ប្រមុខយោធាអាមេរិកផ្តល់ជម្រើស៥សម្រាប់ធ្វើអន្តរាគមន៍នៅស៊ីរី
ចុះផ្សាយនៅថ្ងៃ៖
កាលពីថ្ងៃចន្ទទី ២២ កក្កដា ២០១៣ សភាអាមេរិកនឹងអាចបើកភ្លើងខៀវដើម្បីឲ្យរដ្ឋាភិបាលលោកអូបាម៉ាបញ្ជូនសព្វាវុធទៅឲ្យក្រុមប្រឆាំងស៊ីរី។ លោកអូបាម៉ា ធ្លាប់បានប្រកាសកាលពីខែមិថុនាថា នឹងផ្តល់អាវុធឲ្យក្រុមប្រឆាំង បន្ទាប់ពីអាមេរិកបានរកឃើញថា រដ្ឋាភិបាលស៊ីរីរបស់លោកបាស្ហា អាល់អាសាដបានប្រើអាវុធគីមី វាយប្រហារទៅលើក្រុមប្រឆាំង។
សភាអាមេរិកបានបន្ទុចបង្អាក់គម្រោងរបស់លោកអូបាម៉ា អស់ប៉ុន្មានសប្តាហ៍មកហើយព្រោះដោយគេព្រួយបារម្ភថា អាវុធដែលផ្តល់ទៅឲ្យក្រុមប្រឆាំងស៊ីរី នឹងអាចធ្លាក់ទៅក្នុងដៃរបស់ក្រុមអ៊ីស្លាមជ្រុលនិយម ជាពិសេស ពួកក្រុមដែលមានទំនាក់ទំនងជាមួយអាល់កៃដា ដូចជាក្រុមអាល់ ណូស្រា(AlNosra) ជាដើម។ ត្រូវដឹងថា ក្រុមអាល់ ណូស្រានេះដែលត្រូវបានអង្គការសហប្រជាជាតិចាត់ចូលក្នុងតារាងបញ្ជីក្រុមភេរវជន កាលពីខែឧសភា កន្លងទៅនេះ កំពុងនៅលាយឡំជាមួយក្រុមប្រឆាំងនៅស៊ីរី ដើម្បីចូលរួមផ្តួលរំលំរដ្ឋាភិបាលរបស់លោកបាស្ហា អាល់អាសាធដែរ។
អាវុធដែលអាមេរិកផ្តល់ទៅឲ្យនោះទៀត គឺជាអាវុធធុនស្រាល ដូចជាកាំភ្លើង និងគ្រាប់តែប៉ុណ្ណោះ ប៉ុន្តែ មិនមែនអាវុធធុនធ្ងន់ ដូចជាកាំភ្លើងធំ សម្រាប់បាញ់រថក្រោះ ដែលក្រុមប្រឆាំងទាមទារសុំនោះទេ។
បើនិយាយពីផ្លូវច្បាប់វិញ លោកប្រធានាធិបតីអូបាម៉ា មិនចាំបាច់ សុំការអនុញ្ញាតិពីសភាដើម្បីបញ្ជូនអាវុធទៅក្រុមប្រឆាំងស៊ីរីទេ។ ប៉ុន្តែ តាមទម្លាប់ រដ្ឋាភិបាលអាមេរិកតែងតែពិភាក្សាជាមួយគណៈកម្មាការស៊ើបការណ៍សម្ងាត់របស់សភា និងព្រឹទ្ធសភា ជាពិសេស នៅក្នុងរឿងផ្តល់អាវុធទៅឲ្យក្រុមប្រឆាំងនៅស៊ីរីនេះតែម្តង។
បើតាមដំណឹងពីក្រុមប្រឆាំងស៊ីរីសេរី អាវុធដែលអាមេរិកផ្តល់ឲ្យនឹងអាចទៅដល់ដៃក្រុមប្រឆាំង នៅអំឡុងខែសីហាខាងមុខ។
ការផ្តល់សព្វាវុធដល់ក្រុមប្រឆាំង គឺជាជំហានដំបូងក្នុងនយោបាយយោធារបស់លោកអូបាម៉ា ដែលចង់ឲ្យមានតុល្យភាពកម្លាំងរវាងក្រុមប្រឆាំង និងទ័ពរដ្ឋាភិបាលរបស់លោកបាស្ហា អាល់អាសាដ ដែលមានជំនួយបន្ថែមពីកងទ័ពអេស្បូឡា(Hezbolla)នៅលីបង់។ លោកអូបាម៉ាកំពុងតែពិចារណាពីទម្រង់ផ្សេងទៀត ក្នុងក្របខណ្ឌផ្តល់ជំនួយយោធាទៅឲ្យក្រុមប្រឆាំងស៊ីរី។
កាលពីថ្ងៃម្សិលមិញ ប្រមុខដឹកនាំកងទ័ពអាមេរិក គឺលោកឧត្តមសេនីយ៍ ម៉ាទីន ដិមស៊ីបានលើកជូនជម្រើសអន្តរាគមន៍យោធាចំនួន៥ ទៅឲ្យលោកអូបាម៉ាពិចារណា។ ជម្រើសទាំង៥ មានដូចជា៖
-ការផ្តល់ព័ត៌មានសម្ងាត់ និងបណ្តុះបណ្តាលក្រុមទាហានប្រឆាំងដើម្បីឲ្យចេះប្រើអាវុធ។
-ការធ្វើការវាយប្រហារតាមជើងអាកាស ក្នុងរយៈពេលមានកំណត់មួយ
-ការបង្កើតតំបន់ហាមឃាត់ការហោះហើរ
-ការបង្កើតតំបន់ពិសេសមួយនៅក្នុងប្រទេសស៊ីរី ដើម្បីឲ្យក្រុមប្រឆាំងបានជ្រកកោណ រួចផុតពីការវាយប្រហាររបស់ទាហានរដ្ឋាភិបាលស៊ីរី និងចុងក្រោយ គឺ
-ការបញ្ជូនទ័ពអាមេរិកទៅស៊ីរី ដើម្បីវាយផ្តាច់យកទីតាំង ដែលមានលាក់ទុកអាវុធគីមី មកគ្រប់គ្រង រក្សាឡើងវិញ។
នៅក្នុងលិខិតផ្ញើទៅសមាជិកសភា លោកឧត្តមសេនីយ៍ ម៉ាទីន ដិមស៊ី ដែលជានាយអគ្គសេនាធិការកងទ័ពចម្រុះអាមេរិក(Chairman of the Joint Chiefs of Staff) បានរំលឹកពីផលវិបាក និងថ្លៃចំណាយខ្ពស់កប់ពពក ដើម្បីអនុវត្តន៍ផែនការយុទ្ធសាស្រ្តនីមួយៗ។ បើតាមលោកឧត្តមសេនីយ៍ ម៉ាទីន ដិមស៊ី គេមិនអាចមើលស្រាលការប្រើប្រាស់កម្លាំងទ័ព នៅស៊ីរីបានទេ។ លោកឧត្តមសេនីយ៍ ម៉ាទីន ដិមស៊ី បញ្ជាក់ថា បើគេលូកដៃ ចូលទៅក្នុងសង្រ្គាមស៊ីវិលស៊ីរី គឺគេត្រូវតស៊ូធ្វើ រហូតដល់ចប់ គឺត្រូវគិតទុកជាមុន ពីមធ្យោបាយដើម្បីរក្សាស្ថិរភាពនៅ ស៊ីរី នៅក្រោយអន្តរាគមន៍ទ័ពអាមេរិក គឺធ្វើយ៉ាងម៉េច កុំឲ្យអាមេរិកជ្រុលផុងខ្លួនក្នុងសង្រ្គាម ដូចក្នុងករណីប្រទេសអាហ្វហ្កានីស្ថាន និងអ៊ីរ៉ាក់។
នៅក្នុងសង្រ្គាមនៅអ៊ីរ៉ាក់ រយៈពេល៨ឆ្នាំ អាមេរិកបានចំណាយអស់ ៨១៣ពាន់លានដុល្លារ នេះគេ នៅមិនទាន់រាប់បញ្ចូលពីការចំណាយរាប់ពាន់លានដុល្លារផ្សេងទៀត ដែរដ្ឋាភិបាលអាមេរិកត្រូវចំណាយសម្រាប់ស្តារកាយនិតិសម្បទារបស់កងទ័ពអាមេរិកដែលរងរបួសនៅក្នុងសង្រ្គាមនោះទេ។ លោក លោកឧត្តមសេនីយ៍ ដិមស៊ីបានលើកឡើងផងដែរពីបទពិសោធន៍សង្រ្គាមជាង១០ឆ្នាំ ដែលអាមេរិកបានជាប់ផុងខ្លួន នៅអាហ្វហ្កានីស្ថាន។ សង្រ្គាមប្រយុទ្ធប្រឆាំងនឹងពួកតាលីបង់ ដ៏រ៉ាំរ៉ៃបានធ្វើឲ្យបាត់បង់ជីវិតមនុស្ស ទាំងកងទ័ព និងជនស៊ីវិល និងធ្វើឲ្យអាមេរិកខាតបង់ថវិកាអស់ ជាង ៦៤០ពាន់លានដុល្លារ។ អាហ្វហ្កានីស្ថាន និងអ៊ីរ៉ាក់ជាឧទាហរណ៍ស្រាប់។ គឺមានថ្ងៃតិចណាស់ ដែលគេមិនឃើញមានការបំផ្ទុះភេរវកម្ម សម្លាប់មនុស្ស។
ដើម្បីអនុវត្តជម្រើសយោធាទាំងប្រាំ ខាងលើ គេត្រូវចំណាយលុយច្រើនណាស់។ ជម្រើសទីមួយ របស់អាមេរិក ក្នុងការបណ្តុះបណ្តាលទាហានក្រុមប្រឆាំងស៊ីរី នឹងត្រូវធ្វើឲ្យគេចំណាយអស់លុយ ៥០០លានដុល្លារ។ ចំណែកជម្រើសយោធាបួនផ្សេងទៀត គឺសម្រាប់ជម្រើសនីមួយៗ អាមេរិកនឹងត្រូវចាយប្រមាណ ១ពាន់លានដុល្លារ ក្នុងមួយខែ។
បើតាមលោកឧត្តមសេនីយ៍ ម៉ាទីន ដិមស៊ី ដើម្បីបង្កើតតំបន់ពិសេស សម្រាប់ក្រុមប្រឆាំង ឬបង្កើតតំបន់ហាមឃាត់ការហោះហើរបាន គឺគេត្រូវប្រើទាហានអាមេរិក យន្តហោះរាប់រយ គ្រឿង នាវាចម្បាំង ឬនាវាមុជទឹក ដើម្បីអាចទប់ស្កាត់កុំឲ្យរដ្ឋាភិបាលស៊ីរីអាចប្រើយន្តហោះចម្បាំងវាយប្រហារលើក្រុមប្រឆាំង។
ការចំណាយលុយច្រើនសន្ធឹកសន្ធាប់យ៉ាងនេះ នៅមិនទាន់ឲ្យគេប្រាកដថា នឹងអាចធានាបានបង្កើតតំបន់ហាមឃាត់ការហោះហើរបានទេ ព្រោះរដ្ឋាភិបាលស៊ីរីក៏មានប្រព័ន្ធការពារទ័ពអាកាសទំនើប ជាពិសេស រដ្ឋាភិបាលស៊ីរីទើបទទួលបានមីស៊ីលទំនើបពីរុស្ស៊ីដែលអាចបាញ់បំផ្លាញ កប៉ាល់ ឬយន្តហោះបាន។
ជាសរុបមកវិញ អាមេរិកដែលចង់ផ្តល់ជំនួយយោធាដល់ក្រុមប្រឆាំងស៊ីរី នឹងត្រូវចំណាយថវិការាប់ពាន់លានដុល្លារ នេះគឺគ្រាន់តែដើម្បីតុល្យភាពកម្លាំង រវាងទ័ពរដ្ឋាភិបាល និងក្រុមប្រឆាំង ប៉ុន្តែ មិនមែនសំដៅ ដើម្បីផ្តួលរំលំរដ្ឋាភិបាលលោកបាស្ហា អាល់អាសាដទេ ដូចផ្តួលលោកសាដាម ហ៊ូសេនទេ។ ក្នុងពេលដែលរដ្ឋាភិបាលអាមេរិក កាត់បន្ថយថវិកាយោធា មកនៅត្រឹម ជាង ៥០០ពាន់លាន ក្នុងមួយឆ្នាំ ការចំណាយលុយច្រើន រាប់ពាន់លានដុល្លារ ក្នុងសង្រ្គាមនៅស៊ីរី ហើយគេមិនប្រាកដថា នឹងបញ្ចប់សង្រ្គាមស៊ីវិលបានទៀតនោះ មើលទៅ មិនមែនជាជម្រើស សមហេតុ សមផលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ