Delicious
Digg
Facebook
Twitter
Yahoo!
Technorati
សង្រ្គាមព័ត៌មានវិទ្យា -
អត្ថបទចុះផ្សាយនៅថ្ងៃ សុក្រ 22 មិថុនា 2012 -
ព័ត៌មានទើបកែប្រើលើកចុងក្រោយ ថ្ងៃ សុក្រ 22 មិថុនា 2012
អ៊ីរ៉ង់និយាយថា ខ្លួនរងការវាយប្រហារពីមេរោគព័ត៌មានវិទ្យារបស់អាមេរិក និងអ៊ីស្រាអែល
មេរោគFlameត្រូវគេរកឃើញថា ជាអ្នកវាយប្រហារប្រព័ន្ធកុំព្យូទ័រអ៊ីរ៉ង់
©
រដ្ឋមន្រ្តីក្រសួងស៊ើបការណ៍សម្ងាត់អ៊ីរ៉ង់ បាននិយាយ កាលពីថ្ងៃព្រហស្បតិ៍ទី ២១ មិថុនា ថា ប្រព័ន្ធព័ត៌មានវិទ្យារបស់មជ្ឈមណ្ឌលនុយក្លេអ៊ែររបស់អ៊ីរ៉ង់បានរងការវាយប្រហារផ្ទួនៗ ក្នុងសប្តាហ៍នេះ។ ដំណឹងនេះបានកើតមាន នៅតែពីរថ្ងៃ ក្រោយ កិច្ចចរចានុយក្លេអ៊ែររបស់អ៊ីរ៉ង់បានបិទបញ្ចប់ដោយគ្មានផ្តល់លទ្ធផលអ្វី នៅក្នុងទីក្រុងម៉ូស្គូ ប្រទេសរុស្ស៊ី។ កាលពីចុងខែ ឧសភា អ្នកជំនាញបានចាប់ រកឃើញមេរោគកុំព្យូទ័រឈ្មោះ Flame ដែលបានវាយប្រហារទៅលើប្រព័ន្ធព័ត៌មានវិទ្យាអ៊ីរ៉ង់។
ប្រព័ន្ធកុំព្យូទ័ររបស់ក្រុមហ៊ុនប្រេងអ៊ីរ៉ង់បានរងការវាយប្រហារផ្នែកព័ត៌មានវិទ្យា កាលខែមេសា ដោយទិន្ន័យដែលស្តុកទុកក្នុងកុំព្យួទ័របានរលាយបាត់ ដោយមិនដឹងមូលហេតុ។ អ៊ីរ៉ង់បានសម្រេចកាត់ផ្តាច់ប្រព័ន្ធកុំព្យូទ័រទាំងអស់ដើម្បីដោះស្រាយបញ្ហា។ ប្រទេសផលិតប្រេងផ្សេងទៀត នៅតំបន់ដើមបូព៌ា និងប៉ាឡេស្ទីនផង ក៏ជួបបញ្ហាដូចអ៊ីរ៉ង់។ ដោយសារមានពាក្យបណ្តឹង ពីក្រុមប្រទេសនៅតំបន់ដើមបូព៌ា សហភាពទូរគមនាគមន៍អន្តរជាតិ ដែលជាទីភ្នាក់ងារមួយរបស់អង្គការសហប្រជាជាតិក៏បានបើកការស៊ើបអង្កេតមួយ ដោយបានជួលអ្នកជំនាញមកពីរុស្ស៊ីមកសិក្សារកដើមហេតុ។
គេចាប់ផ្តើមសង្ស័យថា កុំព្យូទ័រ ទាំងនោះរងការវាយប្រហារដោយមេរោគថ្មីមួយទៀត។ កាលពីឆ្នាំ ២០១០មេរោគ Stuxnetធ្លាប់បានគេរកឃើញថា ជាអ្នកវាយប្រហារទៅលើ មជ្ឈមណ្ឌលនុយក្លេអ៊ែរ អ៊ីរ៉ង់ ដោយបានបំផ្លាញព័ត៌មាន ក្នុងកុំព្យូទ័រដែលទទួលបន្ទុកបញ្ជា គ្រប់គ្រងការចម្រើនធាតុអ៊ុយរ៉ានីញ៉ូម ក្នុងរោងចក្រNatanzរបស់អ៊ីរ៉ង់។ មួយឆ្នាំបន្ទាប់ អ្នកព័ត៌មានវិទ្យាអ៊ីរ៉ង់ដឹងថា មានមេរោគមួយប្រភេទទៀត ត្រូវគេប្រើដើម្បីលួចយកព័ត៌មានសម្ងាត់។ អ្នកជំនាញហុងគ្រីរកឃើញ មេរោគថ្មី និងដាកឈ្មោះថា Duqu។
កាលពីចុងខែឧសភា អ្នកជំនាញរុស្ស៊ី និងហុងគ្រីបានរកឃើញដូចគ្នាថា មេរោគ ថ្មីមួយទៀតកំពុងវាយប្រហារទៅលើអ៊ីរ៉ង់។ គេបានដាក់ឈ្មោះវាថា Flame។ ជារួម កុំព្យូទ័រ ជាង ៤០០គ្រឿង នៅអ៊ីរ៉ង់ រងការវាយប្រហារ។ បន្ទាប់មកទៀត គឺប្រទេសនៅដើមបូព៌ា ដូចជាប្រទេសប៉ាឡេស្ទីន លីបង់ និងនៅស៊ីរីក៏មានកុំព្យូទ័ររងគ្រោះដោយមេរោគ Flameនេះដែរ។
ឥលូវនេះ បន្ទាប់ពីអ្នកស៊ើបអង្កេតបានកំណត់ទីតាំងរបស់ក្រុមចោរអ៊ិនធ័ណេតជាង ១៥កន្លែង នៅអាស៊ី និងនៅអ៊ឺរ៉ុប មេរោគFlameបានបាត់មុខទៅវិញ។ គេរកឃើញវា កាលពីចុងខែឧសភា ហើយ នៅខែពាក់កណ្តាលខែមិថុនានេះ មេរោគ Flameក៏បាត់មុខទៅវិញ។ បើតាម អ្នកជំនាញរុស្ស៊ី និងហុងគ្រី មេរោគ Flame បានមានសកម្មភាពយ៉ាងតិច ២ឆ្នាំ មុននឹងគេអាចបញ្ជាក់កំណត់អត្តសញ្ញាណរបស់វា។
តាមអ្នកជំនាញដដែល មេរោគFlameត្រូវបានកសាងឡើង ដោយកម្មវិធីដែលស្រដៀងគ្នា នឹងមេរោគ Stuxnet។ គឺអាចផលិតដោយក្រុមមនុស្សតែមួយ ក៏ថាបាន។ មេរោគFlame ត្រូវគេប្រើដើម្បីតាមដានស៊ើបអង្កេតយកការណ៍ បន្ទាប់មក គឺមេរោគ Stuxnetដែលចូលទៅបំផ្លាញព័ត៌មានក្នុងកុំព្យូទ័រ ដែលគេចាត់ទុកថា ជាអ្នកបញ្ជាប្រព័ន្ធគ្រប់គ្រងស្ថាប័នណាមួយ ដូចជាមជ្ឈមណ្ឌលនុយក្លេអ៊ែររបស់អ៊ីរ៉ង់។
មេរោគ Flame ដែលគេប្រែថា “ភ្លើង” នេះត្រូវបានអ្នកជំនាញចាត់ទុកថា ជាកម្មវិធីចារកម្មផ្លូវរដ្ឋមួយប្រភេទ ដែលផលិតឡើង ដោយគំនិតច្នៃប្រឌិតខ្ពស់។ មេរោគ Flameភាគច្រើន សំដៅវាយប្រហារកុំព្យូទ័រណាដែលមានកម្មវិធី windows របស់ក្រុមហ៊ុន Microsoft គឺវាជ្រៀតចូលទៅក្នុងកុំព្យួទ័រមួយ នៅពេលណា គេupdateកម្មវិធី windows។
នៅពេលមេរោគ Flame ចូលទៅក្នុងកុំព្យូទ័រមួយហើយ ម្ចាស់មេរោគ Flame ដែលបញ្ជាពីចម្ងាយ អាចចូលទៅគ្រប់គ្រងកម្មវិធីរបស់កុំព្យូទ័រនោះទាំងស្រុង។ Flame ជាមេរោគដែលគេប្រើដើម្បីស៊ើបយកការណ៍សម្ងាត់ ពីក្នុងកុំព្យួរទ័រ ដោយមិនឲ្យម្ចាស់កុំព្យូរទ័រដឹងខ្លួន។ វាអាចឲ្យគេកំណត់អត្តសញ្ញាណម្ចាស់កុំព្យូទ័រ អាចលួចថតចម្លងឯកសារសម្ងាត់ ឬអាចបញ្ជា វាយអក្សរ ពីចម្ងាយ អាចបញ្ជាប្រើកាម៉េរ៉ាកុំព្យូទ័រ ថត យករូបភាព ឬសំឡេងអ្នកដែលសន្ទនានៅក្បែរកុំព្យូទ័រ។ ម្យ៉ាងវិញទៀត ដោយសារមេរោគ Flame គេអាចលួចចម្លងថតយកព័ត៌មានឯកសាររបស់កុំព្យូទ័រនៅក្បែរៗនោះ តាមរយៈ Bloutouth។
មេរោគ Flameមិនឆ្លងពីកុំព្យូរទ័រ មួយទៅកុំព្យូទ័រមួយទៀត ដោយអនាធិបតេយ្យ ទេ គឺ វាវាយប្រហារទៅលើគោលដៅច្បាស់មួយៗ ទៅតាមការបញ្ជារបស់ម្ចាស់ ដែលបញ្ជាវាពីចម្ងាយ។ ធ្វើដូច្នេះ គឺដើម្បីកុំឲ្យគេងាយនឹងចាប់រកវាឃើញ។ ហើយម្យ៉ាងទៀត មេរោគ Flameត្រូវគេកសាងវាឡើងឲ្យចេញធ្វើអត្តឃាតដោយខ្លួនឯង។ នៅពេលណាបេសកកម្មរបស់វាចប់ វានឹងបំផ្លាញខ្លួនឯង រលាយបាត់ពីកុំព្យូរទ័ ដោយមិនអាចឲ្យ គេចាប់បានដឹងមុនទេ។
|
អ៊ីស្រាអែល និងអាមេរិកជាអ្នកបង្កើតមេរោគវាយប្រហារមជ្ឈមណ្ឌលនុយក្លេអ៊ែរអ៊ីរ៉ង់
ក្នុងរយៈពេល ២ឆ្នាំ អ៊ីរ៉ង់រងការវាយប្រហារផ្នែកព័ត៌មានវិទ្យាដល់ទៅបីលើក។ រហូតមកដល់ពេលនេះ គេនៅមិនទាន់រកឃើញថា អ្នកណាជាអ្នកផលិតមេរោគ Flame ដែលជាកម្មវិធីលួចយកការណ៍សម្ងាត់។ ប៉ុន្តែ អ៊ីរ៉ង់វិញ បាននិយាយមិនសំចៃមាត់ដោយចង្អុលចោទប្រកាន់អាមេរិក និងអ៊ីស្រាអែល ព្រោះតែ អាមេរិក និងអ៊ីស្រាអែលជាសត្រូវដែលប្រឆាំងថ្កោលទោសកម្មវិធីនុយក្លេអ៊ែររបស់អ៊ីរ៉ង់។ អ៊ីស្រាអែលធ្លាប់ទាំងបានគំរាមវាយប្រហារយោធាទៅលើទីតាំងមជ្ឈមណ្ឌលនុយក្លេអ៊ែររបស់អ៊ីរ៉ង់ ប្រសិនបើកិច្ចចរចា៦ភាគីជាមួយអ៊ីរ៉ង់បរាជ័យ។ ដូច្នេះ សម្រាប់ទីក្រុងតេអេរ៉ង់ គ្មានអ្វី គួរឲ្យសង្ស័យច្រើនទេ អ្នកដែលប្រើមេរោគវាយប្រហារលើកុំព្យូទ័រនៅមជ្ឈមណ្ឌលនុយក្លេអ៊ែររបស់ខ្លួន គឺគ្មានអ្នកណាក្រៅតែពីអាមេរិក និងអ៊ីស្រាអែលទេ។
ការចោទប្រកាន់របស់អ៊ីរ៉ង់ រឹតតែរឹងមាំ ដោយសារការសន្និដ្ឋានរបស់អ្នកជំនាញរុស្ស៊ី និងហុងគ្រី ដែលថា អ្នកដែលអាចផលិតមេរោគកុំព្យូទ័រ ប្រកបដោយសមត្ថភាព និងប្រសិទ្ធភាពខ្ពស់ មិនមែនក្រុមមនុស្សតូចតាចទេ ប៉ុន្តែ គឺទាល់តែរដ្ឋមួយ ដែលមានមធ្យោបាយ ទាំងហិរញ្ញវត្ថុ បច្ចេកវិទ្យា និងធនធានមនុស្ស។ មួយវិញទៀត ការចោទប្រកាន់រឹតតែច្បាស់ បញ្ជាក់ដោយការចុះផ្សាយសៀវភៅមួយក្បាលរបស់អ្នកកាសែតThe newyork times ដែលនិយាយពីសង្រ្គាមដ៏សម្ងាត់របស់លោកអូបាម៉ា។
ក្នុងសៀវភៅនោះ អ្នកកាសែត អាមេរិកដែលឧស្សាហ៍ចូលទៅក្នុងសេតវិមានបានសរសេរដោយលម្អិតពីរបៀបដែលមេរោគ ឈ្មោះ Stuxnet ត្រូវបានគេបង្កើតឡើង ដើម្បីប្រឆាំងនឹងកម្មវិធីនុយក្លេអ៊ែររបស់អ៊ីរ៉ង់។ ហើយគឺក្រុមភ្នាក់ងារស៊ើបការណ៍សម្ងាត់អាមេរិក CIA ដែលជាអ្នកបញ្ជា។ ក្នុងប្រតិបត្តិការក្រោមឈ្មោះថា កីឡាអូឡាំពិក អ៊ីស្រាអែលក៏បានចូលរួមជួយកសាងមេរោគនេះដែរ។ ប៉ុន្តែ ដោយសារមានកំហុសបច្ចេកទេស មេរោគStuxnetបានរីកសុះសាយ ឆ្លងចូលទៅក្នុងកុំព្យូទ័រ រហូតធ្វើឲ្យគេចាប់រកឃើញ បាន នៅឆ្នាំ ២០១០ នៅអ៊ីរ៉ង់ ជាទីដែល ៦០ភាគរយនៃកុំព្យូទ័រ ត្រូវឆ្លងបំផ្លាញដោយមេរោគ Stuxnet។
កាលពីថ្ងៃអង្គារមុននេះរបស់កាសែត The washington post ក៏បានចុះផ្សាយថា អាមេរិក និងអ៊ីស្រាអែលនៅពីក្រោយសង្រ្គាមព័ត៌មានវិទ្យានេះដែរ។ តាមកាសែត ដែលដកស្រង់សំដីរបស់មន្រ្តីជាន់ខ្ពស់ នយោបាយប្រើមេរោគវាយប្រហារលើព័ត៌មានវិទ្យាអ៊ីរ៉ង់ គឺដើម្បីពន្យឺតកម្មវិធីនុយក្លេអ៊ែរ របស់អ៊ីរ៉ង់ ដែលប្រទេសលោកខាងលិចចោទថា កំពុងលួចផលិតអាវុធនុយក្លេអ៊ែរ។ បើតាមមន្រ្តីជាន់ខ្ពស់អាមេរិក ដែលសុំមិនបញ្ចេញឈ្មោះ អ៊ីរ៉ង់នឹងមានសមត្ថភាពកាន់តែខ្ពស់ ក្នុងការកសាងប្រព័ន្ធការពារខ្លួន ទប់ទល់នឹងមេរោគព័ត៌មានវិទ្យា ព្រោះថា អ៊ីរ៉ង់ កាន់តែរងការវាយប្រហារ អ៊ីរ៉ង់នឹងកាន់តែជំនាញខ្លាំងក្នុងការរកវិធីសាស្រ្តទប់ទល់នឹងសង្រ្គាមព័ត៌មានវិទ្យាពីខាងក្រៅ៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ