ស្នូលប្រភពនៃធាតុវិទ្យុសកម្មរបស់ម៉ាស៊ីនប្រតិករទី១ និងទី៣កំពុងចាប់រលាយ
មន្រ្តីជំនាញនុយក្លេអ៊ែរជប៉ុនបានប្រកាសទទួលស្គាល់ នៅថ្ងៃអាទិត្យទី ១៣ មីនា ២០១១ នេះថា ស្នូលរបស់ម៉ាស៊ីនប្រតិករទីមួយ និងទីបី ក្នុងរោងចក្រនុយក្លេអ៊ែរ Fukushima កំពុងស្ថិតក្នុងដំណាក់កាល Fusion នុយក្លេអ៊ែរ។ ទោះយ៉ាងណា អាជ្ញាធរជប៉ុនអះអាងថា គេបានគ្រប់គ្រងស្ថានការណ៍ ហើយស្នូលអ៊ុយរ៉ានីញ៉ូមរបស់ម៉ាស៊ីនប្រតិករនឹងមិនរងការខូចខាត ហើយក៏មិនបង្កឲ្យមានគ្រោះថ្នាក់ធ្ងន់ធ្ងរដល់ប្រជាជនដែរ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ឈាង បុប្ផា
ម៉ាស៊ីនប្រតិករទីមួយ និងទីបី ស្ថិតក្នុងដំណាក់កាលFusion នុយក្លេអ៊ែរ មានន័យថា ស្នូលផ្ទុកអ៊ុយរ៉ានីញ៉ូម ក្នុងម៉ាស៊ីនប្រតិករ អាចបង្កជាកម្លាំងផ្ទុះឡើង។ បើស្នូលអ៊ុយរានីញ៉ូមផ្ទុះ ធាតុវិទ្យុសកម្មនៅក្នុងនោះនឹងបែកសាយភាយចេញមកក្រៅ គ្មានអ្វីទប់បានទេ។
ស្ថានការណ៍ថ្ងៃអាទិត្យនេះ អាចឈានចូលដំណាក់កាលប្រកាសអាសន្ន និងមានលក្ខណៈតានតឹងជាងកាលពីថ្ងៃសៅរ៍ ម្សិលមិញ។ កាលពីថ្ងៃម្សិលមិញ អាជ្ញាធរជប៉ុនបានប្រកាសថា កម្តៅក្នុងស្នូលអ៊ុយរ៉ានីញ៉ូមកើនឡើងមិនឈប់។ នោះគឺដោយសារ ប្រព័ន្ធរក្សាសីតុណ្ហភាព ខូចមិនដំណើរការ។ ប្រព័ន្ធបំពង់បូមទឹកត្រជាក់នៅម៉ាស៊ីនប្រតិករទីមួយបានផ្ទុះខូច កាលពីម្សិលមិញ ដោយសារគេបង្ខំបូមទឹកត្រជាក់ទៅទប់កំដៅស្នូលម៉ាស៊ីនប្រតិករ។
ចូលដល់ពេលយប់ថ្ងៃសៅរ៍ គេបានបង្ហាញថា ប្រព័ន្ធរក្សាសីតុណ្ហភាពនៅម៉ាស៊ីនប្រតិករទីបី ក៏ជួបបញ្ហាដូចគ្នាទៀត។ ម៉ាស៊ីនបូមទឹកត្រជាក់សម្រាប់រក្សាកំដៅស្នូលអ៊ុយរ៉ានីញ៉ូម មិនដំណើរការ រហូតដល់អាជ្ញាធរជប៉ុនបានសម្រេចបូមទឹកសមុទ្រដើម្បីយកមក បន្ថយកំដៅស្នូលអ៊ុយរ៉ានីញ៉ូម។
ការបូមយកទឹកសមុទ្រមកបន្ថយកំដៅ ម៉ាស៊ីនប្រតិករនេះ ជាជម្រើសចុងក្រោយហើយរបស់អាជ្ញាធរជប៉ុន ប៉ុន្តែ អ្នកជំនាញនុយក្លេអ៊ែរអន្តរជាតិ ជាទូទៅ ចាត់ទុកថា ជាប្រតិបត្តិការមួយដែលមិនត្រឹមត្រូវតាមស្តង់ដារអន្តរជាតិ។
បើទោះជាមានទឹកសមុទ្រមកជួយបន្ថយកំដៅ ប៉ុន្តែ ម៉ាស៊ីនប្រតិករទីបី នៅតែឡើងកំដៅ។ អាជ្ញាធរជប៉ុនបានវាយតម្លៃនៅថ្ងៃនេះ ថា ស្នូលអ៊ុយរ៉ានីញ៉ូមក្នុងម៉ាស៊ីនប្រតិករទីមួយ និងទីបី ចាប់ផ្តើមរលាយដោយសារការឡើងកំដៅខ្ពស់។ ជាមួយគ្នានេះ កម្រិតអ៊ីដ្រូសែននៅបន្ទប់ដាក់ម៉ាស៊ីនប្រតិករទីបី បានកើនឡើងខ្ពស់ រហូតដល់អាចធ្វើឲ្យមានសម្ពាធខ្លាំង និង ផ្ទុះបាក់ដំបូលគ្របម៉ាស៊ីនប្រតិករ ដូចករណីម៉ាស៊ីនប្រតិករ ទីមួយ។ ក្នុងករណីដែលស្នូលប្រតិករផ្ទុះ បញ្ចេញធាតុវិទ្យុសកម្ម ហើយដំបូលម៉ាស៊ីនប្រតិករបាក់បែកទៀត នោះគឺធាតុវិទ្យុសកម្មចេញមកក្រៅបានទេបានដោយសេរី។ នៅពេលនេះ អ្នកជំនាញខាងនុយក្លេអ៊ែរអន្តរជាតិបានព្រមាន ថា បញ្ហា នៅជប៉ុនពេលនេះ គឺ នឹង អាចឈានដូចករណីដែលកើតឡើងនៅ Three mile island នៅអាមេរិក និងអាចឈានធ្ងន់ធ្ងរ ដូចករណី Tchernobyl នៅអ៊ុយក្រែន កាលពីឆ្នាំ ១៩៨៦។
នៅថ្ងៃអាទិត្យ នេះ អាជ្ញាធរជប៉ុនបាននិយាយពីវិធីសាស្រ្តមួយទៀត ដែលគេបានប្រើ កាលពីថ្ងៃសៅរ៍ ម្សិលមិញ។ នោះគឺថា បន្ទាប់ពីមានបញ្ហាខ្វះទឹកត្រជាក់ ដើម្បីរក្សាសីតុណ្ហភាពស្នូលអ៊ុយរ៉ានីញ៉ូមនៅម៉ាស៊ីនប្រតិករទីមួយ អ្នកជំនាញ នុយក្លេអ៊ែរ ជប៉ុន បានបន្ធូរ បន្ថយសម្ពាធក្នុងម៉ាស៊ីនប្រតិករ តាមរយៈការបង្ហើប បញ្ចេញធាតុវិទ្យុសកម្មចេញមកក្រៅខ្លះ។ ការជួយកាត់បន្ថយសម្ពាធ អាចជួយឲ្យកាត់បន្ថយគ្រោះថ្នាក់ផ្ទុះពីក្នុងម៉ាស៊ីនប្រតិករបានមួយរយៈ។ នៅថ្ងៃនេះ គេបានបញ្ចេញ មកក្រៅនូវ សារធាតុវិទ្យុសកម្ម ពីម៉ាស៊ីនប្រតិករទីបី។ គេបានវាយតម្លៃថា សាធាតុវិទ្យុសកម្មពេលនេះ កំពុងសាយភាយចេញច្រើនមកក្នុងតំបន់ជុំវិញរោងចក្រ ដល់កម្រិតមួយដែលលើសពីកម្រិតធម្មតាដែលមនុស្សអាចទទួលបាន។
ការរៀបរាប់របស់និស្សិត ភឹម រុនណារ៉េតស្តីពីវិធានការការពារធាតុវិទ្យសកម្ម នៅជប៉ុន
នៅប្រទេសជប៉ុន ពេលនេះ មនុស្សជាច្រើនសែននាក់ត្រូវគេជម្លៀសចេញពីតំបន់ជុំវិញ រោងចក្រនុយក្លេអ៊ែរ គឺស្ថិតនៅឆ្ងាយឲ្យបាន២០គីឡូម៉ែត្រពីរោងចក្រ។ ហើយ មនុស្សរាប់ពាន់នាក់ត្រូវឆ្លងកាត់បន្ទប់ ត្រួតពិនិត្យរកសារធាតុវិទ្យុសកម្ម។ រហូតមកដល់ពេលនេះ មានតែបុគ្គលិករបស់រោងចក្រដែលរបួសនៅក្នុងការផ្ទុះ ដំបូលគម្របម៉ាស៊ីនប្រតិករទីមួយទេ ដែលរងធាតុវិទ្យុសកម្មខ្ពស់ជាងគេ។ ចំណែកប្រជាជន៩នាក់ផ្សេងទៀត ត្រូវគេរកឃើញមានរងធាតុវិទ្យុសកម្មដែរ។ ពួកគេទាំងនេះ អាចរងវិទ្យុសកម្ម ក្នុងពេលពួកគេឈររង់ចាំ អ្នកជួយសង្រ្គោះ នៅខាងក្រៅមន្ទីរពេទ្យ ក្នុងពេលរោងចក្រផ្ទុះដំបូល បែកសាយភាយវិទ្យុសកម្មចេញមកក្រៅ។ រងវិទ្យុសកម្ម គឺពួកគេប្រឈមនឹងគ្រោះថ្នាក់កើតជំងឺមហារីក។
នៅពេលនេះ ទោះបីមិនមានសមាសភាពច្រើន តែធាតុវិទ្យុសកម្មបានសាយភាយ នៅតំបន់ជុំវិញរោងចក្រ នុយក្លេអ៊ែរ។ ចាប់តាំងពីថ្ងៃសៅរ៍ម្សិលមិញ រដ្ឋាភិបាលជប៉ុនបានអំពាវនាវឲ្យប្រជាជនបិទបង្អួច ស្ថិតនៅក្នុងផ្ទះ បិទមុខ និងឧស្សហ៍រុំខ្លួននឹងក្រណាត់សើមជានិច្ច។ មួយវិញទៀត យុទ្ធនាការចែកចែកអ៊ីយូតទៅប្រជាជនដើម្បីការពារខ្លួននឹងធាតុវិទ្យុសកម្ម បានចាប់ផ្តើមធ្វើឡើងនៅតំបន់ ជុំវិញដែលធាតុវិទ្យុសកម្មមានកម្រិតខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ