កម្ពុជា -

អត្ថបទចុះផ្សាយនៅថ្ងៃ សុក្រ 01 មេសា 2011 - ព័ត៌មានទើបកែប្រើលើកចុងក្រោយ ថ្ងៃ សុក្រ 01 មេសា 2011

VINCI រម្លឹកខួប ១៥ឆ្នាំ នៅកម្ពុជា

អាកាសយានដ្ឋានអន្តរជាតិភ្នំពេញដែលវិនិយោគដោយក្រុមហ៊ុនបារាំង Vinci

ដោយ លាង ដឺលុច

ទន្ទឹមនឹងការសម្ពោធជើងហោះហើររបស់ក្រុមហ៊ុនអាកាសចរណ៍បារាំង Air France ឡើងវិញនៅ កម្ពុជា ក្រុមហ៊ុនសម្បទានព្រលានយន្តហោះ នៅកម្ពុជា VINCI ដែលជាក្រុមហ៊ុនបារាំងដ៏ធំមួយដែលមានជំនាញស្ថាបនា និងគ្រប់គ្រងដំណើរការព្រលានយន្តហោះ ក៏បានរម្លឹកខួប ១៥ឆ្នាំ នៃវត្តមានរបស់ខ្លួន នៅកម្ពុជាផងដែរ។ ក្រុមហ៊ុនVINCI សព្វថ្ងៃកំពុងគ្រប់គ្រងព្រលានយន្តហោះសំខាន់ៗទាំងបីរបស់កម្ពុជា គឺព្រលានយន្តហោះអន្តរជាតិភ្នំពេញ សៀមរាប និងខេត្តព្រះសីហនុ។

សេចក្តីរាយការណ៍របស់លាង ដឺលុចពីទីក្រុងភ្នំពេញ

01/04/2011
by លាង ដឺលុច

ស្តាប់ (01:48)

ថ្ងៃសម្ពោធជើងហោះហើរឡើងវិញនៃយន្តហោះរបស់ក្រុមហ៊ុនអាកាសចរណ៍បារាំងAir France នៅកម្ពុជា ត្រូវបានរៀបចំធ្វើជាមួយថ្ងៃរម្លឹកខួប១៥ឆ្នាំនៃវត្តមានក្រុមហ៊ុនព្រលានយន្តហោះVINCIរបស់បារាំង នៅកម្ពុជាដែរ។

ក្រុមហ៊ុនបារាំង VINCI កំពុងគ្រប់គ្រងដំណើរការព្រលានយន្តហោះសំខាន់ទាំងបីរបស់កម្ពុជា។ VINCIបានចាប់ផ្តើមវិនិយោគ និងគ្រប់គ្រងដំណើការព្រលានយន្តហោះអន្តរជាតិភ្នំពេញ តាំងពីឆ្នាំ១៩៩៥ បន្ទាប់មក គឺព្រលានយន្តហោះអន្តរជាតិនៃទីក្រុងទេសចរណ៍វប្បធម៌សៀមរាប នៅឆ្នាំ២០០១ ហើយចុងក្រោយ គឺព្រលានយន្តហោះនៅក្នុងខេត្តទេសចរណ៍ព្រះសីហនុនៅឆ្នាំ២០០៦។ ក្នុងឱកាសនេះ ក្រុមហ៊ុនVINCIដែលមានភាគហ៊ុនធំជាងគេ នៅក្នុងការវិនិយោគលើព្រលានយន្តហោះនៅកម្ពុជា ក៏បានបង្កើតអោយមានឈ្មោះរួមមួយ គឺCAMBODIA Airports។ យោងតាមសេចក្តីប្រកាសព័ត៌មានរបស់ក្រុមហ៊ុន ក្រុមហ៊ុនVINCI បានក្លាយទៅជាដៃគូយ៉ាងសំខាន់ និងមាននិរន្តរភាពសម្រាប់ការអភិវឌ្ឍន៍ប្រទេសកម្ពុជា ដោយសារតែព្រលានយន្តហោះដែលវិនិយោគដោយ CAMBODIA Airports ត្រូវបានទទួលស្គាល់ថា បានផ្តល់សេវាដ៏មានគុណភាព។

កាលពីឆ្នាំ២០១០កន្លងទៅ ព្រលានយន្តហោះទាំង៣របស់កម្ពុជាបានទទួលអ្នកដំណើរជាង៣លាន ៣សែននាក់ ដែលចំនួននេះបានបង្ហាញពីកំណើននៃអ្នកធ្វើដំណើរឆ្លងកាត់ព្រលានយន្តហោះកម្ពុជា ១៧ភាគរយលើសពីឆ្នាំ២០០៩ដែលមានតែ ២លាន ៨សែននាក់។ រីឯការដឹកជញ្ជូនទំនិញតាមជើងអាកាសក៏មានកំណើនដូចគ្នា។

ក្រុមហ៊ុនព្រលានយន្តហោះ VINCI បានវិនិយោគលើព្រលានយន្តហោះចំនួន៩ នៅក្នុងប្រទេសបារាំង និងព្រលានយន្តហោះអន្តរជាតិ៣ នៅក្នុងប្រទេសកម្ពុជា។ ជាសរុប ព្រលានយន្តហោះទាំង១២ដែលវិនិយោគដោយVINCI បានទទួលអ្នកដំណើរជិត៨លាននាក់នៅក្នុងឆ្នាំ២០១០ ហើយទទួលបានចំនូល១៥០លានអឺរ៉ូ៕