ក្រុមអ្នកស្នេហាព្រៃឈើគ្រោងធ្វើបាតុកម្ម ប្រឆាំងគម្រោងសាងសង់ទំនប់វារីអគ្គិសនីនៅអារ៉ែង
ក្រុមយុវជន សកម្មជនការពារព្រៃឈើ និង ព្រះសង្ឃ គ្រោងធ្វើបាតុកម្មទាមទារឲ្យរដ្ឋាភិបាលកម្ពុជាលុបចោលគម្រោងសាងសង់ទំនប់វារីអគ្គិសនីនៅក្នុងតំបន់អារ៉ែងក្នុងខេត្តកោះកុង។ នេះបើតាមលោក អេឡិច ប្រធានចលនាមាតាធម្មជាតិដែលបានបង្ហើបប្រាប់វិទ្យុបារាំងអន្តរជាតិនៅព្រឹកថ្ងៃចន្ទនេះ។ បាតុកម្មនេះ នឹងធ្វើឡើងនៅក្នុងរាជធានីភ្នំពេញក្រោយពីពិធីបុណ្យភ្ជុំបិណ្ឌ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
លោក អេឡិច បានលើកឡើងថា បាតុកម្មនាពេលខាងមុខនេះ មានគោលដៅធំៗចំនួនពីរ គឺ ទីមួយ ទាមទារឲ្យរដ្ឋាភិបាលកម្ពុជាលុបចោលគម្រោងសាងសង់ទំនប់វារីអគ្គិសនីនៅក្នុងតំបន់អារ៉ែង និង ទីពីរ លាតត្រដាងពីរចំណុចអាថ៌កំបាំងមួយចំនួននៅពីក្រោយគម្រោងនេះ។ ទោះបីមិនបង្ហាញពីចំណុចអាថ៌កំបាំងនោះក៏ពិតមែន ក៏ប៉ុន្តែបុរសជនជាតិអេស្ប៉ាញម្នាក់នេះបានហៅគម្រោងសាងសង់ទំនប់វារីអគ្គិសនីនៅក្នុងតំបន់អារ៉ែងនោះថា ជាគម្រោងខ្មោច។
គម្រោងធ្វើបាតុកម្មរបស់ក្រុមយុវជន សកម្មជនការពារព្រៃឈើ និង ព្រះសង្ឃនេះបានកើតឡើងតែមួយសប្តាហ៍ប៉ុណ្ណោះ បន្ទាប់ពីក្រុមយុវជន ១០ នាក់ រួមទាំងលោកអេឡិចត្រូវបានអាជ្ញាធរឃាត់ខ្លួនបន្ទាប់ពីពួកគេ បានបិទផ្លូវមិនឲ្យតំណាងអាជ្ញាធរខេត្តកោះកុងនិងតំណាងក្រុមហ៊ុនចិនចូលទៅកាន់តំបន់អារ៉ែង។ ក្រោយសាកសួរអស់ប៉ុន្មានម៉ោង សកម្មជនទាំងនោះក៏ត្រូវបានដោះលែងវិញដោយភ្ជាប់ជាមួយកិច្ចសន្យា។ កាលពីខែមុនចលនាមាតាធម្មជាតិ បានដឹកនាំក្រុមយុវជនប្រមាណ១០០នាក់ជិះកង់នៅក្នុងរាជធានីភ្នំពេញ ដើម្បីផ្សព្វផ្សាយពីតំបន់អារ៉ែង។ ក៏ប៉ុន្តែមិនទទួលបានជោគជ័យនោះទេ ដោយអាជ្ញាធរក្រុងភ្នំពេញជាច្រើននាក់បានរារាំង។ ហើយគម្រោងធ្វើបាតុកម្មលើកនេះ នឹងក្លាយជាការតវ៉ាលើកទីពីរនៅក្នុងរាជធានីភ្នំពេញទាក់ទងទៅនឹងតំបន់អារ៉ែងនេះ ។
យ៉ាងណាក៏ដោយ លោកអេឡិច មិនបានបញ្ជាក់ពីកាលបរិច្ឆេទ និង ចំនួនអ្នកចូលរួមជាក់លាក់នៅឡើយទេ ដោយគ្រាន់តែបង្ហើបថា នឹងធ្វើឡើងក្រោយពីពិធីបុណ្យភ្ជុំបិណ្ឌ។
សូមបញ្ជាក់ថា តំបន់អារ៉ែងក្នុងខេត្តកោះកុង ត្រូវបានរដ្ឋាភិបាលកម្ពុជា ផ្ដល់សិទ្ធិឲ្យក្រុមហ៊ុនចិន ស៊ីណូហាយដ្រូ ដើម្បីសាងសង់ទំនប់វារីអគ្គិសនី។ ចលនាមាតាធម្មជាតិ ប្រជាសហគមន៍ និងសកម្មជនដទៃទៀត បានអះអាងថា គម្រោងសាងសង់ទំនប់វារីអគ្គិសនីនេះ នឹងប៉ះពាល់ដល់ព្រៃឈើ ព្រមទាំងសត្វព្រៃកម្រជាច្រើននៅក្នុងតំបន់នោះ។ កន្លងមក ក្រុមសកម្មជនការពារព្រៃឈើ ធ្លាប់បានដាក់ញត្តិទៅស្ថាប័នពាក់ព័ន្ធផ្សេងៗ ព្រមទាំងបានតវ៉ាបិទផ្លូវជាច្រើនលើកច្រើនសារដើម្បីស្នើឲ្យបញ្ឈប់គម្រោងនេះ ដោយទុកតំបន់នោះ ជាតំបន់ទេសចរណ៍ធម្មជាតិវិញ។ក៏ប៉ុន្តែ រដ្ឋាភិបាលកម្ពុជាមិនបានឆ្លើយតបជាវិជ្ជមានណាមួយចំពោះសំណើរបស់ក្រុមសកម្មជនការពារព្រៃឈើទាំងនោះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ