អារ៉ាប៊ីសាអូឌីតកាត់ទោសប្រហារជីវិតមេកើយពួកឈីអ៊ីត ចំពេលដែលតំបន់កំពុងអុកឡុកដោយពួកជីហាត
ចុះផ្សាយនៅថ្ងៃ៖
ស្តាប់ - ០៤:៣៩
កាលពីថ្ងៃទី១៥ តុលាកន្លងទៅ តុលាការឧក្រិដ្ឋកម្មក្នុងប្រទេសអារ៉ាប៊ីសាអូឌីតបានកាត់ទោសប្រហារជីវិតលោកបាកឺ អាល់នីម មេកើយម្នាក់របស់អ្នកកាន់សាសនាអ៊ីស្លាមនិកាយឈីអ៊ីត។ លោកបាកឺ អាល់នីម ត្រូវបានតុលាការចោទប្រកាន់ពីបទបានបង្កចលាចលនៅផ្ទៃក្នុងរាជាណាចក្រអារ៉ាប៊ីសាអូឌីតចន្លោះឆ្នំា ២០១១ និង ២០១២។ គឺជាបទចោទប្រកាន់មួយដែលលោកបាកឺ អាល់នីម មិនប្រកែកទេ ព្រមទំាងប្រកាសទទួលស្គាល់ពីកំហុសរបស់ខ្លួនជាអ្នកដើរញុះញង់ រំលោភច្បាប់អារ៉ាប៊ីសាអូឌីត និងមានកាន់អាវុធ។ សវនាការកាត់ទោសលោកបាកឺ អាល់នីម បានចាប់ផ្តើមក្នុងខែមីនា ឆ្នំា ២០១៣ ពោល ៨ខែក្រោយការចាប់ខ្លួនលោក។ អ្វីជាការកត់សម្គាល់ ការវិនិច្ឆ័យទោសនេះបានធ្លាក់មកចំពេលដែលតំបន់មជ្ឈិមបូព៌ាកំពុងរំជើបរំជួលដោយជម្លោះសាសនា។
បើមើលមួយភ្លែតទៅ ការកាត់ទោសជនម្នាក់ឲ្យជាប់គុក ឬមួយក៏ប្រហារជីវិតចោល ដោយសារតែជននោះបានបង្កភាពវឹកវរក្នុងសង្គម ឬមួយក៏ក្នុងបំណងផ្តួលរំលំរដ្ឋាភិបាលក្នុងប្រទេសដែលខ្លួនកំពុងរស់នៅ គឺជារឿងមួយធម្មតា មិនមានអ្វីគួរឲ្យភ្ញាក់ផ្អើលទេ។ តែអ្វីដែលហាក់ដូចជាមិនសូវធម្មតានៅក្នុងករណីលោកបាកឺ អាល់នីម ពេលនេះគឺថា លោកជាអ្នកកាន់សាសនាអ៊ីស្លាមនិកាយឈីអ៊ីតរស់ក្នុងប្រទេសអារ៉ាប៊ីសាអូឌីតដែលមានភាគច្រើនជាអ្នកកាន់សាសនាអ៊ីស្លាមនិកាយស៊ុយនីត។ តើទង្វើរបៀបនេះ មិនមែនជាទង្វើរើសអើងសាសនា ឬមួយក៏ជាមេរៀនប្រដៅសហគមន៍ឈីអ៊ីតទូទៅនៅក្នុងតំបន់ទេ ឬយ៉ាងណា?។ នៅមិនទាន់មានចម្លើយយ៉ាងម៉េចទេចំពោះសំណួរនេះ។
មកដល់ពេលនេះ និងអ្វីដែលក្រុមគ្រួសារជនជាប់ចោទបានទាមទារ និងកំពុងបន្តទាមទារយ៉ាងទទូចនោះ គឺសុំឲ្យតុលាការលប់ចោលសាលក្រមនោះវិញ បើមិនដូច្នោះទេ ពួកគេនឹងប្តឹងឧទ្ធរណ៍។ សម្រាប់ក្រុមគ្រួសាររបស់លោកបាកឺ អាល់នីម សាលក្រមរបស់តុលាការឧក្រិដ្ឋកម្មជាសាលក្រមដែលមានបង្កប់ដោយរឿងនយោបាយ មានន័យថា ជាសាលក្រមដែលបានចាក់ស្របតាមនយោបាយរបស់ទីក្រុងរីយ៉ាដក្នុងការតាមធ្វើទុក្ខបុកម្នេញលើសហគមន៍ឈីអ៊ីតដែលមានចំនួនតិចនៅក្នុងប្រទេស។ គឺផ្តើមពីការយល់ឃើញរបៀបនេះហើយបានជានៅក្រោយការប្រកាសសាលក្រមបន្តិច មានក្រុមឈីអ៊ីតរាប់ពាន់នាក់ដែលរស់នៅក្នុងទីរួមខេត្តកាទីស្វបានចុះផ្លូវធ្វើបាតុកម្មប្រឆំាងនឹងសាលក្រមដែលពួកគេចាត់ទុកថាមានការរើសអើងចំពោះពួកគេ។ ក្បួនបាតុកម្មនៅតាមផ្លូវបានប្រព្រឹត្តិទៅដោយគ្មានហិង្សាអ្វីទេ តែប្រតិកម្មខ្លំាងៗត្រូវបានធ្វើឡើងនៅតាមបណ្តាញសង្គម ដូចជាឃ្លាសរសេរថា « សម្លាប់ពួកយើងជាមួយអាល់នីម » ឬ « យើងនឹងផ្តល់ព្រលឹងឲ្យអាល់នីម » ។ល។ និង។ល។
សូមជម្រាបជូនថា មានអាយុ ៥៥ឆ្នំា អ្នកទោសបាកឺ អាល់នីម មិនដែលដេកស្ងៀមក្នុងគុកទេ គឺតែងតែបានឆ្លៀតបញ្ចេញធម្មទេសនាក្តៅក្រហាយដែលធ្វើឲ្យរដ្ឋអំណាចអារ៉ាប៊ីសាអូឌីតមិនអាចទប់កំហឹងបាន។ ជាក់ស្តែង លោកអាល់នីមបានត្រេកត្រអាលចំពោះមរណៈភាពរបស់ស្តេចស្នងរាជម៉ូហាមេត បេនណាយេហ្វក្នុងឆ្នំា ២០១២។ ក្នុងឆ្នំា ២០១១ លោកអាល់នីមបានអំពាវនាវឲ្យធ្វើអប្បគមនៅក្នុងដែនដីអារ៉ាប៊ីសាអូឌីតប៉ែកខាងកើតដោយបញ្ចូលខ្លួនជាមួយនឹងរាជាណាចក្រក្បែរខាងអារ៉ាប៊ីសាអូឌីត គឺប្រទេសបារ៉ែន។ ខុសពីមន្រ្តីឈីអ៊ីតផ្សេងទៀតដែលជាអ្នកកណ្តាលនិយម លោកបាកឺ អាល់នីម ត្រូវបានគេចាត់ទុកជាអ្នកជ្រុលនិយមប្រកាន់ជំហរតឹងរឹង និងដែលមានមនុស្សភាគច្រើនមិនយល់ស្របតាមអ្វីដែលលោកបានធ្វើនោះទេ។ តែជាមួយនឹងការកាត់ទោសពេលនេះ លោកបាកឺ អាល់នីម បានក្លាយជានិមិត្តរូបមួយសម្រាប់សហគមន៍ឈីអ៊ីត។
គួររម្លឹកជូនថា តំាងពីឆ្នំា ២០១១ មក ការវាយបង្រ្កាបលើពួកបាតុករឈីអ៊ីតពីសំណាក់កម្លំាងប៉ូលិសអារ៉ាប៊ីសាអូឌីតបានបណ្តាលឲ្យមានមនុស្សស្លាប់ ២០នាក់ និងប៉ូលិស ៤នាក់។ មួយវិញទៀតក្នុងរយៈពេល ៣ឆ្នំាចុងក្រោយនេះ មានប្រជាជនឈីអ៊ីតជាង ១ ០០០នាក់ត្រូវបានចាប់ខ្លួន និងភាគច្រើនកំពុងជាប់ឃុំមកដល់សព្វថ្ងៃ។ តែស្ថានការណ៍ហាក់ដូចជាធូរស្រាលបន្តិចនៅដំណាច់ឆ្នំា ២០១២ ដោយសារតែរដ្ឋាភិបាលទីក្រុងរីយ៉ាដបានសុខចិត្តធ្វើសម្បទានមួយចំនួន ដូចជាការបង្កើតឲ្យមានមជ្ឈមណ្ឌលមួយសម្រាប់កិច្ចសន្ទនារវាងសហគមន៍សាសនា និងការប្តូរអភិបាលខេត្តកាទីស្វ។ តែនៅស្រុកក្រីក្រអាវ៉ាមីយ៉ាដែលជាដែនអំណាចរបស់លោកបាកឺ អាល់នីម ការប៉ះទង្គិចគ្នារវាងកម្លំាងសន្តិសុខ និងក្រុមយុវជនកំពុងបន្តមានយ៉ាងក្តៅគគុក។
សំណួរដែលកំពុងចោទពេលនេះគឺថា តើការកាត់ទោសប្រហារជីវិតលោកអាល់នីមអាចនឹងបញ្ឆេះកំហឹងរបស់ប្រជាជនឈីអ៊ីតនៅកន្លែងផ្សេងដែរ ឬទេ?។
យ៉ាងណាក៏ដោយ ព្រឹត្តិការណ៍កាត់ទោសប្រហារជីវិតពួកឈីអ៊ីតពីសំណាក់រដ្ឋអំណាចអារ៉ាប៊ីសាអូឌីតពេលនេះបានកើតមានឡើង ចំពេលតំបន់កំពុងអុកឡុកដោយពួកជីហាត អ្នកជ្រុលនិយមស៊ុយនីត និងដែលទីក្រុងរីយ៉ាដក៏កំពុងរួមដៃជាមួយបស្ចិមលោកដើម្បីប្រឆំាងទប់ដែរ។ តែអ្វីដែលប្រជាជនឈីអ៊ីតនៅអារ៉ាប៊ីសាអូឌីតបន្តតវ៉ាមិនសុខចិត្តនោះ គឺមិនចង់ឃើញទីក្រុងរីយ៉ាដឆ្លៀតប្រើយុទ្ធនាការប្រឆំាងពួកជីហាតដើម្បីចាប់មេកើយរបស់គេដាក់គុក និងកាត់ទោសឡើយ។ នៅពេលនេះ ក្រុមមេធាវីរបស់លោកបាកឺ អាល់នីម កំពុងត្រៀមប្តឹងឧទ្ធរណ៍ឲ្យកូនក្តីខ្លួន និងដែលគ្រប់គ្នាកំពុងទន្ទឹងរង់ចំាយ៉ាងអន្ទះសាជាទីបំផុត។ ការទន្ទឹងរង់ចំាដែលមិនមែនមានតែប្រជាជនឈីអ៊ីតនៅក្នុងប្រទេសអារ៉ាប៊ីសាអូឌីតប៉ុណ្ណោះទេ តែក៏មានពីប្រទេសអ៊ីរ៉ង់ដែលជាសត្រូវប្រចំាតំបន់របស់អារ៉ាប៊ីសាអូឌីតផងដែរ។ លោកអាមេដ ខាតាមី អ្នកទទួលខុសត្រូវជាន់ខ្ពស់ម្នាក់នៃសាសនាអ៊ីរ៉ង់បានព្រមានទុកជាមុនថា « បើបាកឺ អាល់នីម ត្រូវគេប្រហារជីវិតចោលមែននោះ ទីក្រុងរីយ៉ាដនឹងទទួលមេរៀនមួយយ៉ាងចាស់ដៃ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ