ក្រសួងរ៉ែនិងថាមពល ព្រមានចាត់វិធានការតាមផ្លូវច្បាប់ប្រឆាំងលោក Alex
ក្រសួងរ៉ែ និងថាមពល បានព្រមានចាត់វិធានការផ្លូវច្បាប់ចំពោះសកម្មជនការពារបរិស្ថានគឺលោក Alexស្ថាបនិកអង្គការចលនាមាតាធម្មជាតិ ដោយចោទថាសកម្មជនរូបនេះនិយាយបង្ខូចកេរ្ត៍ឈ្មោះរបស់ក្រសួង។ ប៉ុន្តែ រហូតមកដល់ថ្ងៃទី ៣ តុលានេះក្រសួងមិនទាន់បានចាត់វិធានការតាមផ្លូវច្បាប់ណាមួយប្រឆាំងលោក Alex នៅឡើយទេ។ ដោយឡែក លោក Alex បានឆ្លើយតបវិញថា ការពិត ឬក៏ជាការនិយាយបំផ្លើសនោះ ទុកឲ្យសាធារណៈជនជាអ្នកពិចារណា ហើយលោកក៏មិនខា្លចចំពោះការព្រមានរបស់ក្រសួងដែរ។
ចុះផ្សាយនៅថ្ងៃ៖
ស្តាប់ - ០១:៥៦
ក្រសួងរ៉ែ និងថាមពល ទើបតែបានចេញសេចក្តីបំភ្លឺ បន្ទាប់ពីក្រសួងបានលើកឡើងថា លោក Alex បានបំប៉ោងចំនួនថាមពលអគ្គិសនីដល់ទៅ ១៨០ មេហ្គាវ៉ាត់ នៅក្នុងគម្រោងសាងសង់ទំនប់វារីអគ្គិសនីស្ទឹងជាងអារ៉ែង។ ប៉ុន្តែរដ្ឋលេខាធិការក្រសួងរ៉ែ និងថាមពល លោកអ៊ិត ប្រាំង បានលើកឡើងក្នុងសន្និសីទសារព័ត៌មានកាលពីថ្ងៃទី ៣០ កញ្ញា ថាកម្លាំងថាមពលអគ្គិសនីនេះ គឺមានត្រឹមតែ ១០៨ មេហ្គាវ៉ាត់តែប៉ុណ្ណោះ។ ជាងនេះទៅទៀត ក្រសួងបានបន្តថា លោក Alex ចោទប្រកាន់ក្រសួងដោយគ្មានមូលដ្ឋានត្រឹមត្រូវថា បានប្រព្រឹត្តិអំពើពុករលួយជាមួយនឹងក្រុមហ៊ុន ស៊ីណូហាយត្រូ ។
លោកអ៊ិត ប្រាំង បានបញ្ជាក់ប្រាប់វិទ្យុបារាំងនៅព្រឹកថ្ងៃសុក្រនេះថា ក្រសួង គ្រាន់តែឆ្លើយបំភ្លឺដល់សាធារណជនថា អ្វីដែលលោក Alex បានលើកឡើងនោះ មិនមែនជាការពិតនោះទេ ហើយវាថែមទាំងធ្វើឲ្យប៉ះពាល់ដល់កេរ្តិ៍ឈ្មោះរបស់ក្រសួងថែមទៀត។ លោកបន្តថា ប្រសិនបើលោក Alex ចង់បង្ហាញដល់សាធារណៈជនថា ក្រសួងរ៉ែ និងថាមពលពិតជាមានអំពើពុករលួយមាននោះ លោកអាចដាក់ពាក្យបណ្តឹងទៅកាន់អង្គភាពប្រឆាំងអំពើពុករលួយ ឲ្យធ្វើការស៊ើបអង្កេតដោយមិនចាំបាច់ទៅបរិហារក្រសួងតាមរយៈសារព័ត៌មាននោះទេ។
ក៏ប៉ុន្តែលោក Alex បានឆ្លើយបញ្ជាក់ប្រាប់វិទ្យុបារាំងនៅព្រឹកមិញនេះដែរថា អ្វីដែលលោកបាននិយាយតាមសារព័ត៌មានជាការពិត ឬមួយក៏ជាការនិយាយបំផ្លើសនោះ សូមទុកឲ្យប្រជាពលរដ្ឋខ្មែរជាអ្នកពិចារណាដោយខ្លួនឯង ដោយលោកសុំមិនអត្ថាធិប្បាយនោះទេ។
សូមបញ្ជាក់ថា បន្ទាប់ពីមានការផ្សព្វផ្សាយយ៉ាងផុសផុលនៅក្នុងបណ្តាញសារព័ត៌មានស្តីពីផលប៉ះពាល់ នៃគម្រោងសាងសង់ទំនប់វារីអគ្គិសនីស្ទឹងជាយអារ៉ែង នៅរយៈពេលចុងក្រោយនេះមក ថ្មីនេះ ទាំងលោកនាយករដ្ឋមន្ត្រី ទាំងប្រធានបក្សប្រឆាំង និងក្រសួងរ៉ែ និងថាមពល បានបញ្ជាក់ថា រហូតមកទល់នឹងពេលនេះ រដ្ឋាភិបាលកម្ពុជា នៅមិនទាន់សម្រេចឲ្យមានការការសាងសង់ទំនប់ជាយអារ៉ែងនេះ នៅឡើយទេ ដោយរង់ចាំមើលលទ្ធផលនៃការសិក្សាស្រាវជ្រាវពីផលប៉ះពាល់ និងផលប្រយោជន៍ជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ