សម្តេចសង្ឃកាតូលិកប៉ាបហ្វ្រង់ស៊័រទទួលជួបប្រធានាធិបតីអាមេរិកជាលើកទី១
ចុះផ្សាយនៅថ្ងៃ៖
ស្តាប់ - ០៦:០៩
នៅថ្ងៃព្រហស្បតិ៍២៧មីនានេះ នៅបុរីវ៉ាទីកង់ សម្តេចសង្ឈកាតូលិក ប៉ាប ហ្វ្រង់ស៊័រ បានទទួលស្វាគមន៍ប្រធានាធិបតីអាមេរិក អូបាម៉ា ជាលើកទីមួយ ប្រកបដោយភាពកក់ក្តៅ។ ជំនួបរវាងសម្តេចប៉ាបនិងលោកអូបាម៉ា ធ្វើឡើងក្នុងឱកាសលោកអូបាម៉ាបំពេញទស្សនកិច្ចនៅអឺរ៉ុប និងអារ៉ាប៊ីសាអូឌីត ក្នុងពេលអ៊ុយក្រែនកំពុងជួបវិបត្តិ និងពេលមានការពិភាក្សាលើសំណុំរឿងនុយក្លេអ៊ែរអ៊ីរ៉ង់។ ថ្វីបើសម្តេចសង្ឃប៉ាបហ្វ្រង់ស៊័រ និងលោកអូបាម៉ាមានការយល់ឃើញផ្ទុយគ្នាទាក់ទងនឹងបញ្ហាសីលធម៌សង្គមមួយចំនួន ប៉ុន្តែ អ្នកទាំង២មានគោលការណ៍តែមួយ គឺការប្រយុទ្ធប្រឆាំងនឹងការកើនឡើងនៃវិសមភាពសង្គម។
លោកអូបាម៉ាអន្ទះសារចង់ជួបសម្តេចសង្ឃប៉ាបកាតូលិកហ្វ្រង់ស៊័រ
តាំងតែពីខែមករាដើមឆ្នាំ លោកអូបាម៉ាធ្លាប់បានប្រាប់ថា លោកចង់ជួបសម្តេចសង្ឃប៉ាបហ្វ្រង់ស៊័រ។ លោកអូបាម៉ាតែងកោតសរសើរគោលជំហររបស់សម្តេចសង្ឃប៉ាបកាតូលិកដែលតែងថ្កោលទោសចំពោះការកើនឡើងនៃវិសមភាពសង្គម ពោលគឺគម្លាតរវាងអ្នកមាននិងអ្នកក្រ ឬក៏អំពើពុករលួយផ្សេងៗ។ តាំងតែពីពេលដំបូង ពេលសម្តេចសង្ឃប៉ាបហ្វ្រង់ស៊័រ បានជាប់ឆ្នោតគ្រប់គ្រងបុរីវ៉ាទីកង់ នៅខែមីនា ឆ្នាំ២០១៣ សម្តេចសង្ឃប៉ាបហ្វ្រង់ស៊័របានគូសបញ្ជាក់ពីអាទិភាពនៃកិច្ចការងាររបស់ព្រះអង្គ ក្នុងការប្រយុទ្ធប្រឆាំងភាពក្រីក្រ បញ្ហាអន្តោប្រវេសន៍ និងបញ្ហាសង្គមផ្សេងទៀត។ កាលពីខែកក្កដាឆ្នាំមុន សម្តេចសង្ឃប៉ាប បានធ្វើកំណែទម្រង់ច្បាប់ព្រហ្មទណ្ឌបុរីវ៉ាទីកង់ រឹតបន្តឹងទណ្ឌកម្មប្រឆាំងអំពើអានាចារ លើកុមារនិងពង្រឹងដាក់ទោសលើអំពើពុករលួយ រឺការលាងលុយកខ្វក់ ដែលបុរីវ៉ាទីកង់ធ្លាប់ជួបប្រទះក្នុងពេលកន្លងមកនោះ។ ច្បាប់នេះចូលជាធរមានកាលពីខែកញ្ញា អនុវត្តលើគ្រប់សមាជិករដ្ឋាភិបាលកណ្តាលបុរីវ៉ាទីកង់ មន្ត្រីទូត បុគ្គលិក អង្គការស្ថាប័នពាក់ព័ន្ធនឹងបុរីវ៉ាទីកង់ មិនថានៅក្នុងឬក្រៅដែនដីនេះទេ។
លោកអូបាម៉ាកោតសរសើរឥតដាច់ពីមាត់ ថាសម្តេចប៉ាបជាអ្នកតំណាងការប្រៀនប្រដៅរបស់ព្រះយេស៊ូ ហើយសកម្មភាពសម្តេចសង្ឃប៉ាបផ្តល់ក្តីសង្ឃឹមមិនត្រឹមតែសម្រាប់អ្នកកាន់សាសនាគ្រិស្តប៉ុណ្ណោះទេ តែសម្រាប់គ្រប់បណ្តាជនដែលប្រណិបត្តិ សាសនាផ្សេងទៀតលើពិភពលោកផងដែរ។ ប្រធានាធិបតីអាមេរិកអូបាម៉ាប្រាប់ថា ក្នុងជំនួបជាមួយសម្តេចសង្ឃប៉ាបនៅថ្ងៃព្រហស្បតិ៍នេះ លោកត្រងត្រាប់ស្តាប់ដីកាសម្តេចសង្ឃប៉ាបកាតូលិក ព្រោះថាគំនិតរបស់សម្តេចសង្ឃប៉ាបមានតម្លៃខ្លាំងណាស់ ដើម្បីអោយលោកអូបាម៉ាបានស្វែងយល់ពីយុទ្ធសាស្ត្រដែលត្រូវធ្វើ ដើម្បីទទួលបានជោគជ័យក្នុងការប្រយុទ្ធប្រឆាំងភាពក្រីក្រ។
មុនពេលជួបលោកអូបាម៉ា នៅព្រឹកថ្ងៃព្រហស្បតិ៍នេះ សម្តេចសង្ឃប៉ាបក៏បានទទួលជួបសមាជិកសភាអ៊ីតាលីជិត៥០០នាក់ និងរដ្ឋមន្ត្រីអ៊ីតាលី៩រូបផងដែរ។ នៅចំពោះមុខអ្នកនយោបាយអ៊ីតាលី សម្តេចសង្ឃកាតូលិកមិនបានញញើតញញើមនឹងរិះគន់អំពើពុករលួយ និងការឃ្លាតឆ្ងាយរបស់អ្នកនយោបាយពីប្រជាជនសោះឡើយ។ លោកលើកឡើងថា អំពើបាបតូចតាចអាចនឹងធ្វើអោយមនុស្សរងយាយីដោយអំពើពុករលួយបាន។
ទស្សនៈផ្ទុយគ្នាស្តីពីសីលធម៌សង្គម រវាងសម្តេចប៉ាបហ្វ្រង់ស៊័រ និងប្រធានាធិបតីអាមេរិក
ទោះជាមានទិសដៅដូចគ្នា ក្នុងការប្រយុទ្ធវិសមភាពសង្គម និងកំចាត់អំពើពុករលួយបែបនេះក្តី សម្តេចប៉ាបហ្វ្រង់ស៊័រ និងលោកអូបាម៉ាមានទស្សនៈផ្ទុយគ្នាចំពោះបញ្ហាសីលធម៌សង្គមមួយចំនួន។ ជាក់ស្តែង នយោបាយកំណែទម្រង់របស់លោកអូបាម៉ា មានទិសដៅជួយជាថវិកាសងដល់ស្ត្រីដែលធ្វើការរំលូតកូននៅពេទ្យ រឺក៏យល់ស្របអោយមានការរៀបអាពាហ៍ពិពាហ៍រវាងអ្នកស្រលាញ់ភេទដូចគ្នា។ នយោបាយនេះគឺផ្ទុយស្រឡះពីគោលការណ៍សីលធម៌របស់បុរីវ៉ាទីកង់ ដែលមិនគាំទ្រសោះឡើយ នូវការស្រលាញ់ភេទដូចគ្នា រឺក៏ការរំលូតកូន ដែលប្រៀបបានទៅនឹងឃាតកម្មលើអាយុជីវិតមនុស្សម្នាក់ដូច្នោះដែរនោះ។ គួរបញ្ជាក់ដែរថា កាលពីឆ្នាំ២០០៩ លោកអូបាម៉ាក៏ធ្លាប់ សម្តេចសង្ឃប៉ាប បឺន័រ ១៦ Benoît XVI ទទួលជួបផងដែរ។ កាលណោះសម្តេចប៉ាបបឺន័រ ក៏មិនយល់ស្របពីរឿងរំលូតកូន និងការរៀបការរវាងមនុស្សស្រលាញ់ភេទដូចគ្នានេះដែរ។
ប្រធានបទផ្សេងៗដែលត្រូវលើកមកពិភាក្សាក្នុងជំនួប
ដោយឡែក ប្រធានបទពិភាក្សារវាងលោកអូបាម៉ា និងសម្តេចសង្ឃប៉ាបនៅថ្ងៃព្រហស្បតិ៍នេះ ក៏ត្រូវផ្តោតលើកបញ្ហាស៊ីរី វិបត្តិអ៊ុយក្រែន បញ្ហាអ៊ីស្រាអែលប៉ាឡេស្ទីន រឺក៏អំពើហិង្សានៅអាហ្វ្រិកកណ្តាលផងដែរ។ សម្តេចសង្ឃកាតូលិកធ្លាប់ជំទាស់ដាច់អហង្ការចំពោះអន្តរាគមន៍យោធាដែលអាមេរិកចង់ធ្វើនៅស៊ីរី ក្នុងពេលកន្លងមក។ សម្តេចសង្ឃប៉ាបក៏ត្រូវលើកនិយាយពីបញ្ហាអន្តោប្រវេសន៍ខុសច្បាប់នៅព្រំដែនអាមេរិកនិងម៉ិចស៊ិក ជាមួយលោកអូបាម៉ា ផងដែរ។
ផលប្រយោជន៍នយោបាយដែលលោកអូបាម៉ាអាចចំណេញបានពីជំនួបជាមួយសម្តេចសង្ឃកាតូលិក
ក្រៅពីទទួលបានដីកាជាគំនិតជាដំបូន្មាន ដើម្បីប្រយុទ្ធនឹងវិសមភាពសង្គមក្នុងស្រុកនោះ លោកអូបាម៉ាក៏អាចទទួលបានប្រយោជន៍ផ្សេងទៀត សម្រាប់គោលនយោបាយលោក នៅអាមេរិកនិងលើឆាកអន្តរជាតិដែរ។ ដោយសារតែសម្តេចសង្ឃប៉ាប ហ្វ្រង់ស៊័រ មានឈ្មោះល្បីខ្ពង់ខ្ពស់ ដូច្នេះហើយ ទើបបានជាជំនួបនៅថ្ងៃព្រហស្បតិ៍នេះ ធ្វើអោយលោកអូបាម៉ាទទួលការចាប់អារម្មណ៍គ្រប់ទិសទី ហើយកម្រិតប្រជាប្រិយភាពរបស់លោកអូបាម៉ាក៏អាចនឹងកើនឡើងផងដែរ។ នៅសហរដ្ឋអាមេរិក អ្នកកាន់សាសនាកាតូលិក មាន៧០លាននាក់ ត្រូវនឹងមួយភាគ៤នៃប្រជាជនសរុបដែលមានចំនួនជិត៣១៤លាននាក់។ អ្នកកាន់សាសនាកាតូលិក៨៥ភាគរយ នៅអាមេរិក ស្រលាញ់គោរពសម្តេចសង្ឃប៉ាបហ្វ្រង់ស៊័រ ហើយប្រជាជនអាមេរិកដែលស្រលាញ់គោរពសម្តេចសង្ឃប៉ាបហ្វ្រង់ស៊័រ មានដល់៦៣ភាគរយឯណោះ។
ការដែលសម្តេចប៉ាបធ្លាប់បរិហារពីផលវិបាកបង្កឡើងដោយប្រាក់កាសនោះ មិនសូវជាធ្វើអោយអ្នកអភិរក្សនិយមជ្រុលអាមេរិកចូលចិត្តប៉ុន្មានទេ ពួកគេថែមទាំងថា សម្តេចប៉ាបមានទស្សនៈកុម្មុយនិស្តទៀតផង។ ប៉ុន្តែអ្នកនយោបាយកាតូលិកមានគំនិតសង្គមជឿនលឿន បានគាំទ្រសម្តេចប៉ាប។ ទោះមានការបែងចែកបក្សពួកនិងយល់ផ្ទុយគ្នាពីសម្តេចប៉ាបក្តី ក៏សម្តេចប៉ាបទទួលប្រជាប្រិយភាពនិងការគាំទ្រខ្ពស់ពីប្រជាជនអាមេរិកគ្រប់និន្នាការនយោបាយផងដែរ។ ដូច្នេះ ការលើកឡើងអ្វីមួយរបស់សម្តេចប៉ាបហ្វ្រង់ស៊័រ ទៅកាន់លោកអូបាម៉ា នៅថ្ងៃនេះ គឺមានតម្លៃណាស់។ មានតម្លៃសម្រាប់នយោបាយលោកអូបាម៉ា ក្នុងការប្រយុទ្ធវិសមភាពសង្គម នយោបាយសមភាពនៃការបង់ពន្ធជួយគ្រួសារអាមេរិកដែលមានជីវភាពមធ្យម ព្រោះថា នយោបាយទាំងនេះធ្វើអោយលោកអូបាម៉ា ត្រូវប្រឈមនឹងសមាជិកសភាជាន់ទាបដែលភាគច្រើនជាសមាជិកបក្សប្រឆាំង។
អាមេរិកនិងបុរីវ៉ាទីកង់មានទំនាក់ទំនងការទូតគ្នា៣០ឆ្នាំ មកហើយ។ ថ្ងៃនេះ លោកអូបាម៉ាប្រហែលអាចអញ្ជើញសម្តេចសង្ឃប៉ាបហ្វ្រង់ស៊័រ អោយចូលរួមកិច្ចប្រជុំគ្រួសារកាតូលិកពិភពលោក ដែលត្រូវរៀបចំនៅPhiladelphie ខែកញ្ញាឆ្នាំ២០១៥ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ