កង្វះទស្សនវិស័យវែងឆ្ងាយគឺជាឧបសគ្គក្នុងការអភិវឌ្ឍន៍ប្រទេស
ចុះផ្សាយនៅថ្ងៃ៖
ស្តាប់ - ០៥:០៥
ប្រទេសកម្ពុជាកំពុងស្ថិតក្នុងដំណាក់កាលអភិវឌ្ឍន៍ ដើម្បីស្តារប្រទេសជាតិឡើងវិញ។ ដើម្បីធានានិរន្តរភាពនៃការអភិវឌ្ឍន៍ វាទាមទារឲ្យមានទស្សនៈវិស័យវែងឆ្ងាយពីសំណាក់អ្នកអ្នកដឹកនាំ និងអ្នកជំនាញទាំងឡាយក្នុងគ្រប់វិស័យ។ ប៉ុន្តែ រហូតមកទល់ពេលនេះ មានគម្រោងអភិវឌ្ឍន៍ជាច្រើន បានបង្កផលវិបាកអវិជ្ជមានធ្ងន់ធ្ងរ ដោយសារតែកង្វះទស្សនវិស័យរបស់អ្នកសម្រេចចិត្ត និងអាជ្ញាធរមានសមត្ថកិច្ច។ កង្វះទស្សនវិស័យវែងឆ្ងាយ ក៏ជាបញ្ហាធំធេងដែរសម្រាប់បក្សនយោបាយ ហើយវាជាប្រភពនៃបរាជ័យក្នុងការដឹកនាំ។
ជំនន់ទឹកភ្លៀងដែលតែងជន់លិចតំបន់ជាច្រើនក្នុងរាជធានីភ្នំពេញ សំណង់ខុសបច្ចេកទេស និងខុសស្ថាបត្យកម្មជាច្រើនដែលធ្វើឲ្យខូចសោភណភាពទីក្រុង រហូតដល់ការបាក់ច្រាំងទន្លេដោយសារតែអាជីវកម្មបូមខ្សាច់។ល។ និង។ល។ សុទ្ធសឹងជាផលវិបាកអវិជ្ជមានដែលកើតឡើងដោយសារសេចក្តីសម្រេចដែលខ្វះទស្សនៈវិស័យវែងឆ្ងាយ។
នៅមានបញ្ហារាប់រយជំពូកផ្សេងទៀតដែលកំពុងកើតឡើងនៅក្នុងរាជធានីភ្នំពេញឬនៅតាមបណ្តាខេត្តដែលបង្ហាញអំពីកង្វះទស្សនៈវិស័យវែងវែងឆ្ងាយ របស់សមត្ថកិច្ចកម្ពុជា។ ទំនាស់ដីធ្លីដែលកើតចេញពីការផ្តល់ដីសម្បទានសេដ្ឋកិច្ច និងការផ្តល់អាជ្ញាប័ណ្ណដល់ក្រុមហ៊ុនអាជីវកម្មធនធានធម្មជាតិ និងព្រៃឈើជាដើម ក៏ជាឧទាហរណ៍ស្តីពីការអភិវឌ្ឍន៍ដែលមិនបានគិតគូរវែងឆ្ងាយ និងកង្វះភាពល្អិតល្អន់មុននឹងធ្វើសេចក្តីសម្រេចចិត្ត។
នៅពេលដែលគេផ្តល់អាជ្ញាប័ណ្ណឲ្យក្រុមហ៊ុនចាក់ដីលុបបឹងនានា តើគេបានសិក្សាហើយឬនៅថា គេគួរធ្វើអ្វីខ្លះដើម្បីរំដោះទឹកចេញពីក្រុង? នៅពេលដែលគេអនុញ្ញាតឲ្យក្រុមហ៊ុនមួយបូមខ្សាច់ពីទន្លេឬពីសមុទ្រ តើគេបានគិតគូរដែរឬទេថា វានឹងផ្តល់ផលអវិជ្ជមានបែបណាខ្លះទៅលើបរិស្ថាន និងទៅលើជីវភាពប្រជាជនដែលរស់នៅតាមច្រាំងទន្លេ? ប្រសិនបើគេផ្តល់អាជ្ញាប័ណ្ណឲ្យក្រុមហ៊ុនមួយធ្វើអាជីវកម្មអ្វីមួយ តើគេបានសិក្សាច្បាស់ហើយឬនៅថា អាជីវកម្មនោះបង្កផលប៉ះពាល់អ្វីខ្លះដល់បរិស្ថាន និងសុខភាពប្រជាជននៅជុំវិញ?
ទាំងនេះជាសំណួរពីរបីក្នុងចំណោមសំណួររាប់មិនអស់សម្រាប់គម្រោងអភិវឌ្ឍន៍នៅកម្ពុជា។ ចម្លើយពិតជាងាយនឹងរកឃើញណាស់។ ប្រសិនបើគេបានសិក្សាជាមុននិងប្រសិនបើគេមានទស្សនវិស័យវែងឆ្ងាយបន្តិច ម្ល៉េះសមទឹកមិនជន់លិចក្រុងភ្នំពេញយ៉ាងអាក្រក់ដូច្នេះឡើយ ហើយក៏គ្មានបញ្ហាបាក់ច្រាំងទន្លេបាក់ផ្ទះប្រជាជន វត្តអារាមចូលក្នុងទន្លេដែរ។ ចំណែកឯផលប៉ះពាល់ខាងបរិស្ថាននិងសុខភាពប្រជាជនក៏មិនអាចកើតមានដែរ។
ងាកទៅមើលដីសម្បទានសេដ្ឋកិច្ចដែលរដ្ឋាភិបាលផ្តល់ឲ្យក្រុមហ៊ុនឯកជននោះវិញ ក៏ផលប៉ះពាល់ជាបញ្ហាធ្ងន់ធ្ងរដែរ។ ក្រៅពីប៉ះពាល់ដល់ជីវភាពរស់នៅរបស់ប្រជាជន ព្រៃឈើក៏ត្រូវបានបំផ្លាញយ៉ាងដំណំ។ នៅទីក្រុងភ្នំពេញឯណេះ សំណង់កើតមានគ្រប់ទីកន្លែង តែសំណង់ជាច្រើនមិនគោរពតាមប្លង់ស្ថាបត្យកម្មរបស់ទីក្រុងដ៏ចំណាស់នេះឡើយ។ សំណង់កាស៊ីណូក្បែរពុទ្ធសាសនបណ្ឌិត និងសំណង់ខ្ពស់ៗក្បែរព្រះរាជវាំង...គឺជាឧទាហរណ៍ស្រាប់។
ជាការពិតណាស់ ការរៀបចំផែនការក្នុងរយៈពេលវែងនិងច្បាស់លាស់ គឺជាកត្តាធានាការអភិវឌ្ឍន៍ប្រកបដោយនិរន្តរភាព។ ទស្សនវិស័យវែងឆ្ងាយក៏ជាមាគ៌ាឆ្ពោះទៅរកភាពជោគជ័យលើគ្រប់វិស័យ ហើយវាជាទស្សនៈវិជ្ជាដែលគ្រប់អ្នកដឹកនាំ អ្នកតម្រង់ទិសសង្គម និងអ្នកសម្រេចចិត្តទាំងឡាយត្រូវប្រកាន់យកជាចាំបាច់។ ការនឹកឃើញអ្វីធ្វើហ្នឹង ធ្វើមួយជំហានដោះស្រាយបញ្ហាមួយជំហានវាគឺជាការប្រថុយប្រថានដែលពិបាកគេចផុតពីបរាជ័យ។
ម្យ៉ាងទៀត ទស្សនវិស័យវែងឆ្ងាយ ក៏មានតម្លៃសម្រាប់បក្សនយោបាយដែរជាពិសេសបក្សប្រឆាំងតែម្តង។ តើពួកគេត្រូវកសាងមូលដ្ឋានគ្រឹះបែបណាខ្លះ ដើម្បីឈានទៅដឹកនាំប្រទេស? ជាពិសេសក្នុងបរិបទប្រទេសកម្ពុជាដែលប្រព័ន្ធរដ្ឋ និងកម្លាំងប្រដាប់អាវុធស្ថិតក្រោមការគ្រប់គ្រងរបស់បក្សកាន់អំណាច? នេះគឺជាបញ្ហាដែលទាមទារនូវការគិតគូរនិងត្រៀមរៀបចំទុកជាមុនឲ្យបានច្បាស់លាស់មុនឈានទៅកាន់អំណាច។ សូម្បីតែអាជីវកម្មតូចមួយក៏ទាមទារឲ្យមានផែនការនិងទស្សនវិស័យច្បាស់លាស់ដែរទើបអាចសម្រេចបានជោគជ័យ។ ចុះទម្រាំការដឹកនាំប្រទេសទាំងមូល?
សរុបមកវិញ មានឧទាហរណ៍ច្រើនណាស់ទាំងអតីតកាល ទាំងបច្ចុប្បន្នកាលដែលបង្ហាញពីបរាជ័យនៃទស្សនវិស័យភ្លើងចំបើងរបស់អាជ្ញាធរនិងរបស់អ្នកនយោបាយខ្មែរ។ ស្ថានភាពលិចអណ្តែតៗ ឬក៏លិចច្រើនជាងអណ្តែតរបស់ប្រទេសកម្ពុជា គឺជាផលវិបាកនៃកង្វះទស្សនវិស័យវែងឆ្ងាយ របស់អ្នកនយោបាយយ៉ាងពិតប្រាកដ។
ដូច្នេះ ដល់ពេលហើយដែលអ្នកនយោបាយនិងអ្នកដឹកនាំប្រទេសគួរតែសម្លឹងទៅមុខឲ្យបានវែងឆ្ងាយមុននឹងសម្រេចចិត្តធ្វើអ្វីមួយ ពីព្រោះវាទាក់ទងនឹងអនាគតរបស់ប្រទេសជាតិ។ ផ្ទុយទៅវិញ ប្រសិនបើនយោបាយតាមយថាកម្មនៅតែបន្ត ប្រវត្តិសាស្ត្រ ប្រទេសកម្ពុជានឹងដើរជាន់គន្លងចាស់ដោយចៀសមិនផុតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ