ប្រធានាធិបតីអាមេរិកសរសើរការបោះឆ្នោតនៅអាហ្វហ្កានីស្ថាន ថាសំខាន់សម្រាប់លទ្ធិប្រជាធិបតេយ្យ
នៅថ្ងៃសៅរ៍ម្សិលមិញ ប្រធានាធិបតីអាមេរិកបារ៉ាក់ អូបាម៉ា បានសំដែងការស្វាគមន៍ចំពោះការបោះឆ្នោតប្រធានាធិបតី នៅអាហ្វហ្កានីស្ថាន។ លោកអូបាម៉ាលើកសរសើរថា ការបោះឆ្នោតនេះមានសារៈសំខាន់ដើម្បីធានាបាននូវអនាគតលទ្ធិប្រជាធិបតេយ្យអាហ្វហ្កានីស្ថាន និងធានាអោយសហគមន៍អន្តរជាតិបន្តជំនួយខ្លួនសម្រាប់អាហ្វហ្កានីស្ថាន។ យោងតាមអាជ្ញាធរអាហ្វហ្កានីស្ថាន ក្នុងចំណោមអ្នកបោះឆ្នោត១៥លាននាក់ អត្រាអ្នកចូលរួមបោះឆ្នោតនៅអាហ្វហ្កានីស្ថាន ថ្ងៃសៅរ៍ម្សិលមិញ អាចមានដល់ជាង៥០ភាគរយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
នៅថ្ងៃសៅរ៍ម្សិលមិញ ប្រធានាធិបតីអាមេរិក បារ៉ាក់ អូបាម៉ា បានចេញសេចក្តីថ្លែងការណ៍មួយ ស្វាគមការបោះឆ្នោតប្រធានាធិបតីនៅអាហ្វហ្កានីស្ថាន ដោយលើកឡើងថា តំណាងអោយប្រជាជនអាមេរិកទាំងមូល លោកសូមសរសើរប្រជាជនអាហ្វហ្កានីស្ថានរាប់លាននាក់ ដែលបានចូលរួមការបោះឆ្នោតជាប្រវត្តិសាស្ត្រនេះ។
ការបោះឆ្នោតប្រធានាធិបតីអាហ្វហ្កានីស្ថានជុំទី១ ម្សិលមិញ ជាការបិទបញ្ចប់អាណត្តិដឹកនាំរបស់លោកហាមីឌ កាហ្សៃ។ ការបោះឆ្នោតបានប្រព្រឹត្តទៅដោយគ្មានការប៉ះទង្គិចអ្វីធំដុំទេ ទោះជាមានការគំរាមពីក្រុមឧទ្ទាមតាលីបង់ក្តី។ យោងតាមអាជ្ញាធរអាហ្វហ្កានីស្ថាន អត្រាអ្នកចូលរួមបោះឆ្នោតអាចមានដល់ជាង៥០ភាគរយ។ ប្រសិនបើមានជាង៥០ភាគរយមែននោះ អត្រានេះគឺខ្ពស់ជាងអត្រាអ្នកចូលរួមបោះឆ្នោតកាលពីឆ្នាំ២០០៩ ដែលកាលណោះ មានតែ៣០ភាគរយប៉ុណ្ណោះ។
ប្រធានាធិបតីអាមេរិក បានវាយតម្លៃការបោះឆ្នោតអាហ្វហ្កានីស្ថាន ថាមានសារៈសំខាន់ ដើម្បីធានាអនាគតនៃលទ្ធិប្រជាធិបតេយ្យនៅអាហ្វហ្កានីស្ថាន។ លោកអូបាម៉ាមានទំនុកចិត្តនិងជឿជាក់លើអាជ្ញាធរទទួលបន្ទុកបោះឆ្នោតអាហ្វហ្កានីស្ថានថា នឹងបំពេញភារកិច្ចបានល្អ ក្នុងពេលប៉ុន្មានសប្តាហ៍ខាងមុខនេះ ដើម្បីប្រកាសលទ្ធផលនៃការបោះឆ្នោតជុំទី១នេះ។ លទ្ធផលបឋមនៃការបោះឆ្នោតប្រធានាធិបតីជុំទី១ នឹងប្រកាសឡើងនៅថ្ងៃ២៤មេសាខាងមុខនេះ។ ប្រសិនបើបេក្ខជនមិនបានទទួលសម្លេងលើសពី៥០ភាគរយ ដើម្បីឈ្នះជុំទី១ទេ ការបោះឆ្នោតជុំទី២នឹងប្រព្រឹត្តទៅនៅថ្ងៃ ២៨ឧសភា។
ដោយឡែក អង្គការអូតង់ត្រូវដកកងទ័ពខ្លួនចេញពីអាហ្វហ្កានីស្ថាន នៅដំណាច់ឆ្នាំ២០១៤។ លោកអូបាម៉ាចង់អោយទាហានអាមេរិកមួយម៉ឺននាក់ បន្តវត្តមានក្នុងទឹកដីអាហ្វហ្កានីស្ថាន ក្រោយឆ្នាំ២០១៤។ ក្នុងចំណោមទាហានមួយម៉ឺននាក់នេះ ក៏មានកងកម្លាំងពិសេសសម្រាប់បេសកកម្មកំចាត់ភេរវកម្មផងដែរ។
ប៉ុន្តែ កន្លងមក លោកហាមីឌ កាហ្សៃ បានបដិសេធចុះហត្ថលេខាលើកិច្ចព្រមព្រៀងទ្វេភាគីជាមួយអាមេរិក ដើម្បីអោយកងទ័ពអាមេរិកអាចបន្តវត្តមាននៅអាហ្វហ្កានីស្ថានទេ។ ប្រសិនបើអាមេរិកនិងអាហ្វហ្កានីស្ថាន មិនអាចសម្រេចចេញកិច្ចព្រមព្រៀងជាមួយគ្នាទេ លោកអូបាម៉ាប្រាប់ថា អាមេរិកគ្រោងដកកងទ័ពខ្លួនអោយអស់ពីទឹកដីអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ