផ្លូវការនៃឧត្តមមន្ត្រីអាស៊ាន ហើយរដ្ឋមន្ត្រីការបរទេសអាស៊ានបានឯកភាពតាមការស្នើសុំរបស់លោកហើយដែរ។ លោកបន្តថា ឥឡូវនេះ លោកក៏បានស្នើទៅរដ្ឋមន្ត្រីការបរទេសថៃ ដែលជាប្រទេសសម្របសម្រួលជាមួយប្រទេសចិន ដើម្បីស្នើទៅចិនឲ្យមានការប្រជុំផ្លូវការរវាងឧត្តមមន្ត្រី អាស៊ាន និងចិន។

គួរបញ្ជាក់ថា លោកប្រមុខការទូតកម្ពុជាត្រូវអំពាវនាវអោយមានកិច្ចប្រជុំចំហផ្លូវការយ៉ាងដូច្នេះ បន្ទាប់ពីក្រុមឧត្តមមន្ត្រីអាស៊ានធ្លាប់ប្រជុំមិនផ្លូវការ២ដងរួចមកហើយ។ ហើយថានៅពេលខាងមុខនេះ ក៏នឹងមានការប្រជុំមិនចំហនៅភូកេតប្រទេសថៃ នាថ្ងៃទី២៩ ខែតុលា រវាងឧត្តមមន្ត្រីអាស៊ាន និងឧត្តមមន្ត្រីចិន ដើម្បីពិភាក្សាអំពីក្រមប្រតិបត្តិស្តីពីដំណោះសា្រយនៃជម្លោះសមុទ្រចិនខាងត្បូងនេះទៀតដែរ។

យោងតាមសារព័ត៌មាននៃប្រទេសសិង្ហបុរី លោកនាយករដ្ឋមន្ត្រីសឹង្ហបុរី លី ស៊ានឡុងក្នុងឱកាសដែលលោកមកកម្ពុជាដើម្បីគោរពព្រះបរមសពសម្តេចឪ លោកក៏បានពិភាក្សាជាមួយសមភាគីកម្ពុជាអំពីដំណោះស្រាយសមុទ្រចិនខាងត្បូងនេះដែរ។ លោកនាយករដ្ឋមន្ត្រីសិង្ហបុរីចង់ឃើញការវិវត្តផ្នែកដំណោះស្រាយនៅក្នុងកិច្ចប្រជុំមេដឹកនាំអាស៊ាននៅក្នុងខែវិច្ឆិកាខាងមុខនេះ ដែលកិច្ចប្រជុំនេះនឹងត្រូវប្រព្រឹត្តទៅនៅរាជធានីភ្នំពេញ។

គួររម្លឹកថា ព្រោះតែចំណុចមិនស្របគ្នានៃបញ្ហាសមុទ្រចិនខាងត្បូងតែមួយ វាបានរំខានធ្វើអោយកិច្ចប្រជុំរដ្ឋមន្ត្រីការបរទេសអាស៊ានមិនអាចចេញសេចក្តីថ្លែងការណ៍រួម១៣០ចំណុចផ្សេងទៀត កាលពីខែកក្កដាកន្លងទៅ៕