ថៃ -

អត្ថបទចុះផ្សាយនៅថ្ងៃ សុក្រ 13 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 13 កក្កដា 2012

ថៃក្រោមសម្ពាធតានតឹង ក្នុងថ្ងៃតុលាការធម្មនុញ្ញចេញសាលក្រម

ប៉ូលិសថៃនៅមុខតុលាការធម្មនុញ្ញ ថ្ងៃទី ១៣ កក្កដា ២០១២

ដោយ អៀង សុខម៉ិញ

តុលាការធម្មនុញ្ញថៃ ដែលបាននិងកំពុងការពារដោយកងកម្លាំងប៉ូលិសរាប់រយនាក់ ត្រូវចេញសាលក្រមនៅថ្ងៃសុក្រទី ១៣កក្កដានេះ លើបណ្តឹងរបស់គណបក្ស ប្រជាធិបតេយ្យ ប្រឆាំងនឹងគណបក្សភឿថៃ កំពុងកាន់អំណាច។ សាលក្រមដែលទើបធ្លាក់មកដល់អំបាញ់មិញនេះ ប្រកាសច្រានចោលបណ្តឹងរបស់គណបក្សប្រជាធិបតេយ្យ។ ប្រសិនបើជាតុលាការចេញសេចក្តីសម្រេចផ្ទុយពីនេះវិញ នោះ គណបក្សភឿថៃត្រូវរំលាយចោល ហើយអាចធ្វើឱ្យប្រទេសថៃជួបភាពច្របូកច្របល់នយោបាយ និងអំពើហិង្សា។

សេចក្តីរាយការណ៍របស់ អៀង សុខម៉ិញ

ស្តាប់ (01:53)

13/07/2012

គណបក្សប្រជាធិបតេយ្យដែលគេបានស្គាល់ច្បាស់ថាដឹកនាំដោយលោក អាភិស៊ីត វេចាជីវ៉ា ស្និទ្ធិនឹងក្រុមបញ្ញាវន្តក្រុងបាងកក ឬក្រុមអាវលឿង បានដាក់ពាក្យបណ្តឹងប្រឆាំងនឹងសំណើកែប្រែច្បាប់រដ្ឋធម្មនុញ្ញឆ្នាំ២០០៧របស់គណបក្សភឿថៃ ដឹកនាំដោយលោកស្រី យីងឡាក់ ស៊ីណាវ៉ាត់។ សម្រាប់គណបក្សប្រជាធិបតេយ្យ ការកែប្រែច្បាប់រដ្ឋធម្មនុញ្ញរបស់រដ្ឋាភិបាលលោកស្រី យីងឡាក់ គឺជាការគំរាមកំហែងរបបរាជានិយម និងជាពិសេសជាល្បិចកល រកច្រកនាំលោក ថាក់ស៊ីន ស៊ីណាវ៉ាត់ ជាបងប្រុសចូលមាតុប្រទេសវិញតែប៉ុណ្ណោះ។

តាមរយៈបណ្តឹងនេះ តុលាការធម្មនុញ្ញអាចនឹងចេញសាលក្រម សម្រេចឱ្យរំលាយគណបក្សភឿថៃ ដែលទើបបានឡើងកាន់អំណាចមិនទាន់បានមួយឆ្នាំស្រួលបួលផង។ ប៉ុន្តែនេះជាសេណារីយោដ៏អាក្រក់បំផុត ដែលនឹងអាចធ្វើឱ្យមានផ្ទុះអំពើហិង្សានយោបាយ ជាក់ជាពុំខាន។ ហេតុដូច្នេះហើយទើបបានជាគេឃើញមាន ពង្រាយ ប៉ូលិសជាងពីរពាន់នាក់ការពារជាស្រេចនៅមុខតុលាការ តាំងពីព្រលឹមមក។

ក្រុមប្រឆាំងនឹងរដ្ឋាភិបាលថៃ ប្រមូលផ្តុំគ្នានៅមុខតុលាការធម្មនុញ្ញ ថ្ងៃទី១៣កក្កដា ២០១២

©Reuters

សម្រាប់គ្រប់អ្នកវិភាគ និងអ្នកឯកទេសនយោបាយថៃ ប្រសិនបើតុលាការធម្មនុញ្ញសម្រេចដូច្នេះមែន នោះពិតជាមានប្រតិកម្មសន្ធោសន្ធៅមិនខានពីសំណាក់ពួកអាវក្រហម ដែលបានប្រកាសព្រមានតាំងពីម្សិលមិញ ប្រើកម្លាំងតុលាការប្រជាជនតបវិញ។ សូមបញ្ជាក់ថា តុលាការធម្មនុញ្ញធ្លាប់បានសម្រេច ពីរដង រំលាយនិងហាមឃាត់សកម្មជនបក្សជាង២០០នាក់ នៃគណបក្សដើមរបស់ភឿថៃ មិនឱ្យធ្វើនយោបាយ៥ឆ្នាំ រហូតទាល់តែគណបក្សប្រជាធិបតេយ្យបានឡើងកាន់អំណាច។ ដូច្នេះបើត្រូវដើរជាន់ស្នាមចាស់ទៀតមែន វាពិតដូចយកសាំងទៅដាក់លើភ្លើងជាមិនខាន ! នេះបើតាមអ្នកឯកនយោបាយនៅមហាវិទ្យាល័យជូឡាឡុងកន ក្រុងបាងកក។

ប៉ុន្តែជាសំណាងល្អ តុលាការធម្មនុញ្ញបានសម្រេចច្រានចោលបណ្តឹងរបស់គណបក្សប្រជាធិបតេយ្យ នៅរសៀលនេះ៕