ACU ជួបជាមួយផ្នែកឯកជនជាលើកទី២ ដើម្បីជជែកពិភាក្សាពីវិធីសាស្ត្រប្រឆាំងអំពើពុករលួយឲ្យមានប្រសិទ្ធភាព
អង្គភាពប្រឆាំងអំពើពុករលួយ (ACU) បានជួបជាមួយផ្នែកឯកជនជាលើកទី២ នៅថ្ងៃអង្គារទី៩កញ្ញានេះ ដើម្បីជជែកពិភាក្សាបន្ថែមទៀត ដើម្បីចែករំលែកបទពិសោធ និងរិះរកវិធីសាស្ត្រប្រឆាំងអំពើពុករលួយឲ្យមានប្រសិទ្ធភាព។ បើតាមការគ្រោងទុក អង្គភាពប្រឆាំងអំពើពុករលួយ នឹងសហការជាមួយវិស័យឯកជន ដើម្បីរៀបចំឯកសារណែនាំមួយ សម្រាប់ផ្នែកឯកជន យកទៅប្រើដើម្បីជៀងវាងការប្រព្រឹត្តអំពើពុករលួយ ក្នុងដំណើរការអាជីវកម្ម។
ចុះផ្សាយនៅថ្ងៃ៖
ស្តាប់ - ០២:០៣
អង្គភាពប្រឆាំងអំពើពុករលួយ (ACU) ជួបជាថ្មីម្តងទៀត ជាមួយតំណាងវិស័យឯកជន ប្រមាណ៣០ មកពីផ្នែកអប់រំ ផ្នែកធានារ៉ាប់រង សវនកម្មហិរញ្ញវត្ថុខ្នាតតូច អចលទ្រព្យ សហគ្រាសធនតូចនិងមធ្យម សមាគមពាណិជ្ជកម្ម និងសភាពាណិជ្ជកម្មអន្តរជាតិ ជាដើម។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បាននិយាយថា ក្នុងរឿងអំពើពុករលួយនេះ មិនអាចមានតែអ្នកស៊ី អត់អ្នកសូក ហើយក៏មិនអាចមានតែអ្នកសូក អត់អ្នកស៊ីនោះទេ។ លោកថា ទាល់តែមានទៅមានមក ហើយគេពុំអាចបន្ទោស ឬចោទតែម្ខាងបានឡើយ។
ក្នុងជំនួបលើកទី២នេះ ប្រធានអង្គភាពប្រឆាំងអំពើពុករលួយ បានលើកឡើងថា ខាងអង្គភាពចង់សហការឲ្យកាន់តែជិតស្និទ្ធជាមួយវិស័យឯកជន និងចង់ស្តាប់ពីទុក្ខលំបាករបស់វិស័យនេះ។ លោក ឱម យ៉ិនទៀង បញ្ជាក់ថា ផ្នែកឯកជន និងរដ្ឋ គឺរួមរស់សុខទុក្ខជាមួយគ្នា ហើយសហការដោះស្រាយបញ្ហាជាមួយគ្នា។
ដើម្បីកម្ចាត់អំពើពុករលួយក្នុងផ្នែកឯកជននេះ លោកប្រធានអង្គភាពប្រឆាំងអំពើពុករលួយ បានឲ្យដឹងថា គេត្រូវចាប់ផ្តើមឈប់សូក ហើយរាយការណ៍ពីអ្នកទារសំណូក។
លោក ឱម យ៉ិនទៀង បាននិយាយផ្តល់ក្តីសង្ឃឹមដល់ផ្នែកឯកជនថា អង្គភាពប្រឆាំងអំពើពុករលួយ នៅក្បែរផ្នែកឯកជនជានិច្ច ហើយថា បើមានមន្ត្រីទារសំណូក ត្រូវរាយការណ៍។
តបនឹងសំណួរអ្នកកាសែតដែលថា កន្លងមក អង្គភាពនេះ ចាប់ចងតែមន្ត្រីថ្នាក់តូចៗ លោក ឱម យ៉ិនទៀង ឆ្លើយបែបប្រៀបធៀបទៅវិញថា អង្គភាពរបស់លោក ដូចជាអង្រុតអ៊ីចឹង ត្រីតូច ត្រីធំក្តី ចាប់ទាំងអស់ ឲ្យតែចូលអង្រុតរបស់លោក គឺចាប់ដូចគ្នា។
គួរបញ្ជាក់ថា ក្នុងការជជែកពិភាក្សាគ្នាជាលើកទី២នេះ អង្គភាពប្រឆាំងអំពើពុករលួយ បានជំរុញឲ្យថ្នាក់ដឹកនាំវិស័យឯកជន បង្រៀនដល់បុគ្គលិករបស់ខ្លួន កុំឲ្យប្រព្រឹត្តអំពើពុករលួយ ហើយត្រូវប្រជុំជារឿយៗ ដើម្បីដាស់សតិស្មារតីដល់បុគ្គលិកក្រោមឱវាទ កុំឲ្យសូកប៉ាន់។ មិនតែប៉ុណ្ណោះ លោក ឱម យ៉ិនទៀង បញ្ជាក់ថា ផ្នែកឯកជន ត្រូវចែងនៅក្នុងបទបញ្ជាវិន័យផ្ទៃក្នុងរបស់ខ្លួន ពីការមិនសូកប៉ាន និងត្រូវបង្រៀនណែនាំដល់បុគ្គលិក ពីរបៀបប្តឹង តវ៉ា បើមានករណីទារសំណូក។
បើតាមការគ្រោងទុកអង្គភាពប្រឆាំងអំពើពុករលួយ នឹងសហការជាមួយវិស័យឯកជន ដើម្បីរៀបចំឯកសារណែនាំមួយ សម្រាប់ផ្នែកឯកជន ដែលគ្រោងនឹងចេញផ្សាយនៅ ចុងឆ្នាំ២០១៤នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ