ឯកអគ្គរដ្ឋទូតអាមេរិកចេញមុខបកស្រាយរឿងបំណុលសម័យ លន់ នល់
ខណៈដែលមានការរិះគន់ជាច្រើនថា បំណុលដែលកម្ពុជាជំពាក់សហរដ្ឋអាមេរិកក្នុងសម័យលោកលន់នល់កាលពីដើមទសវត្សរ៍ឆ្នាំ១៩៧០ថាជាបំណុលសង្គ្រាមដែលធ្វើឲ្យពលរដ្ឋខ្មែរជាច្រើនរងគ្រោះនោះឯកអគ្គរដ្ឋទូតអាមេរិកប្រចាំកម្ពុជាលោកវីលៀមថូតបានចេញមុខមកបកស្រាយអំពីបញ្ហានេះ ដោយចាត់ទុកថា វាជាការយល់ច្រឡំមួយប៉ុណ្ណោះ។ បើតាមឯកអគ្គរដ្ឋទូតអាមេរិកបំណុលនោះត្រូវបានផ្តល់តាមរយៈការទិញទំនិញកសិកម្មដូចជាអង្ករនិងម្សៅមីជាដើមតាមរយៈកម្ចីដែលមានការប្រាក់ទាបហើយដែលកម្ពុជាត្រូវតែសង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅក្នុងអត្ថបទពន្យល់បកស្រាយអំពីបញ្ហាបំណុលដែលចុះផ្សាយលើទំព័រកាសែតក្នុងស្រុកនៅថ្ងៃអាទិត្យនេះ លោក វីលៀម ថូដ( William E. Thodd) ឯកអគ្គរដ្ឋទូតអាមេរិកប្រចាំកម្ពុជាបានមកបកស្រាយនូវអ្វីដែលលោកចាត់ទុកថា ការយល់ច្រឡំអំពីបញ្ហាបំណុលដែលកម្ពុជាជំពាក់អាមេរិក កាលពីសម័យសង្គ្រាមក្នុងដើមទសវត្សរ៍ ឆ្នាំ ១៩៧០ ។
លោកឯកអគ្គរដ្ឋទូតអះអាងថា បំណុលនោះកើតឡើងពីការផ្តល់ទំនិញកសិកម្មដូចជាអង្ករ និងម្សៅមីជាដើមដោយទូទាត់ជាប្រាក់កម្ចីដែលមានការប្រាក់ទាបពីក្រសួងកសិកម្មសហរដ្ឋអាមេរិក។ ការអះអាងរបស់លោក វីលៀម ថូត ហាក់ដូចជាផ្ទុយស្រឡះពីអ្វីដែលរដ្ឋាភិបាលកម្ពុជារួមទាំងអ្នកសង្កេតការណ៍ជាតិ និងអន្តរជាតិបានមើលឃើញថា ជាបំណុលសង្គ្រាម។
ជាក់ស្តែង ភ្លាមៗក្រោយដំណើរទស្សនកិច្ចរបស់ប្រធានាធិបតីអាមេរិក បារ៉ាក់ អូបាម៉ា នៅកម្ពុជា កាលពីថ្ងៃទី១៩វិច្ឆិកា លោក រ៉ាអ៊ូល ម៉ាក់ ជេណា អ្នកនិពន្ធជនជាតិប៊ែលហ្ស៊ិក សញ្ញាតិខ្មែរបានសរសេរអត្ថបទរិះគន់មេដឹកនាំអាមេរិកថា គ្រាន់តែឈានជើងមកដល់កម្ពុជាភ្លាម លោកអូបាម៉ា បានលើកអំពីបញ្ហាសិទ្ធិមនុស្ស ប៉ុន្តែ លោកមិនបាននិយាយសូម្បីតែមួយម៉ាត់អំពីបំណុលដែលត្រូវបានប្រើប្រាស់សម្រាប់ធ្វើសង្គ្រាមប្រឆាំងប្រជាជនកម្ពុជា។ ការហៅបំណុលសម័យលន់ នល់ ថាជាបំណុលប្រឡាក់ឈាមដែលមិនគួរសង ក៏ត្រូវបានសង្គមស៊ីវិលក្នុងស្រុកមួយក្រុមថ្លែងការណ៍ទាមទារផងដែរ។
គួរបញ្ជាក់ថា កម្ពុជាជំពាក់បំណុលសហរដ្ឋអាមេរិកចំនួនជាង ៤០០ លានដុល្លារគិតទាំងការប្រាក់ដែលជាបំណុល កាលពីសម័យលន់ នល់។ រដ្ឋាភិបាលកម្ពុជាចាត់ទុកបំណុលទាំងនោះថា ជាបំណុលសង្គ្រាមដែលបង្កឲ្យជនកម្ពុជាជាច្រើនរងទុក្ខវេទនា ហើយបានសុំឲ្យសហរដ្ឋអាមេរិកកាត់បន្ថយមួយភាគធំដោយបង្វែរទៅជាជំនួយអភិវឌ្ឍន៍វិញ។
ប៉ុន្តែ បើយោងតាមលោក វីលៀម ថូដ ការកាត់បន្ថយបំណុលចំពោះប្រទេសមួយដែលមានលទ្ធភាពសង តែគ្មានឆន្ទៈនឹងសងនោះ វានឹងក្លាយជាគំរូមិនល្អមួយសម្រាប់ប្រទេសដទៃទៀត។ លោកវីលៀម ថូដ បានបញ្ជាក់ថា យោងតាមច្បាប់អន្តរជាតិ រដ្ឋាភិបាលប្រទេសមួយមានកាតព្វកិច្ចទទួលខុសត្រូវចំពោះបំណុលដែលរដ្ឋាភិបាលមុនៗបានជំពាក់។ យ៉ាងណាក៏ដោយ លោកអះអាងថា សហរដ្ឋអាមេរិកនៅតែតាំងចិត្តយ៉ាងខ្ពស់ក្នុងការដោះស្រាយបញ្ហាបំណុលនេះ។
បើតាមឯកអគ្គរដ្ឋទូតអាមេរិក កម្ពុជាត្រូវចុះហត្ថលេខាលើកិច្ចព្រមព្រៀងទ្វេភាគីជាមួយសហរដ្ឋអាមេរិកដើម្បីចាប់ផ្តើមសងបំណុល យ៉ាងហោចណាស់បានមួយឆ្នាំសិន ទើបសហរដ្ឋអាមេរិកស្នើសុំឲ្យមានការអនុគ្រោះដល់កម្ពុជាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ