កម្ពុជា -

អត្ថបទចុះផ្សាយនៅថ្ងៃ សុក្រ 19 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 19 តុលា 2012

នាយករដ្ឋមន្ត្រីវៀតណាម ឡាវនិងថៃចូលគោរពព្រះវិញ្ញាណក្ខន្ធសម្តេចព្រះមហាវីរក្សត្រ

ព្រះមហាក្សត្រខ្មែរនរោត្តម សីហមុនីនិងព្រះមាតាមូនីនាថ សីហនុ

REUTERS/Samrang Pring

ដោយ លី ម៉េងហួរ

នៅរសៀលថ្ងៃសុក្រទី១៩ ខែតុលាឆ្នាំ២០១២ លោកនាយករដ្ឋមន្ត្រី វៀតណាម នាយករដ្ឋមន្ត្រីឡាវ និងនាយករដ្ឋមន្ត្រីថៃ បានធ្វើដំណើរជាបន្តបន្ទាប់ មកកាន់ទីក្រុងភ្នំពេញដើម្បីចូលរួមគោរពព្រះវិញ្ញាណក្ខន្ធ សម្តេចព្រះមហាវីរក្សត្រ សម្តេចឪ នរោត្តម សីហនុ។ ក្រៅពីចូលរួមគោរពព្រះវិញ្ញាណក្ខន្ធព្រះករុណានៅក្នុងព្រះបរមរាជវាំង នាយករដ្ឋមន្ត្រីប្រទេសជាប់ព្រំដែននឹងកម្ពុជាទាំងបី ក៏បានជួបពិភាក្សាដាច់ដោយឡែកពីគ្នាជាមួយលោកនាយករដ្ឋមន្ត្រី ហ៊ុន សែន ដើម្បីបញ្ជាក់ពីការចូលរួមរំលែកទុក្ខចំពោះការបាត់បង់ព្រះរាជបិតាព្រះមហាវីរក្សត្ររបស់កម្ពុជានាពេលនេះ។

សេចក្តីរាយការណ៍របស់ លី ម៉េងហូរពីភ្នំពេញ

ស្តាប់ (02:08)

19/10/2012 by លី ម៉េងហួរ

ដំបូងឡើយ គឺលោក ង្វៀន តាន់យុង ( Nguyen Tan Dung ) នាយករដ្ឋមន្ត្រីវៀតណាម បានដឹកនាំគណៈប្រតិភូមកដល់ទីក្រុងភ្នំពេញ ហើយបានជួបជាមួយលោកនាយករដ្ឋមន្ត្រី នៅរសៀលថ្ងៃសុក្រនេះ។

ចំណែកលោកនាយករដ្ឋមន្ត្រីឡាវ ថងស៊ីង ថាំម៉ាវង់ ( Thongsing Thammavong ) ក៏បានដឹកនាំគណៈប្រតិភូជាន់ខ្ពស់ចូលជួបលោកនាយករដ្ឋមន្ត្រីហ៊ុន សែន ផងដែរ។

កិច្ចប្រជុំដាច់ដោយឡែកពីគ្នា ជាបន្តបន្ទាប់នោះ បានធ្វើឡើង មុនពេលពេលនាយករដ្ឋមន្ត្រី វៀតណាម និងនាយករដ្ឋមន្ត្រីឡាវ ចូលព្រះបរមរាជវាំង ដើម្បីគោរពព្រះវិញ្ញាណក្ខន្ធរបស់ព្រះករុណា ព្រះមហាវីរក្សត្រ សម្តេចព្រះ នរោត្តម សីហនុ នៅរសៀលថ្ងៃសុក្រនេះ។
រីឯលោកស្រីនាយករដ្ឋមន្ត្រីថៃ យ៉ីងឡាក់ ស៊ីណាវ៉ាត់ ( Yingluck Shinawatra )ក៏បានមកកាន់ទីក្រុងភ្នំពេញ ដើម្បីចូលរួមគោរពព្រះវិញ្ញាណក្ខន្ធសម្តេចព្រះមហាវីរក្សត្រនៅក្នុងព្រះបរមរាជវាំង នៅរសៀលនេះ មុននឹងជួបសវនាការជាមួយលោកនាយករដ្ឋមន្ត្រី ហ៊ុន សែន។

នាយករដ្ឋមន្ត្រីវៀតណាម ឡាវ និងនាយករដ្ឋមន្ត្រីថៃ សុទ្ធតែបានលើកឡើងផ្ទាល់មាត់ នៅចំពោះមុខលោកនាយករដ្ឋមន្ត្រី ហ៊ុន សែន នូវការចូលរួមរំលែកព្រះរាជមរណៈទុក្ខ ចំពោះការបាត់បង់ព្រះមហាវីរក្សត្ររបស់កម្ពុជា។

សម្រាប់លោកនាយករដ្ឋមន្ត្រីវៀតណាម ង្វៀន តាន់យុង បានបញ្ជាក់ប្រាប់លោកនាយករដ្ឋមន្ត្រី ហ៊ុន សែនថា រដ្ឋាភិបាល ប្រជាជន និងថ្នាក់ដឹកនាំវៀតណាមទាំងអស់ មានសេចក្តីក្រៀមក្រំ និងសោកស្តាយឥតឧបមា ចំពោះព្រះរាជបិតាជាតិកម្ពុជា សម្តេចព្រះមហាវីរក្សត្រ ព្រះករុណា ព្រះបាទសម្តេចព្រះ នរោត្តម សីហនុ។ វៀតណាម បានចាត់ទុកព្រះករុណា សម្តេចព្រះមហាវីរក្សត្រ ថាជាមហាមិត្តរបស់វៀតណាម។

តាមដំណឹង ក្រៅពីមេដឹកនាំអាស៊ាន ៣ ប្រទេស ជាប់ព្រំដែនកម្ពុជានេះ នៅថ្ងៃអាទិត្យ ទី២១តុលាខានស្អែក នាយករដ្ឋមន្ត្រីសឹង្ហបុរី ដែលជាសមាជិកអាស៊ាន ទី៤ លោក លី សៀនឡុង ( Lee Hsien Loong ) នឹងដឹកនាំគណៈប្រតិភូ មកកាន់ទីក្រុងភ្នំពេញ ដើម្បីគោរពព្រះវិញ្ញាក្ខន្ធអតីតព្រះមហាក្សត្រកម្ពុជា៕