អាមេរិក៖ ចារកម្មបច្ចេកវិទ្យារបស់ចិនឈានដល់កំរិតកំពូល
ថវិកាយោធាចិនដែលចេះកាន់តែកើនឡើង បានធ្វើឲ្យមហាអំណាចអាមេរិកកើតមានក្តីបារម្ភ។ ឥលូវនេះទៀត អាមេរិកកំពុងបារម្ភពីការដែលចិនអភិវឌ្ឍផ្នែកចារកម្មបច្ចេកវិទ្យាដល់ចំណុចកំពូលមួយ។ យោងតាមរបាយការណ៍ដែលត្រូវបង្ហាញនៅសភាកាលពីថ្ងៃព្រហស្បតិ៍ ទី ៩ មីនា ឆ្នាំ ២០១២ ចារកម្មបច្ចេកវិទ្យាទំនើបរបស់ចិន គឺជាគ្រោះថ្នាក់ គំរាមកំហែងខ្លាំងប្រព័ន្ធការពារជាតិអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
សមត្ថភាពរបស់ចិនក្នុងផ្នែកចារកម្មបច្ចេកវិទ្យាបានឡើងដល់កម្រិតមួយខ្ពស់ មិនធ្លាប់មាន។ វាគ្រោះថ្នាក់ដែលមានរូបរាងពិតប្រាកមែន សម្រាប់បេសកកម្មយោធាអាមេរិក ក្នុងករណីមានសង្រ្គាមផ្ទុះឡើងរវាងប្រទេសទាំងពីរ។ គ្រោះថ្នាក់របស់ចារកម្មបច្ចេកវិទ្យាចិន ត្រូវបានបញ្ចេញឲ្យឃើញ នៅក្នុងរបាយការណ៍មួយកម្រាស់ ១៣៦ទំព័រ ដែលសរសេរដោយក្រុមអ្នកជំនាញ សម្រាប់គណៈកម្មការសភា អាមេរិក ទទួលបន្ទុកទំនាក់ទំនងសេដ្ឋកិច្ច និងសន្តិសុខរវាងចិន និងអាមេរិក។
តាមអ្នកសរសេររបាយការណ៍ ក្រុមហ៊ុនចិនមួយចំនួនបានធ្វើជំនួញជាមួយក្រុមហ៊ុនបរទេសខាងផ្នែកបច្ចេកវិទ្យា។ គឺក្រុមហ៊ុនចិនទាំងនោះដែលបានជួយកងទ័ព ចិន ឲ្យបោះជំហាន ឈានមុខលឿន ក្នុងការស្រាវជ្រាវ និងអភិវឌ្ឍបច្ចេកវិទ្យាក្នុងវិស័យយោធា។
កងទ័ពចិនបានឲ្យតម្លៃខ្លាំងទៅលើសង្រ្គាមបច្ចេកវិទ្យា។ ថ្នាក់ដឹកនាំរបស់កងទ័ពចិនបានបណ្តុះគំនិតដែលថា ដើម្បីបានជោគជ័យលើសមរភូមិ គេត្រូវគ្រប់គ្រងឲ្យបានប្រព័ន្ធបច្ចេកវិទ្យាយោធារបស់សត្រូវ។
តាមរបាយការណ៍របស់អាមេរិក អ្នកជំនាញរបស់កងទ័ពចិនកំពុងធ្វើចារកម្មបច្ចេកវិទ្យា គឺលួចយកការណ៍ ជាប្រចាំលើ ទិន្ន័យ ប្រព័ន្ធបញ្ជា និងប្រព័ន្ធត្រួតពិនិត្យលើមជ្ឈមណ្ឌលយុទ្ធសាស្រ្តរបស់អាមេរិក។ ការយកបានព័ត៌មានទាំងនេះ អាចធ្វើឲ្យចិនវាយប្រហារទៅលើទីតាំងយោធាសំខាន់ៗបាន មុនអាមេរិកដឹងខ្លួន នៅក្នុងករណីប្រទេសទាំងពីរផ្ទុះសង្រ្គាមដាក់គ្នា។ ចារកម្មបច្ចេកវិទ្យារបស់ចិនអាចគំរាមដល់បេសកកម្មយោធារបស់អាមេរិក ជាពិសេសនៅក្នុងករណីដែលអាមេរិកចង់ការពារតៃវ៉ាន់ពីការឈ្លានពានរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ