ជប៉ុន-ចិន -

អត្ថបទចុះផ្សាយនៅថ្ងៃ អាទិត្យ 19 សីហា 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 19 សីហា 2012

ជប៉ុនផ្គើនចិននៅប្រជុំកោះសេនកាគូ

អ្នកជាតិនិយមជប៉ុន ដោតទង់ជាតិនៅលើកូនកោះ Uotsuri នៃប្រជុំកោះសេនកាគូ

REUTERS/Kyodo

ដោយ អៀង សុខម៉ិញ

នៅព្រហាមថ្ងៃអាទិត្យទី ១៩ សីហា ឆ្នាំ២០១២នេះ សកម្មជនជាតិនិយមជប៉ុន ជាងដប់នាក់បានចូលជាន់ដែនកោះ ទាវយូ (បើហៅតាមភាសាចិន) ឬសេនកាគូ ឈ្មោះជាភាសាជប៉ុន។ ប្រជុំកោះនេះ ដែលស្ថិតនៅក្នុងសមុទ្ទចិនខាងកើត កំពុងតែក្លាយទៅជាចំណីនៃជម្លោះដណ្តើមទឹកដីរវាងប៉េកាំងនិងតូក្យូ ក្រោមក្រសែភ្នែកព្រួយបារម្ភរបស់អន្តរជាតិ។
សកម្មជាតិនិយមជប៉ុននាំគ្នាទៅកោះសេនកាគូ បានជំរុញភ្លាមឱ្យមានប្រតិកម្មពីខាងភាគីចិនវិញ បាតុកម្មប្រឆាំងជប៉ុនជាច្រើនបានរៀបចំឡើង ក្នុងក្រុងយ៉ាងហោចណាស់៦ នៅទូទាំងប្រទេសចិន មានជាអាទិ៍ក្រុង ស្ហេនហ្សេន មិនឆ្ងាយប៉ុន្មានពីហុងកុង។

សេចក្តីរាយការណ៍របស់ អៀង សុខម៉ិញ

ស្តាប់ (02:15)

19/08/2012

អ្នកសង្កេតការណ៍អន្តរជាតិ ដែលស្ថិតនៅទីក្រុងតូក្យូ កំពុងតាមដានស្ថានការណ៍ឡើងកម្តៅបណ្តាលមកពីជម្លោះដណ្តើមដែនដី រវាងចិននិងជប៉ុន ដោយកៀកកិត និងព្រួយបារម្ភបំផុត។ ក្រៅពីបាតុកម្មប្រឆាំងជប៉ុន នៅតាមក្រុងធំៗរបស់ចិន តៃវ៉ាន់ ដែលមានទីតាំងភូមិសាស្ត្រប្រមាណតែ២០០គីឡូម៉ែត្រពីប្រជុំកោះមានជម្លោះ ក៏បានសម្តែងការមិនពេញចិត្ត ដោយបានកោះហៅតំណាងការទូតជប៉ុនប្រចាំក្រុងតៃប៉ិចូលជួបភ្លាមនៅព្រឹកថ្ងៃអាទិត្យនេះ ថាតៃវ៉ាន់មិនពេញចិត្តនឹងទង្វើរបស់ក្រុមសកម្មជនជប៉ុនឡើយ។

ដ្បិតនៅថ្ងៃអាទិត្យនេះ សកម្មជនជាតិនិយមជប៉ុនជាងដប់នាក់ ក្នុងនោះម្នាក់ជាសមាជិកសភាក្រុងតូក្យូផង បានហែលឆ្លង និងឡើងជាន់ដីប្រជុំកោះសេនកាគូ ដើម្បីដោតទង់ជាតិជប៉ុន ជាច្រើនឱ្យបក់រវិចៗ ក្នុងអត្ថន័យបញ្ជាក់ជាថ្មីថា ដែនកោះនេះជារបស់ជប៉ុនដោយមិនអាចប្រកែកបាន។

កាលពីថ្ងៃពុធ សកម្មជនជាតិនិយមចិន ១៤នាក់ បានដោតទង់ជាតិចិនដែរលើប្រជុំដដែលនេះ មុននឹងត្រូវក្រុមឆ្មាំសមុទ្ទជប៉ុនចាប់ខ្លួន បន្ទាប់មកបណ្តេញចេញពីជប៉ុន ទៅកាន់ហុងកុង។

ថ្ងៃនេះក្រុមឆ្មាំសមុទ្ទជប៉ុន កំពុងផ្ចង់ការងារតាមដានសកម្មភាពរបស់ក្រុមអ្នកជាតិនិយមជប៉ុនម្តង។ សកម្មជនជាតិនិយមជប៉ុន ដែលបានធ្វើដំណើរទៅដល់ប្រជុំកោះសេនកាគូតាំងពីព្រលឹមអុល មានគ្នាសរុបដល់ទៅជាង១៥០នាក់ ជិះកប៉ាលប្រមាណជាង២០គ្រឿង។ ប៉ុន្តែមានតែជាង១០នាក់ប៉ុណ្ណោះបានឡើងលើកោះ។ ប្រធានសមាគមជាតិនិយមជប៉ុន Gambari Nippon បានលោតពីកប៉ាល់ ចុះទឹក ហែលសំដៅដីកោះ ជាមួយនឹងសម្រែកជ័យឃោស “ជប៉ុនទៅមុខ”។

រដ្ឋាភិបាលជប៉ុនធ្លាប់បានហាមឃាត់មុនមក មិនឱ្យក្រុមសកម្មជនជាតិនិយមទាំងអស់នៅ ចុះជាន់ដែនដីប្រជុំកោះជាប់ជម្លោះជាមួយចិនទេ ព្រោះមិនចង់បង្ហាញសាច់ដុំដាក់ចិន ដែលងាយនឹងអាចរាលដាលបានគ្រប់ពេលវេលាទៅជាការប្រឈមមុខយោធា។

ចំណែកសហរដ្ឋអាមេរិក ដែលអាចចាត់ទុកថាសម្ព័ន្ធមិត្តរបស់ជប៉ុនម្នាក់ដ៏សំខាន់នោះ អាមេរិកបដិសេធមិនគាំទ្រជប៉ុនក្នុងជម្លោះដែនដីដ៏សាំញ៉ាំនេះទេ។ អាមេរិកទទួលស្គាល់ថា ប្រជុំកោះសេនកាគូ ពិតជាស្ថិតក្រោមរដ្ឋបាលជប៉ុន ប៉ុន្តែអាមេរិករក្សាសិទ្ធិមិននិយាយថាប្រជុំកោះនោះជាបូរណភាពដែនដីជប៉ុនទេ៕