ស្លាប់៣៧៥នាក់ របួស៧៥៥នាក់នៅថ្ងៃបិទបញ្ចប់ពិធីបុណ្យអុំទូក
បុណ្យអុំទូកបានបិទបញ្ចប់ជាមួយសោកនាដកម្មដែលមិនធា្លប់មានក្នុងរយៈពេល៣០ឆ្នាំមកនេះ។ មនុស្ស៣៧៥នាក់បានស្លាប់ និងជាង៧០០នាក់ផ្សេងទៀតបានរងរបួសស្រាល និងធ្ងន់នៅក្នុងឧបទ្ទវហេតុមួយនៅលើស្ពានពេជ្រ។ រដ្ឋាភិបាលបានដាក់ចេញនូវបទបញ្ជាជាច្រើន ដើម្បីធ្វើអន្តរាគមន៍ជួយជនរងគ្រោះ ទាំងអ្នកស្លាប់បាត់បង់ជីវិត និងអ្នករួចផុតពីការស្លាប់។ ឧបទ្ទវហេតុបានកើតឡើងនៅលើស្ពានមួយឆ្លងទៅកោះពេជ្រទល់មុខក្រសួងការបរទេស នៅម៉ោង៩យប់ ថ្ងៃចន្ទទី២២ខែវិច្ឆិកាម្សិលមិញ។ មនុស្សរាប់ពាន់នាក់បានឆ្លងទៅឆ្លងមកនៅលើស្ពាន ជាហេតុដែលបណ្តាលអោយមានការចង្អៀត ណែនក្តន់ តាន់តាប់ ហើយអ្នកខ្លះក៏ដួលសន្លប់ បង្កបង្កើតឲ្យមានការឆោឡោ ស្រវេស្រវាជាន់គ្នាតែម្តង នេះបើតាមការសន្និដ្ឋានបឋមរបស់សមត្ថកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
តួលេខចុងក្រោយដែលត្រូវបានផ្សព្វផ្សាយនៅថ្ងៃនេះបានអោយដឹងថា អ្នកបាត់បង់ជីវិតបានកើនឡើងរហូតដល់៣៧៥នាក់ រីឯអ្នករងរបួសបានកើនឡើងដល់៧៥៥នាក់។ បើយោងតាមការអះអាងរបស់អាជ្ញាធរ ជនរងគ្រោះដែលបាត់បង់ជីវិតមានភាគច្រើនមកពីតាមបណ្តាខេត្ត។ នៅក្នុងរាជធានីភ្នំពេញនេះ អ្នកស្លាប់មានជាង១៣០នាក់។
សេចក្តីសន្និដ្ឋានផ្លូវការចុងក្រោយនោះនៅមិនទាន់ចេញនៅឡើយ។ រហូតដល់ពេលនេះមានតែការសន្និដ្ឋានបឋម ដែលអាជ្ញាធរបានសង្ស័យទៅលើ ការដែលមានមនុស្សច្រើនជ្រុលនៅលើស្ពានពេជ្រនោះ ដែលបង្កអោយមានការហប់ ស្ទះខ្យល់ ធ្វើអោយអ្នកខ្លះដួលសន្លប់ ហើយក៏កើតមានការផ្អើលជាន់គ្នាតែម្តង នៅលើស្ពាននោះ។
ទាក់ទងនឹងការស៊ើបអង្កេតរកមូលហេតុនៃឧបទ្ទវហេតុនេះដដែល អាជ្ញាធរក៏កំពុងជួបសម្ភាសន៍ជនរងគ្រោះដែលត្រូវបានជួយសង្គ្រោះអោយរស់រានមានជីវិត ដើម្បីស្វែងរកមូលហេតុពិតប្រាកដអោយឃើញ។ ក្រុមអាជ្ញាធរក៏បានធ្វើសេចក្តីប្រកាសព័ត៌មានជាទូទៅដល់ប្រជាពលរដ្ឋគ្រប់រូប ជាពិសេសអ្នកដែលនៅក្នុងហេតុការណ៍នោះ ដើម្បីអោយពួកគេសហការផ្តល់ព័ត៌មានដល់កម្លាំងមានសមត្ថកិច្ចផងដែរ អំពីហេតុការណ៍ដែលបានកើតឡើងយប់ម្សិលមិញនោះ។
បើទោះណាជាមិនទាន់មានការសន្និដ្ឋានផ្លូវការចុងក្រោយអំពីមូលហេតុដែលបង្កអោយមានឧបទ្ទវហេតុសោកនាដកម្មក៏ដោយ ប៉ុន្តែកាលពីយប់មិញនេះ លោកនាយករដ្ឋមន្ត្រី ហ៊ុន សែន បានធ្វើសេចក្តីប្រកាសព័ត៌មានអះអាងរួចហើយថា ឧបទ្ទវហេតុនេះមិនមានពាក់ព័ន្ធនឹងអំពើភេរវកម្មនោះឡើយ។ ហើយលោកនាយករដ្ឋមន្ត្រីបានអំពាវនាវអោយវិនិយោគិន និងប្រជាពលរដ្ឋប្រកបរបរអាជីវកម្មរបស់ខ្លួនតាមធម្មតា។
អ្វីដែលត្រូវបានធ្វើជាប្រចាំនោះ គឺការផ្សព្វផ្សាយលេខទូរស័ព្ទចំនួនប្រមាណ១៥ខ្សែ ដើម្បីអោយប្រជាពលរដ្ឋដែលមានសាច់ញាតិបាត់ខ្លួន ហើយសង្ស័យថា អាចស្ថិតនៅក្នុងឧបទ្ទវហេតុកាលពីយប់មិញនោះ អាចទូរស័ព្ទសួរព័ត៌មាននានា។ វិធានការចាំបាច់ផ្សេងទៀត ដែលជាបញ្ជារបស់ប្រមុខរដ្ឋាភិបាលតែម្តងគឺ ការបង្កើតគណៈកម្មការ និងអនុគណៈកម្មការជាច្រើនដែលទទួលបន្ទុកក្នុងការជួយសង្គ្រោះជនរងគ្រោះ ចាត់ចែងបញ្ជូនសាកសពទៅភូមិឋានរបស់ពួកគេ ចាត់ចែងជួយឧបត្ថម្ភដល់គ្រួសារសព ការធ្វើកោសលវិច័យលើសាកសព និងស៊ើបអង្កេតអំពីមូលហេតុនៃឧបទ្ទវហេតុ។ អ្នកដែលពាក់ព័ន្ធចាត់ចែងការងារទាំងអស់នេះ មានសុទ្ធតែឧបនាយករដ្ឋមន្ត្រី រដ្ឋមន្ត្រី រដ្ឋលេខាធិការនៃក្រសួងពាក់ព័ន្ធ និងមន្ត្រីមេប៉ូលិសផងដែរ។
ជាសេចក្តីសម្រេចរបស់រដ្ឋាភិបាលផងដែរ គឺនៅថ្ងៃព្រហស្បតិ៍ទី២៥ ខានស្អែកនេះ រដ្ឋាភិបាលបានប្រកាសកំណត់យក ថាជាថ្ងៃកាន់ទុក្ខទូទាំងប្រទេសតែម្តង ដើម្បីចូលរួមរំលែកទុក្ខជាមួយគ្រួសារសព ហើយថានៅគ្រប់ស្ថាប័នរដ្ឋត្រូវទម្លាក់ទង់ជាតិនៅត្រឹមពាក់កណ្តាលដងទង់។
រហូតដល់ពេលនេះ អ្វីដែលខ្ញុំទទួលបានពីអ្នកនាំពាក្យក្រសួងការបរទេសកម្ពុជានោះ គឺមាននាយករដ្ឋមន្ត្រី និងរដ្ឋមន្ត្រីការបរទេសថៃដែលបានផ្ញើសាររំលែកទុក្ខ និងផ្តល់ជំនួយហិរញ្ញវត្ថុចំនួន៣ម៉ឺនដុល្លារសម្រាប់ជាជំនួយសង្គ្រោះបន្ទាន់។ ក្នុងក្របខ័ណ្ឌអាស៊ានដូចគ្នា ក៏មានរដ្ឋមន្ត្រីការបរទេសនៃប្រទេសប្រ៊ុយណេក៏បានផ្ញើសាររំលែកទុក្ខមកកម្ពុជាដែរ។ ក្រៅពីនេះ ក៏មានរដ្ឋមន្ត្រីការបរទេសសហរដ្ឋអាមេរិក ក៏បានផ្ញើសាររំលែកទុក្ខមកកម្ពុជារួចហើយដែរ។
ប៉ុន្តែនៅក្នុងប្រទេសវិញ រដ្ឋាភិបាលបានប្រកាសផ្តល់ប្រាក់ឧបត្ថម្ភចំនួន៥លានរៀល និងព្រះមហាក្សត្រ ព្រះអង្គថ្វាយ២០០ដុល្លារអាមេរិកសម្រាប់គ្រួសារសព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ