កម្ពុជា - 
អត្ថបទចុះ​ផ្សាយ​នៅ​ថ្ងៃ ពុធ 09 ឧសភា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ ពុធ 09 ឧសភា 2012

ការទស្សន៍ទាយ​ក្នុង​ពិធី​ច្រត់​ព្រះនង្គ័ល​បង្ហាញថា​ពោតនិងសណ្តែក​ទទួល​ទិន្នផល​ល្អ​

គោបារបស់ព្រះរាជាមួយនឹមបានបរិភោគ​ ពោត សណ្តែក និងស្មៅ ​បង្ហាញថា​ ពោត​ និង​សណ្តែក​ទទួល​ទិន្នផល​ល្អ​
គោបារបស់ព្រះរាជាមួយនឹមបានបរិភោគ​ ពោត សណ្តែក និងស្មៅ ​បង្ហាញថា​ ពោត​ និង​សណ្តែក​ទទួល​ទិន្នផល​ល្អ​
© ស៊ីវ​ ចាន់ណា

ដោយ លី ម៉េងហួរ

ព្រះរាជ​ពិធី​ច្រត់​ព្រះនង្គ័ល​បាន​ធ្វើ​ឡើង​នៅ​ព្រឹកថ្ងៃទី​៩ឧសភា​នេះ​ នៅ​ទីលាន​ព្រះ​ស្រែ​វាល​ព្រះមេរុ ​ខាងជើង​ ជាប់​ព្រះបរម​រាជវាំង​។ ការ​ផ្សង​ប្រផ្នូល ​ក្នុង​ព្រះរាជ​ពិធី ​ក្រោម​ព្រះរាជាធិបតី​ព្រះមហាក្សត្រ​ នៅ​ព្រឹក​មិញ ​បង្ហាញថា ​ពោត​ ទទួល​ទិន្នផល​ល្អប្រសើរ​។ រីឯ​សណ្តែក ទទួល​ផល​ល្អ​។ ក្នុងនោះ កម្លាំង​អូសទាញ សម្រាប់​ធ្វើ​កសិកម្ម ដូចជា គោ​ក្របី និង​សេះ មាន​ជំងឺ​ដង្កាត់​បន្តិចបន្តួច។
 

សេចក្តីរាយការណ៍របស់​លី ម៉េងហួរ
 

09/05/2012 by លី ម៉េងហួរ

គោបា​របស់​ព្រះរាជា​មួយ​នឹម ​បាន​បរិភោគ​ពោត ​សណ្តែក ​និង​ស្មៅ​ ក្នុងចំណោម​អាហារ​ ៧ មុខ ​ដែល​ត្រូវបាន​តម្កល់​លើ​ជើង​ពាន​ នៅ​កណ្តាល​ទីលាន​ព្រះ​សែ វាល​ព្រះមេរុ​ក្នុង​ព្រះរាជ​ពិធី​ច្រត់​ព្រះនង្គ័ល ​នៅ​ថ្ងៃ៤​រោច​ខែ​ពិសាខ​ ត្រូវ​នឹង​ថ្ងៃទី​៩ឧសភា​នេះ។

 
ព្រះរាជ​ពិធី​ច្រត់​ព្រះនង្គ័ល​នៅ​ឆ្នាំ​នេះ ​ព្រះ​អង្គម្ចាស់​ នរោត្តម​ ចក្រាវុឌ្ឍ​ បុត្រា​របស់​សម្តេច​ក្រុមព្រះ ​នរោត្តម ​រណឫទ្ធិ​ ជា​ស្តេច​មេឃ ​និង​អ្នក​អង្គម្ចាស់​ក្សត្រី​ ស៊ីសុវត្ថិ ចាន់ស៊ីដា​ បុត្រី​របស់​សម្តេចព្រះរាម​ នរោត្តម​ បុប្ផា​ទេវី​ ជា​ព្រះ​មេហួ​។
 
ការ​ផ្សង​ប្រផ្នូល​តាមរយៈ​គោ​ព្រះរាជា​ បាន​ធ្វើឡើង​បន្ទាប់​ពី​ពិធី​ភ្ជួររាស់ ​សាប ព្រោះ​ព្រះ​ស្រែ​ ដែល​ស្តេច​មេឃ និង​ព្រះ​មេ​ហួ ធ្វើ​ជា​និមិត្តរូប នៃ​ការចាប់ផ្តើម​រដូវ​ធ្វើស្រែ​ចម្ការ នៅក្នុង​ព្រះរាជ​ពិធី​ច្រត់​ព្រះនង្គ័ល​។
 
លទ្ធផល​ ត្រូវបាន​លោក​តា​អាចារ្យ​ បានប្រកាស​ថា ១-​ពោត ក្នុង​ឆ្នាំនេះ ​ទទួល​ផល​បាន​ល្អប្រសើរ​។ ​២-​សណ្តែក​ទទួលផល​បានល្អ​។ ៣-​ស្មៅ ជា​ចំណី​អាហារ​របស់​សត្វ​ពាហនៈ​ទូទៅ​ ប៉ុន្តែ​ក្នុង​ឱកាស​នេះ ​ដែល​គោ​ឧសភរាជ ​បាន​បរិភោគ​ស្មៅ ​បានសេចក្តី​ថា ឆ្នាំ​នេះ​កម្លាំង​អូស​ទាញ​ទាំងអស់​ មាន​គោ​ក្របី​ និង​សេះ ​ត្រូវ​ជួប​ប្រទះ​នឹង​ជំងឺ​តម្កាត់​បៀតបៀន​បន្តិច​បន្តួច។
ព្រះរាជ​ពិធី​ច្រត់​ព្រះនង្គ័ល ជា​ការប្រកាស​ដល់​ប្រជាកសិករ ​ត្រូវ​ត្រៀម​លក្ខណៈ​សម្បត្តិ ​រៀបចំ​ការងារ​បង្ក​បង្កើន​ផល ខណៈ​ដែល​រដូវវស្សា​ចូលមក​ដល់​ហើយ​។​ការ​ផ្សង​ប្រផ្នូល តាមរយៈ​ការបរិភោគ​របស់​គោ​ឧសភរាជ​ដូច្នេះ នាំ​ឲ្យ​ប្រជា​កសិករ​មួយចំនួន​ ព្រួយ​បារម្ភ​ ដោយសារ​ថា គោ​ឧសភរាជ​ មិន​បាន​បរិភោគ​ស្រូវ ​និង​ទឹក ​ដែល​ទំនាយ​ទាយ​ថា ​ស្រូវ​នឹង​មិន​សូវ​បាន​ទិន្នផល​ល្អ ​ហើយ​ក៏​នឹង​មិន​មាន​ទឹក​គ្រប់គ្រាន់​ សម្រាប់​​ធ្វើស្រែ​ថែមទៀត​។
 
ការ​ផ្សង​ប្រផ្នូល​ក្នុង​ព្រះរាជ​ពិធី​ច្រត់​ព្រះនង្គ័ល​ ពេលនេះ​ គឺ​ដូចគ្នា​នឹង​ឆ្នាំ​មុន​។​ នៅ​ឆ្នាំ​មុន​ ទោះបីជា​ទឹកជំនន់​បាន​បំផ្លាញ​ស្រូវ​ជាង ​២៦​ម៉ឺន​ហិកតា ​ក៏​ប៉ុន្តែ​កម្ពុជា ទទួល​បាន​ស្រូវ​ ៨,៧៨ លានតោន​។យ៉ាងណា​ក៏ដោយ​ក្នុង​រយៈពេល​ប៉ុន្មាន​ថ្ងៃ​ជាប់ៗ​គ្នា​នេះ ​ភ្លៀង​ធ្លាក់​យ៉ាង​ច្រើន​នៅ​គ្រប់​ទិសទី​ទូទាំង​ប្រទេស៕

tags: កម្ពុជា - កសិកម្ម - សង្គម
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close