លោក Abdelaziz Bouteflika ជាប់ឆ្នោតជាប្រធានាធិបតីអាល់ហ្សេរី ជាលើកទី៤
យោងតាមលទ្ធផលបោះឆ្នោតនៅអាល់ហ្សេរី ចេញជាផ្លូវការ នៅល្ងាចថ្ងៃសុក្រម្សិលមិញ លោក Abdelaziz Bouteflika អាប់ឌែលឡាហ្ស៊ី ប៊ូតេភ្លីកា បានជាប់ឆ្នោតជាប្រធានាធិបតី ជាថ្មីម្តងទៀត ដោយទទួលជោគជ័យជាមួយសម្លេងឆ្នោតលើសលុប រហូតដល់៨១,៥៣ភាគរយ ក្នុងជុំទី១តែម្តង។ នេះជាលើកទី៤ហើយ ដែលលោកប៊ូតេភ្លីកា ឡើងកាន់អំណាចជាប្រធានាធិបតីអាល់ហ្សេរី។ អត្រាអ្នកទៅបោះឆ្នោតនៅអាល់ហ្សេរី កាលពីថ្ងៃព្រហស្បតិ៍១៧មេសា កន្លងទៅ មាន៥១,៧ភាគរយ។ ប្រធានាធិបតីបារាំងបានស្វាគមន៍ជោគជ័យរបស់លោកប៊ូតេភ្លីកា និងបានជូនពរលោកអោយទទួលជោគជ័យក្នុងការដឹកនាំអាល់ហ្សេរីបន្តទៀត។
ចុះផ្សាយនៅថ្ងៃ៖
ស្តាប់ - ០១:៤៧
លោក Abdelaziz Bouteflika អាប់ឌែលឡាហ្ស៊ី ប៊ូតេភ្លីកា អាយុ៧៧ឆ្នាំ បានជាប់ឆ្នោតជាប្រធានាធិបតីអាល់ហ្សេរី ជាលើកទី៤ ជាមួយសម្លេងឆ្នោតលើសលុប ៨១,៥៣ភាគរយ ក្នុងការបោះឆ្នោតជុំទី១តែម្តង។ លោកប៊ូតេភ្លីកា ឈ្នះលើអតីតនាយករដ្ឋមន្ត្រី របស់លោក គឺលោក Ali Benflis អាលី បិនភ្លី ដែលទទួលសម្លេងបានត្រឹមតែ១២,១៨ភាគរយប៉ុណ្ណោះ។ រីឯបេក្ខជន៤រូបទៀត បានទទួលសម្លេងតិចតួចប៉ុណ្ណោះ ពោលគឺមានពីចន្លោះ តិចជាង១ភាគរយ រហូតដល់ត្រឹម៣,៣៧ភាគរយ។
ដោយឡែក លទ្ធផលនៃការបោះឆ្នោតនេះ មិនរាប់បញ្ចូលសម្លេងឆ្នោតរបស់ប្រជាជនអាល់ហ្សេរីដែលរស់នៅបរទេសនោះទេ។ សម្លេងឆ្នោតប្រជាជនអាល់ហ្សេរីនៅបរទេស នឹងយកទៅបូកបញ្ចូលជាមួយសម្លេងឆ្នោតនេះ នៅពេលក្រុមប្រឹក្សាធម្មនុញ្ញអោយសុពលភាពលើលទ្ធផលបោះឆ្នោតផ្លូវការ នៅពេលខាងមុខ។ សម្លេងឆ្នោតប្រជាជនអាល់ហ្សេរីនៅបរទេស មិនអាចផ្លាស់ប្តូរលទ្ធផលបោះឆ្នោតផ្លូវការក្នុងស្រុកនោះទេ ព្រោះថា លោកប៊ូតេភ្លីកា ទទួលសម្លេងឆ្នោតលើសលុប។ ប្រធានាធិបតីប៊ូតេភ្លីកា អាយុ៧៧ឆ្នាំ មានសុខភាពមិនសូវមាំទាំទេ តាំងពីពេលលោកជួយបញ្ហាសរសៃឈាមខួរក្បាល កាលពីឆ្នាំមុននេះមក។
អតីតនាយករដ្ឋមន្ត្រី អាលី បិនភ្លី ដែលជាបេក្ខជនគូប្រជែងរបស់លោកប៊ូតេភ្លីកា ដែលទទួលសម្លេងឆ្នោតត្រឹមជាង១២ភាគរយនោះ បានបដិសេធមិនទទួលស្គាល់លទ្ធផលបោះឆ្នោតនេះទេ។ លោកបិនភ្លី បរិហារថា ការបោះឆ្នោតជុំទី១ ថ្ងៃ១៧មេសា ពោរពេញទៅដោយការក្លែងបន្លំ។ លោកបិនភ្លីថែមទាំងប្រដូចជោគជ័យលើសលុបរបស់លោកប៊ូតេភ្លីកា ទៅនឹងជោគជ័យនៃការបោះឆ្នោតរបស់លោកគឹម ជុងអ៊ុន នៅកូរ៉េខាងជើងទៀតផង ពោលគឺជាលទ្ធផលបោះឆ្នោត ដែលមិនគួរអោយជឿជាក់បាន។ ទន្ទឹមនេះដែរ បក្សប្រឆាំងផ្សេងទៀត ក៏បានបរិហារការបោះឆ្នោតនេះដូចគ្នាដែរ។ បេក្ខជនមូសា ទូអាទី ដែលទទួលបានសម្លេងឆ្នោត តិចជាង១ភាគរយនោះ មានបំណងនឹងប្តឹងទៅដល់ក្រុមប្រឹក្សាធម្មនុញ្ញទៀតផង។
គួររំលឹកដែរថា ក្នុងការបោះឆ្នោតប្រធានាធិបតីនេះ គណបក្សអ៊ីស្លាមមួយចំនួន បានធ្វើពហិការមិនចូលរួមបោះឆ្នោត។ ប្រធានទទួលបន្ទុកផ្នែកឃោសនាបោះឆ្នោតរបស់លោកប៊ូតេភ្លីកា បានចេញមុខបដិសេធការចោទប្រកាន់ទាក់ទងនឹងការក្លែងបន្លំអស់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ