កូរ៉េខាងជើង-ចិន -

អត្ថបទចុះផ្សាយនៅថ្ងៃ សុក្រ 03 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 03 សីហា 2012

អ្នកទទួលខុសត្រូវជាន់ខ្ពស់ចិន ទៅបំពេញទស្សនកិច្ចនៅព្យុងយ៉ាង

លោក គីមជុងអ៊ុន ថតរូបជាមួយគណៈប្រតិភូជាន់ខ្ពស់ចិន នៅទីក្រុងព្យុងយ៉ាង ថ្ងៃទី ២ សីហា ២០១២

ដោយ អៀង សុខម៉ិញ

នៅថ្ងៃព្រហស្បតិ៍ម្សិលមិញ លោក គីម ជុងអ៊ុន អគ្គមគ្គុទ្ទេសក៍កូរ៉េខាងជើង បានជួបពិភាក្សា ជាមួយនឹងអ្នកទទួលខុសត្រូវជាន់ខ្ពស់ចិន ជាផ្លូវការ លើកទីមួយ នៅទីក្រុងព្យុងយ៉ាង។ នេះបើតាមការគូសបញ្ជាក់របស់ភ្នាក់ងារសារព័ត៌មានផ្លូវការ នៅថ្ងៃសុក្រទី ០៣ សីហា២០១២នេះ។

លោក Wang Jiarui ប្រធាននាយកដ្ឋានទទួលបន្ទុកកិច្ចការអន្តរជាតិនៃបក្សកុម្មុយនិស្តចិន ជាឥស្សរជននយោបាយ បរទេស ទីមួយ ដែលអញ្ជើញមកបំពេញទស្សនកិច្ចផ្លូវការ នៅទីក្រុងព្យ៉ុងយ៉ាង គិតចាប់ពី លោក គីម ជុងអ៊ុន បានឡើងកាន់អំណាចជាប្រមុខដឹកនាំកូរ៉េខាងជើង (ក្រោយមរណភាពរបស់ លោក គីម ជុងអ៊ីល នៅចុងឆ្នាំ២០១១មក)។

ក្នុងឱកាសជួបប្រាស្រ័យគ្នានៅថ្ងៃព្រហស្បតិ៍ម្សិលមិញនេះ លោក គីមជុងអ៊ុន បានប្រកាស អំពីចេតនាគ្មានវៀចវេ របស់កូរ៉េខាងជើង រិតចំណងមិត្តភាព ដែលមានតាំងពីសម័យឪពុកលោក ឱ្យកាន់តែស្អិតល្មួតថែមទៀត។ ប្រមុខដឹកនាំប្រទេស វ័យមិនទាន់៣០ឆ្នាំ របស់កូរ៉េខាងជើង ដែលបានផ្តាំផ្ញើការគោរពរាប់អានរបស់លោកទៅកាន់ប្រធានាធិបតី ហូជិនតាវ តាមរយៈគណៈប្រតិភូចិននេះ ក៏បានបញ្ជាក់អំពីជំហរដឹកនាំរបស់លោកនាំកូរ៉េខាងជើងឱ្យស្គាល់ការអភិវឌ្ឍន៍សេដ្ឋកិច្ច និងមានមធ្យោបាយរស់នៅប្រសើរឡើង ប្រជាជនអាចរស់ដោយរីករាយ និងទាន់សម័យ។ នេះបើយោងតាមសារព័ត៌មានផ្លូវការចិនថ្មី។ ចំណែកភាគីចិនវិញ តាមរយៈលោកវង់ នេះជាទស្សនកិច្ចដើម្បីពង្រឹងទំនាក់ទំនងជាន់ខ្ពស់ផង រវាងបក្សនិងបក្សផង ព្រមទាំងដើម្បីពង្រឹងកិច្ចសហប្រតិបត្តិការទ្វេភាគីទៀត។ ប៉ុន្តែពុំឃើញមានការប្រកាសផ្តល់ជំនួយដល់ជនរងគ្រោះទឹកជំនន់នៅកូរ៉េខាងជើងទេ។

ចិនសម្ព័ន្ធមិត្តដ៏មានឥទ្ធិពលតែមួយគត់ លើកូរ៉េខាងជើង ជាដៃគូពាណិជ្ជកម្ម សេដ្ឋកិច្ចដ៏សកម្មបំផុត ពិសេសខាងផ្នែកវិនិយោគ ធ្លាប់បានសាកល្បងបញ្ចុះបញ្ចូលលោក គីម ជុងអ៊ីល ឱ្យបើកចំហសេដ្ឋកិច្ច ដោយយកគំរូតាមក្រុងប៉េកាំង ប៉ុន្តែអនុសាសន៍នេះ ហាក់មិនត្រូវបានអនុវត្តតាមឡើយ។ ហើយបើតាមអ្នកឯកទេស លោក គីមជុងអ៊ុន ដែលធ្លាប់ធ្វើដំណើរទៅប្រទេសចិនបួនលើក កាលពីសម័យឪពុកនៅរស់ ក៏នឹងចេញទៅបំពេញទស្សនកិច្ចចិនវិញ ជាលើកទីមួយក្នុងនាមជាអគ្គមគ្គុទេសក៍កុម្មុយនិស្តកូរ៉េខាងជើង នាពេលឆាប់ៗខាងមុខនេះ៕