កម្ពុជា -

អត្ថបទចុះផ្សាយនៅថ្ងៃ សៅរ៍ 13 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 13 តុលា 2012

ឧត្តមសេនីយ៍ប៉ូលិសផ្កាយបីម្នាក់អស់តំណែងដោយសារបញ្ហាដីធ្លី

លោកនាយករដ្ឋមន្ត្រី ហ៊ុន សែន ប្រកាសដកប៉ូលិសផ្កាយបីពីបទប្រើអំណាចហួសហេតុ

ដោយ ប៉ែន បូណា

ឧត្តមសេនីយ៍ផ្កាយបី និងជាទីប្រឹក្សាក្រសួងមហាផ្ទៃ ឈ្មោះ លោក ឌឿន សុវណ្ណ ត្រូវបានលោកនាយករដ្ឋមន្ត្រី ហ៊ុន សែន ប្រកាសដកតំណែងជាសាធារណៈនៅថ្ងៃសៅរ៍នេះដោយសារតែការប្រើអំណាចក្នុងទំនាស់ដីធ្លី។ ឧត្តមសេនីយ៍ក្រសួងមហាផ្ទៃរូបនោះត្រូវបានគេរាយការណ៍ថា មានទំនាស់ដីធ្លី ហើយបានប្រើប្រាស់តួនាទីរបស់ខ្លួនទៅគំរាមកំហែងអាជ្ញាធរ និងក្រុមយុវជនស្ម័គ្រចិត្ត ដែលចុះវាស់វែងដីធ្លីជូនប្រជាពលរដ្ឋនៅខេត្តពោធិ៍សាត់។ នេះជាវិធានការក្តៅនិងថ្មីមួយទៀតចំពោះអ្នកបង្កជម្លោះបញ្ហាដីធ្លី។

សេចក្តីរាយការណ៍របស់ ប៉ែន បូណា ពីទីក្រុងភ្នំពេញ

ស្តាប់ (02:25)

13/10/2012

ក្នុងពេលចុះទៅចែកប័ណ្ណកម្មសិទ្ធិដីជូនប្រជាពលរដ្ឋក្នុងខេត្តកំពង់ចាម នាព្រឹកថ្ងៃសៅរ៍នេះ លោកនាយករដ្ឋមន្ត្រី ហ៊ុន សែន បានប្រកាសដកតំណែងនិងបណ្តេញមន្ត្រីប៉ូលិសផ្កាយបីម្នាក់គឺលោក ឌឿន សុវណ្ណ ចេញពីតួនាទីនៅក្នុងក្រសួងមហាផ្ទៃ។

វិធានការក្តៅ និងជាបន្ទាន់នេះបានធ្វើឡើង បន្ទាប់ពីលោកផ្កាយបីរូបនេះ បានប្រើតួនាទី និងអំណាចរបស់ខ្លួនដើម្បីគំរាមកំហែងអាជ្ញាធរ មន្ត្រីសុវិយោដី ព្រមទាំងក្រុមយុវជនស្ម័គ្រចិត្តឲ្យវាស់វែងដីចែកជូនគ្រួសាររបស់ខ្លួនដែលបានទិញដីពលរដ្ឋចំនួន ៩ គ្រួសារ នៅស្រុកភ្នំក្រវាញ ខេត្តពោធិ៍សាត់។ ឧត្តមសេនីយ៍ដដែលបានគំរាមថា នឹងប្តឹងទៅតុលាការប្រសិនបើក្រុមយុវជនស្ម័គ្រចិត្តមិនព្រមវាស់ដីជូនគ្រួសាររបស់លោកទេនោះ។ ការប្រើអំណាចបំពានរបស់មន្ត្រីមានបុណ្យស័ក្តិបែបនេះបានធ្វើឲ្យលោកនាយករដ្ឋមន្ត្រីខឹងសម្បារ និងចាត់វិធានការជាបន្ទាន់។

ប្រមុខរដ្ឋាភិបាលកម្ពុជាក៏បានប្រកាសដាក់បទបញ្ជាឲ្យរដ្ឋមន្ត្រីក្រសួងដែនដីនគរូបនីយកម្មនិងសំណង់ ដាក់ពាក្យបណ្តឹងទៅតុលាការប្រឆាំងនឹងឧត្តមសេនីយ៍ខាងលើ និងបានបញ្ជាឲ្យអគ្គស្នងការនគរបាលជាតិតាមឃ្លាំមើលកុំឲ្យ លោក ឌឿន សុវណ្ណ រត់គេចខ្លួនក្នុងពេលដែលអាជ្ញាធរកំពុងរៀបចំពាក្យបណ្តឹងទៅតុលាការ។ លោកនាយករដ្ឋមន្ត្រីបានហៅករណីនេះថាជាការប្រើអំណាចបំពានយ៉ាងធ្ងន់ធ្ងររបស់មន្ត្រីប៉ូលិសដែលមិនអាចអត់ឱនបាន។
គួរបញ្ជាក់ថា ការចែកប័ណ្ណកម្មសិទ្ធិដីធ្លីជូនពលរដ្ឋដែលមានទំនាស់បាននិងកំពុងបន្តធ្វើដោយលោកនាយករដ្ឋមន្ត្រីជាអ្នកចុះចែកប័ណ្ណជូនពលរដ្ឋដោយផ្ទាល់។ នៅថ្ងៃនេះ ប្រជាពលរដ្ឋចំនួន ១.០៥៧ គ្រួសារនៅឃុំជ្រៃបាក់ ស្រុកស្ទឹងត្រង់ ខេត្តកំពង់ចាម បានទទួលប័ណ្ណកាន់កាប់ដីធ្លីពីប្រមុខរដ្ឋាភិបាល។ ការចុះចែកប័ណ្ណកម្មសិទ្ធិដីធ្លីនៅមុនពេលបោះឆ្នោតត្រូវបានគណបក្សប្រឆាំងរិះគន់ថា បានធ្វើឡើងដើម្បីប្រជាប្រិយភាពនយោបាយ។ ប៉ុន្តែ ការចោទប្រកាន់នេះត្រូវបានលោកនាយករដ្ឋមន្ត្រីបដិសេធ។

យុទ្ធនាការវាស់វែងដីដែលកំពុងមានទំនាស់ចែកជូនប្រជាពលរដ្ឋបានធ្វើឡើងក្នុងក្របខ័ណ្ឌ«គោលនយោបាយចាស់សកម្មភាពថ្មី» ដែលមានគោលដៅបញ្ចប់ជម្លោះដីធ្លីដែលកំពុងកើតមានក្តៅគគុក។ លោកនាយករដ្ឋមន្ត្រីបានបញ្ជាក់ថា ការងាររបស់ក្រុមនិស្សិតស្ម័គ្រចិត្តដែលកំពុងវាស់វែងដីចែកជូនពលរដ្ឋគ្មានអ្នកណាអាចបង្គាប់បញ្ជាបានទេ ទោះបីជាមន្ត្រីនោះមានឋានៈប៉ុណ្ណាក៏ដោយ។ ការបណ្តេញឧត្តមសេនីយ៍ផ្កាយបីចេញពីតំណែងនៅពេលនេះជាឧទាហរណ៍ស្រាប់៕