ថៃ -

អត្ថបទចុះផ្សាយនៅថ្ងៃ ពុធ 11 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 12 កក្កដា 2012

ថៃដោះលែងជនជាតិអាមេរិកាំងម្នាក់ជាប់ចោទពីបទប្រមាថព្រះចេស្តា

ព្រះមហាក្សត្រថៃភូមីបុល( Bhumibol Adulyadej) អមដោយមហាក្សត្រីយានី Sirikit(រូបស្ថាំ)

REUTERS/Royal Household/

ដោយ នុយ ប៊ែរណាដែត

ជនជាតិអាមេរិកាំងម្នាក់ដើមកំណើតថៃឈ្មោះJoe Wichai Commart Gordonទើបបានទទួលការលើកលែងទោសពីព្រះមហាក្សត្រនិងដោះលែងឲ្យមានសេរីភាពវិញនៅល្ងាចថ្ងៃទី ១០កក្កដា ២០១២។ លោក Gordonធ្លាប់ត្រូវបានតុលាការថៃកាត់ទោសតាំងពីខែធ្នូឆ្នាំមុន ឲ្យជាប់ឃុំឃាំងក្នុងពន្ធនាគារ ចំនួន៣០ខែពីបទជេរប្រមាថព្រះចេស្តា។

សេចក្តីរាយការណ៍របស់ នុយ ប៊ែរណាដែត

ស្តាប់ (02:44)

11/07/2012 by នុយ ប៊ែរណាដែត

ជនជាតិអាមេរិកាំងឈ្មោះ Joe Wichai Commart Gordon នេះត្រូវបានអាជ្ញាធរថៃចាប់ខ្លួននៅខែឧសភាឆ្នាំ២០១១ ខណៈពេលដែលគាត់កំពុងស្នាក់អាស្រ័យនៅប្រទេសថៃ នាឱកាសវិស្សមកាលនៅប្រទេសដើមកំណើតរបស់ខ្លួន។

តាំងពី គាត់នៅសហរដ្ឋអាមេរិកម្ល៉េះ លោក Gordon ត្រូវបានតុលាការថៃ ចោទប្រកាន់ពីបទបានបកបែ្រជីវប្រវត្តិមួយរបស់ព្រះមហាក្សត្រជាភាសាថៃ និងបានចុះផ្សាយនៅលើគេហទំព័រប្រចាំថ្ងៃផ្ទាល់ខ្លួនក្នុងអាំងទែរណេត។ សៀវភៅជីវប្រវត្តិព្រះមហាក្សត្រ ដែលអាជ្ញាធរហាមប្រាមមិនឲ្យលើកយកមកនិយាយជាដាច់ខាត។ នៅថ្ងៃនេះ មន្ត្រីគ្រប់គ្រងពន្ធនាគារ នៅទីក្រុងបាងកកបាននិយាយប្រាប់ទីភ្នាក់ងារព័ត៌មានបារាំង AFPថា ឥឡូវនេះ "លោក Gordon បានទទួលការលើកលែងទោសពីព្រះមហាក្សត្រនិងត្រូវបានដោះលែងហើយដែរតាំងពីល្ងាចរសៀលម្សិលមិញ"។

ជាអ្នកលក់រថយន្តនៅរដ្ឋ Colorado លោក Gordon ត្រូវបានតុលាការថៃកាត់ទោសពីលើកដំបូងឲ្យជាប់ក្នុងពន្ធនាគារចំនួន៥ឆ្នាំ ។ ប៉ុន្តែក្រោយពីគាត់បានសារភាពទទួលកំហុសមក តុលាការថៃបានបន្ថយទោសគាត់ មកនៅត្រឹម ២ឆ្នាំកន្លះវិញ ។

លោក Walter Braunohler អ្នកនាំពាក្យរបស់ស្ថានទូតអាមេរិកប្រចាំទីក្រុងបាងកក បាន ថ្លែងប្រាប់ទីភ្នាក់ងារព័ត៌មានបារាំង AFPថា ស្ថានទូតអាមេរិក បានតាមដានសំណុំរឿងនេះជាប់រហូត និងបានអន្តរាគមជាទៀងទាត់ សុំឲ្យប្រទេសថៃធ្វើការគោរពចំពោះសិទ្ធិសេរីភាពបុគ្គល ក្នុងការបញ្ចេញមតិដែលត្រូវបានការពារដោយច្បាប់ការពារសិទ្ធិមនុស្សអន្តរជាតិ។ អាជ្ញាធរថៃតែងតែរារាំងមិនឲ្យបុគ្គលណាម្នាក់ចេញមុខ រិះគន់នយោបាយដឹកនាំរបស់ខ្លួនឡើយ និងតែងតែយកច្បាប់ប្រឆាំងការប្រមាថព្រះចេស្តាមកធ្វើជាលេសដើម្បីចាប់អ្នកប្រឆាំងដាក់ក្នុងពន្ធនាគារ។ ទង្វើនេះហើយ ដែលធ្វើឲ្យសកម្មជនការពារសិទ្ធិមនុស្ស បរិហារថា អាជ្ញាធរថៃ ចង់បំបិទសេរីភាពមនុស្សមិនឲ្យគេបញ្ចេញមតិ។

ចំណែកឯការប្តឹងផ្តល់និងការផ្តន្ទាទោសពីបទប្រមាថព្រះចេស្តានេះ កាន់តែកើនចំនួនជាទ្វេគុណ ក្រោយពីមានរដ្ឋប្រហារយោធានៅឆ្នាំ២០០៦មក ដែលទម្លាក់នាយករដ្ឋមន្ត្រីថៃលោកថាក់ស៊ីន។ អតីតនាយករដ្ឋមន្ត្រីរូបថៃនេះដែលបច្ចុប្បន្នកំពុងភៀសខ្លួននៅឯក្រៅប្រទេស ត្រូវបានឥស្សរជនសំខាន់ៗនៅទីក្រុងបាងកក ចាត់ទុកជាមនុស្សម្នាក់ដ៏គ្រោះថ្នាក់បំផុតសំរាប់រាជាធិបតេយ្យ។

សូមបញ្ជាក់ថា ការដោះលែងជនជាតិអាមេរិកាំងដើមកំណើតថៃនេះ ត្រូវបានប្រព្រឹត្តទៅ តែ២ថ្ងៃប៉ុណ្ណោះ មុនជំនួបមួយ រវាងលោកស្រី ហ៊ីឡារីក្លីនតុន(Hillary clinton) រដ្ឋមន្ត្រី ការបរទេស អាមេរិក និងនាយករដ្ឋមន្ត្រីថៃ យីងឡាក់ ស៊ីណាវ៉ាត់( Yingluck Shinawatra) នៅក្នុងប្រទេសកម្ពុជា៕