សន្និសីទប្រឆាំងអំពើពុករលួយប្រចាំតំបន់អាស៊ីប៉ាស៊ីហ្វិកបើកធ្វើនៅភ្នំពេញ
សន្និសីទប្រចាំតំបន់លើកទី៨នៃគំនិតផ្តួចផ្តើមប្រឆាំងអំពើពុករលួយរបស់ធនាគារអភិវឌ្ឍន៍អាស៊ី(ADB) និងអង្គការសហប្រតិបត្តិការសេដ្ឋកិច្ចនិងអភិវឌ្ឍន៍ (OECD )សម្រាប់អាស៊ីប៉ាស៊ីហ្វិកបានបើកធ្វើនៅភ្នំពេញរយៈពេលបីថ្ងៃចាប់ពីថ្ងៃទី០២ដល់ថ្ងៃទី០៤កញ្ញា។ ក្រុមការងារមកពីប្រទេសចំនួន ៣១ បានផ្តើមជួបគ្នានៅថ្ងៃអង្គារទី០២កញ្ញានេះនៅឯសណ្ឋាគារអាំងទែកុងទីណង់តាល់។ សន្និសីទថ្នាក់តំបន់នេះធ្វើឡើងក្រោមប្រធានបទ«ការប្រយុទ្ធប្រឆាំងអំពើពុករលួយនិងការកសាងទំនុកចិត្ត»។
ចុះផ្សាយនៅថ្ងៃ៖
ស្តាប់ - ០១:៥៨
ថ្លែងទៅកាន់ក្រុមការងារមកពីប្រទេសចំនួន ៣១ នៅថ្ងៃជួបជុំគ្នាដំបូងនេះ លោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយបានកត់សម្គាល់ថា មិនខុសពីបណ្តាប្រទេសនានាដែលមានវត្តមានក្នុងសន្និសីទនេះទេ រដ្ឋាភិបាលកម្ពុជាក៏បានយល់ច្បាស់អំពីផលវិបាកនៃអំពើពុករលួយហើយចាត់ទុកបញ្ហានេះជាអាទិភាពមួយដែលត្រូវដោះស្រាយ។
ជាក់ស្តែង កម្ពុជាបានអនុម័តច្បាប់ប្រឆាំងអំពើពុករលួយកាលពីឆ្នាំ ២០១០ និងបានបង្កើតឲ្យមានស្ថាប័នប្រឆាំងអំពើពុករលួយក្នុងនោះមានក្រុមប្រឹក្សាជាតិប្រឆាំងអំពើពុករលួយដែលមានតួនាទីពិគ្រោះនិងផ្តល់យោបល់ និងអង្គភាពប្រឆាំងអំពើពុករលួយដែលជាអាជ្ញាធរអនុវត្តន៍ច្បាប់។ស្ថាប័នទាំងពីរនេះបានដំណើរការងាររបស់ខ្លួនជាបន្តបន្ទាប់មកហើយ។ នេះជាការគូសបញ្ជាក់របស់លោក តុប សំ។
សូមបញ្ជាក់ថា សន្និសីទនេះនឹងចាប់ផ្តើមបើកជាផ្លូវការនៅថ្ងៃពុធទី០៣កញ្ញាដោយមានវត្តមានលោកនាយករដ្ឋមន្ត្រី ហ៊ុន សែន និងប្រធានការិយាល័យប្រឆាំងអំពើពុករលួយរបស់ធនាគារអភិវឌ្ឍន៍អាស៊ី ( ADB )។ ក្នុងអំឡុងពេលបីថ្ងៃនេះ គណៈប្រតិភូទាំង ៣១ ប្រទេសរួមទាំងអ្នកជំនាញនាំមុខគេមកពីជុំវិញពិភពលោកនឹងផ្លាស់ប្តូរបទពិសោធន៍គ្នាអំពីការប្រយុទ្ធប្រឆាំងអំពើពុករលួយ។ គោលដៅគឺការកសាងទំនុកចិត្តទៅលើរដ្ឋាភិបាល ទៅលើវិស័យឯកជន និងសង្គមស៊ីវិល បន្ទាប់ពីគេរកឃើញថា អំពើពុករលួយបានធ្វើឲ្យពលរដ្ឋបាត់បង់ទំនុកចិត្តយ៉ាងខ្លាំងទៅលើស្ថាប័នរដ្ឋ និងឯកជន។
យោងតាមកម្មវិធីដែលបានគ្រោងទុក សន្និសីទនេះនឹងជជែកពិភាក្សាអំពីការកសាងទំនុកចិត្តលើរដ្ឋាភិបាល ទៅលើវិស័យឯកជន និងការបង្កើតសម្ព័ន្ធភាពរវាងរដ្ឋាភិបាលនិងសង្គមស៊ីវិលដែលអាចអនុញ្ញាតឲ្យប្រជាពលរដ្ឋធ្វើការរួមគ្នាជាមួយរដ្ឋាភិបាលដើម្បីប្រយុទ្ធប្រឆាំងអំពើពុករលួយ។ ក៏មានដែរកិច្ចពិភាក្សាអំពីការអនុវត្តគោលនយោបាយប្រឆាំងអំពើពុករលួយ និងការវាស់ស្ទង់ពីផលប៉ះពាល់នៃភ្នាក់ងារប្រឆាំងអំពើពុករលួយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ