តុលាការឃុំខ្លួនលោក ម៉ម សូណង់ដូពាក់ព័ន្ធនឹងជម្លោះដី នៅខេត្តក្រចេះ
នៅរសៀលថ្ងៃចន្ទនេះ ចៅក្រមតុលាការសាលាដំបូងរាជធានីភ្នំពេញ បានសម្រេចឃុំខ្លួនលោក ម៉ម សូណង់ដូ នៅពន្ធនាគារព្រៃស ពាក់ព័ន្ធនឹងជម្លោះដីធ្លីនៅខេត្តក្រចេះ។ លោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានប៉ូលិសចាប់ខ្លួនកាលពីព្រឹកថ្ងៃអាទិត្យទី១៥ កក្កដាម្សិលមិញពាក់ព័ន្ធនឹងរឿងជម្លោះដីធ្លី នៅភូមិប្រម៉ា ឃុំកំពង់ដំរីស្រុកឆ្លូងខេត្តក្រចេះ។ សំណុំរឿងលើករណីលោកម៉មសូណង់ដូ ត្រូវបានផ្ទេរពីតុលាការខេត្តក្រចេះ មកតុលាការក្រុងភ្នំពេញដោយសារតែសំណុំរឿងមានភាពស្មុគស្មាញនិងជាករណីពិសេស។ នៅក្រៅរបងតុលាការ ព្រឹកមិញក៏មានអ្នកគាំទ្រលោកម៉ម សូណង់ដូ ប្រមាណ ៣០នាក់ជួបជុំលើកបដានិងរូបថតរបស់លោកម៉មសូណង់ដូ ហើយស្រែកតវ៉ាឲ្យមានការដោះលែងលោកម៉មសូណង់ដូ មកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
លោក ម៉ម សូណង់ដូ ត្រូវបានប៉ូលិសនាំទៅកាន់តុលាការក្រុងភ្នំពេញ កាលពីម៉ោង ១០ និង ២០ នាទី ព្រឹកថ្ងៃចន្ទ ទី១៦ ខែកក្កដា ឆ្នាំ២០១២។ រហូតដល់ម៉ោងជាង ១រសៀលនេះ ប៉ូលិសបាននាំខ្លួនលោក ម៉ម សូណង់ដូតាមឡាន ចេញពីតុលាការភ្នំពេញ ទៅឃុំឃាំង នៅពន្ធនាគារព្រៃស។
លោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានប៉ូលិសចាប់ខ្លួន កាលពីព្រឹកថ្ងៃអាទិត្យម្សិលមិញ។នៅក្រៅរបងតុលាការភ្នំពេញ នាព្រឹកថ្ងៃចន្ទនេះ ក្រុមសមាជិកសមាគមអ្នកប្រជាធិបតេយ្យប្រមាណ ៣០នាក់ បានលើករូបថតលោក ម៉ម សូណង់ដូ និងស្រែកទាមទារឲ្យតុលាការ ដោះលែងលោក ម៉ម សូណង់ដូ។
ក៏ប៉ុន្តែលោកស្រីចៅក្រម សែម សក្តិកូណា បានសម្រេចឃុំខ្លួន លោកម៉មសូណង់ដូ នៅពន្ធនាគារព្រៃសក្រោមការចោទប្រកាន់ពីបទជាអ្នកផ្តើមគំនិត មានស្ថានទម្ងន់ទោសប្រឆាំងនឹងអ្នករាជការសាធារណៈ ធ្វើកុបកម្មជ្រៀតជ្រែកខុសច្បាប់នៅក្នុងការបំពេញមុខងារសាធារណៈ របស់អាជ្ញាធរ និងញុះញង់ឲ្យប្រជាពលរដ្ឋកាន់អាវុធប្រឆាំងនឹងអាជ្ញាធរស្របច្បាប់ដែលមានចែងក្នុងមាត្រា ២៨, ៥០៤, ៤៥៧ និងមាត្រា ៤៦៤ នៃក្រមព្រហ្មទណ្ឌ។
ការចោទប្រកាន់ដូច្នេះ នឹងនាំឲ្យលោក ម៉ម សូណង់ដូ ត្រូវប្រឈមមុខនឹងការជាប់ពន្ធនាគារពី ៩ ឆ្នាំ ៦ ខែ ទៅ ២១ឆ្នាំ និងពិន័យជាប្រាក់ពី ៥ លានរៀល ទៅ ១២ លានរៀល។ ភរិយាលោក ម៉ម សូណង់ដូ គឺលោកស្រី ឌិន ផាណារ៉ា បានច្រានចោលការចោទប្រកាន់ ហើយថា ក្នុងករណីចាប់ខ្លួនលោក ម៉ម សូណង់ដូ លោកស្រីបានស្នើសុំការអន្តរាគមន៍ពីស្ថានទូតបារាំង ប្រចាំកម្ពុជា កាលពីថ្ងៃអាទិត្យ ពីព្រោះលោក ម៉ម សូណង់ដូ ក៏មានសញ្ជាតិបារាំងផងដែរ។
មានអាយុ ៧០ ឆ្នាំ លោក ម៉ម សូណង់ដូ ធ្លាប់ត្រូវរដ្ឋាភិបាលកម្ពុជា ចាប់ដាក់ពន្ធនាគារចំនួនពីរលើករួចមកហើយ។ ទី១-ទាក់ទងនឹងកុបកម្មប្រឆាំងថៃ ឈានដល់ការដុតស្ថានទូតថៃ កាលពីដើមឆ្នាំ២០០៣ និងទី២-ពាក់ព័ន្ធនឹងការរិះគន់រដ្ឋាភិបាលកម្ពុជាចំពោះសន្ធិសញ្ញាព្រំដែនកម្ពុជា-វៀតណាម នៅចុងឆ្នាំ២០០៥។
ករណីជម្លោះដី នៅខេត្តក្រចេះ ត្រូវបានលោកនាយករដ្ឋមន្ត្រីហ៊ុន សែនប្រកាសចាត់វិធានការតាមផ្លូវតុលាការប្រឆាំងនឹងប្រធានសមាគមអ្នកប្រជាធិបតេយ្យដែលមានលោកម៉មសូណង់ដូ ជាប្រធាន។ លោកនាយករដ្ឋមន្ត្រី អះអាងថា ប្រធានសមាគមនេះជាអ្នកបំផុសមហាជនឲ្យចាប់ដីអនាធិបតេយ្យ និងបង្កើតតំបន់អបគមន៍ រហូតដល់រដ្ឋាភិបាលបញ្ចេញកម្លាំងប៉ូលិស និងកងទ័ពបង្ក្រាប កាលពីថ្ងៃទី១៦ ខែឧសភា ឆ្នាំ២០១២ រហូតនាំឲ្យក្មេងស្រីម្នាក់ស្លាប់ និងមនុស្សជាច្រើននាក់ត្រូវចាប់ខ្លួន និងរត់គេចខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ