ស៊ីរី - 
អត្ថបទចុះ​ផ្សាយ​នៅ​ថ្ងៃ អង្គារ 25 តុលា 2011 - ព័ត៌មានទើប​កែប្រើ​លើកចុងក្រោយ​ ថ្ងៃ អង្គារ 25 តុលា 2011

អាមេរិក​ដក​ឯកអគ្គរដ្ឋទូត​របស់ខ្លួន​ចេញ​ពី​ទីក្រុង​ដាម៉ាស

លោកRobert Ford​​ចូលជួប​ប្រធានាធិបតី​ស៊ីរី លោក​Bachard Al Assad​នៅ​ពេល​ចូលកាន់​តំណែង​ជា​ឯកអគ្គរដ្ឋទូត​អាមេរិកប្រចាំ​ស៊ីរី
លោកRobert Ford​​ចូលជួប​ប្រធានាធិបតី​ស៊ីរី លោក​Bachard Al Assad​នៅ​ពេល​ចូលកាន់​តំណែង​ជា​ឯកអគ្គរដ្ឋទូត​អាមេរិកប្រចាំ​ស៊ីរី
©Reuters

ដោយ ឈាង បុប្ផា

ទំនាក់ទំនង​ការទូត​អាមេរិក និង​ស៊ីរី​បាន​ឡើងតឹង​មួយ​កម្រិតទៀត នៅពេល​ក្រសួង​ការបរទេស​អាមេរិក​បាន​ហៅ​ឯកអគ្គរដ្ឋទូត របស់ខ្លួន ឲ្យ​ចាកចេញ​ពី​ប្រទេស​ស៊ីរី។ លោក Robert Ford ដែល​ធ្លាប់​រិះគន់​ខ្លាំងៗ ដាក់​រដ្ឋាភិបាល​លោក​Bachar Al assad បាន​ចាកចេញ​ពី​ប្រទេស​ស៊ីរី កាលពី​ថ្ងៃ​អាទិត្យមុននេះ ក្នុងមូលហេតុ ដើម្បី សន្តិសុខ​ផ្ទាល់ខ្លួន។ ប្រតិកម្ម​តបវិញ រដ្ឋាភិបាល​ស៊ីរី​វិញ​ទើប​បាន​កោះហៅ​ឯកអគ្គរដ្ឋទូត​របស់​ខ្លួន ប្រចាំ​អាមេរិក ឲ្យ​ត្រលប់​ចូល​ប្រទេសវិញ នៅ​ថ្ងៃចន្ទ​ទី ២៤ តុលា ២០១១។

សេចក្តី​រាយការណ៍​របស់​ឈាង បុប្ផា​
 

25/10/2011 by ឈាង បុប្ផា

 

យោងតាម​ទូរទស្សន៍​រដ្ឋ​ស៊ីរី ទីក្រុង​ដាម៉ាស​បាន​ហៅ​ឯកអគ្គរដ្ឋទូត​របស់ខ្លួន​ឲ្យ​ត្រលប់​ចូល​ប្រទេស​វិញ ដើម្បី​ពិភាក្សា​បន្ទាន់ជាមួយ​ថ្នាក់ដឹកនាំ​រដ្ឋាភិបាល។ ការប្រកាស​មាន​យ៉ាងខ្លី មិន​លម្អិត។ នៅភាគី​អាមេរិក មន្រ្តីស្ថានទូត​ដែល​សុំ​មិន​បញ្ចេញឈ្មោះ​បាន​និយាយ​ថា ឯក​អគ្គរដ្ឋទូត​​អាមេរិក​លោក​Robert Ford ចាកចេញ​ពី​ស៊ីរី​ជារៀងរហូត គឺ​មិន​ត្រលប់​មក​ធ្វើជា​ឯកអគ្គរដ្ឋទូត​អាមេរិក នៅ​ស៊ីរី​ទៀត​ទេ។ អ្នកនាំពាក្យ​ក្រសួងការបរទេស​វិញ​បាន​ប្រាប់​អ្នកកាសែតថា គេ​មិន​ទាន់​ដឹងទេ​ថា តើពេលណា​លោក​ Robert Ford អាច​ត្រលប់​ទៅ ប្រទេស​ស៊ីរី​វិញ។
 
លោក​ Robert Ford​បាន​ចាកចេញពី​ស៊ីរី ដោយសារ​តែ​មាន​ការគំរាមកំហែង​ដ៏​គួរ​ឲ្យជឿជាក់​មួយ​ទៅ​លើ​សុវត្ថិភាព​ផ្ទាល់​ខ្លួន​របស់គាត់។ ដូច្នេះ លោក Robert Ford​អាច​ត្រលប់​ទៅ​ស៊ីរី នៅពេល​ណាដែល​អាមេរិក​វាយតម្លៃ​ឃើញថា មិន​មាន​ការគំរាម​សន្តិសុខ​ដល់​លោក​ Robert Ford​តទៅទៀត។
 
លោក​ Robert Ford ទើប​តែ​ទៅធ្វើ​ជា​ឯកអគ្គរដ្ឋទូត​អាមេរិក​ប្រចាំ​ស៊ីរី កាលពី​ខែ​មករា​ដើមឆ្នាំនេះ។ ចាប់តាំង​ពី​មាន​ចលនា​ទាមទារ នៅក្នុង​ប្រទេស​ស៊ីរី លោក Robert Ford ដែល​និយាយ​ភាសា​អារ៉ាប់​យ៉ាង​ស្ទាត់ជំនាញ បាន​ប្រជែង​បញ្ហា​ជាមួយ​រដ្ឋាភិបាល​របស់លោក​Bachar Al assad ជាញយដង ដោយ​លោក​បាន​បង្ហាញមុខ​ក្នុង​ចលនា​តវ៉ា​របស់​ក្រុមប្រឆាំង​ស៊ីរី។ លោកធ្លាប់​ចុះ​ទៅ​មើល​ប្រជាជន​ក្នុង​ទីក្រុង​ដែល​រង​ការវាយបង្រ្កាប​ខ្លាំង​របស់​រដ្ឋាភិបាល​ស៊ីរី។ សកម្មភាព​គាំទ្រ​ពួកក្រុមប្រឆាំង​បាន​ធ្វើ​ឲ្យ​អាជ្ញាធរ​ស៊ីរី និង​ពួកនិកាយ​និយម គាំទ្រ​រដ្ឋាភិបាល​ស៊ីរី​មិន​ពេញចិត្តទេ។
 
កាលពី​ខែ​កញ្ញាមុន​នេះ លោក​ធ្លាប់​រង​ការគប់ពងមាន់ និង​ប៉េងប៉ោះ​ពី​សំណាក់​ក្រុមគាំទ្រ​រដ្ឋាភិបាល​ស៊ីរី នៅពេល​លោក​ចូល​ជួប​អ្នកតំណាង​ក្រុមប្រឆាំង។ បន្ទាប់មក គាត់ និង​មន្រ្តីទូត​អាមេរិក​ផ្សេងទៀត ត្រូវ​ជាប់គាំង មិន​អាច​ចេញពីស្ថានទូត​បាន ដោយសារ​តែ​ពួកក្រុម​គាំទ្រ​រដ្ឋាភិបាល​ស៊ីរី​បាន​ឡោមព័ទ្ធ​សា្ថនទូត​អាមេរិក ក្នុង​ទីក្រុង​ដាម៉ាស។
 
នៅក្រោយ​ឧប្បត្តិហេតុ​ទាំងអស់នេះ ប្រមុខការទូត​អាមេរិក លោកស្រី​ហ៊ីឡារី គ្លីនតុន​បាន​ទាមទារ​ឲ្យ​រដ្ឋាភិបាល​ស៊ីរី​ការពារ​សុវត្ថិភាព​មន្រ្តីទូត​អាមេរិកាំង។ នៅថ្ងៃ​ចន្ទ​ម្សិលមិញ​ អ្នកនាំពាក្យ​ក្រសួង​ការបរទេស​អាមេរិក​បាន​និយាយ​ថា អាមេរិក​សង្ឃឹមទីក្រុង​ដាម៉ាស​នឹង​ឈប់​ញុះញង់​ឲ្យ​គេ​ស្អប់​លោក​ Robert Ford​តទៅទៀត។
 
កន្លងមក ដើម្បី​ដាក់​គំនាប​រដ្ឋាភិបាល​ស៊ីរី ឲ្យ​បញ្ឈប់​ការបង្រ្កាប​ហិង្សា​ទៅ​លើ​ប្រជាជន អាមេរិក​បាន​ទណ្ឌកម្ម​សេដ្ឋកិច្ច​ទៅ​លើ​មេដឹកនាំ​ស៊ីរី។ នៅពេលនេះ ទំនាក់ទំនង​ការបរទេស​រវាង​អាមេរិក និង​ស៊ីរី​ក៏​កាន់តែ​ល្អក់​កករ​ទៀត។ ប៉ុន្តែ យ៉ាងណាក៏ដោយ អាមេរិក​មិន​ទាន់​បង្ហាញ​ពី​ជម្រើស ប្រើអន្តរាគមន៍​យោធា​នៅ​ស៊ីរី ដូច​ដែល​គេ​បាន​ធ្វើ​ទៅ​ក្នុង​ប្រទេស​លីប៊ី​កន្លងមកទេ។ រហូតមកដល់​ពេលនេះ គណបក្ស​ប្រឆាំង​ស៊ីរី​នៅតែ​ចង់​ តវ៉ា​តាម​ផ្លូវ​សន្តិភាព​ដើម្បីទាមទារ ឲ្យ​រដ្ឋាភិបាល​ធ្វើ​កំណែទម្រង់៕

 

tags: ដើមបូព៌ា - បាតុកម្ម - សហរដ្ឋអាមេរិក - ស៊ីរី
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close