ស៊ីរី-អ.ស.ប. -

អត្ថបទចុះផ្សាយនៅថ្ងៃ សុក្រ 03 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 03 សីហា 2012

សេចក្តីសម្រេចចិត្តនៃមហាសន្និបាតអ.ស.ប.ក្រោយពីការលាឈប់ដោយលោកកូហ្វីអាណាន

លោក Kofi Annan បេសកជនពិសេសនៃអ.ស.ប.

REUTERS/Valentin Flauraud

ដោយ សៀក សារិន

មហាសន្និបាតនៃអ.ស.ប.ត្រូវបោះឆ្នោតគាំទ្រនៅថ្ងៃសុក្រទី៣សីហានេះ សេចក្តីសម្រេចចិត្តដែលស្នើដោយក្រុមប្រទេសអារ៉ាប់ ដែលបានបរិហារពីការទម្លាក់គ្រាប់បែកដោយទាហានរដ្ឋាភិបាលស៊ីរីទៅលើទីក្រុងបះបោរ ហើយទាមទារឲ្យមាននយោបាយអន្តរកាលមួយសម្រាប់ដោះស្រាយវិបត្តិនយោបាយនៅក្នុងប្រទេសស៊ីរី។

សេចក្តីរាយការណ៍របស់សៀក សារិន

ស្តាប់ (02:36)

03/08/2012 by សៀក សារិន

គំនិតផ្តួចផ្តើមរបស់ក្រុមប្រទេសអារ៉ាប់នេះគឺពិតជាមានតម្លៃជានិមិត្តរូបតែប៉ុណ្ណោះ ដោយហេតុថាមហាសន្និបាតមានសិទ្ធិត្រឹមតែឲ្យអនុសាសន៍ ដែលខុសផ្ទុយពីក្រុមប្រឹក្សាសន្តិសុខដែលអាចចេញសេចក្តីសម្រេចចិត្តដាក់ទណ្ឌកម្ម។ ក៏ប៉ុន្តែ យ៉ាងហោចណាស់ក៏សេចក្តីសម្រេចចិត្តមហាសន្និបាតនៃអ.ស.ប. បានបង្កើនសម្ពាធដាក់ទៅលើទីក្រុងដាម៉ាសដែរ បើប្រសិនជាសមាជិក១៩៣ប្រទេសនាំគ្នាបោះឆ្នោតគាំទ្រអត្ថបទយ៉ាងច្រើនលើសលុប ដោយប្រទេសរុស្ស៊ីនិងប្រទេសចិនគ្មានលទ្ធភាពប្រើសិទ្ធិវេតូរបស់ខ្លួននៅក្នុងមហាសន្និបាត។ គួរបញ្ជាក់ថា សេចក្តីសម្រេចចិត្តមហាសន្និបាតនៃអ.ស.ប.កាលពីលើកមុននៅថ្ងៃទី១៦កុម្ភៈកន្លងទៅ ទទួលបានការគាំទ្រ១៣៧សំឡេង។

ខុសពីសេចក្តីសម្រេចចិត្តលើកមុន គម្រោងសេចក្តីសម្រេចចិត្តលើកនេះ ពុំបានទាមទារដោយចំៗ ឲ្យប្រធានាធិបតីបាស្ហារអាស-អាស្សាដចាកចេញពីមុខតំណែង ឬឲ្យដាក់ទណ្ឌកម្មសេដ្ឋកិច្ចទៅលើទីក្រុងដាម៉ាស ដូចការទាមទាររបស់ក្រុមប្រទេសសម្ព័ន្ធអារ៉ាប់កាលពីខែវិច្ឆិកាឆ្នាំ២០១១ឡើយ។

អត្ថបទនៃសេចក្តីសម្រេចចិត្តរបស់ក្រុមប្រទេសអារ៉ាប់បានគូសបញ្ជាក់ឲ្យដឹងពីក្តីបារម្ភរបស់គេ ពាក់ព័ន្ធនឹងអាវុធគីមីរបស់បាស្ហារអាល-អាស្សាដ ដោយធ្វើការទាមទារកុំឲ្យទីក្រុងដាម៉ាសប្រើអាវុធគីមីនេះ ព្រមទាំងឲ្យយកទៅស្តុកទុកនៅទីកន្លែងប្រកបដោយសន្តិសុខគ្រប់គ្រាន់។ ហើយក្រុមប្រទេសអារ៉ាប់ក៏បានទាមទារផងទៀត ឲ្យរដ្ឋាភិបាលស៊ីរីយល់ព្រមឲ្យអង្គការមនុស្សធម៌អាចចូលជួបប្រជាជនដោយងាយស្រួល។

ចំណែកឯប្រទេសបារាំងដែលជាប្រធាននៃក្រុមប្រឹក្សានៅខែសីហានេះ បានផ្តល់ការគាំទ្រយ៉ាងមុតមាំដល់គំនិតផ្តួចផ្តើមរបស់ក្រុមប្រទេសអារ៉ាប់។ នេះបើយោងតាមរដ្ឋមន្ត្រីក្រសួងការបរទេសបារាំង លោកឡូរ៉ង់ហ្វាប៊ីយូស។

គម្រោងសេចក្តីសម្រេចចិត្តរបស់មហាសន្និបាតនៃអ.ស.ប.ដែលតាក់តែងដោយប្រទេសអារ៉ាប៊ីសាអ៊ូឌីតនិងប្រទេសអារ៉ាប់ដទៃទៀត បានសម្តែងឲ្យឃើញនូវការសោកស្តាយរបស់ពួកគេនៅចំពោះមុខ “អសមត្ថភាពរបស់ក្រុមប្រឹក្សាសន្តិសុខនៃអ.ស.ប.ក្នុងការអនុវត្តន៍សេចក្តីសម្រេចចិត្តរបស់ខ្លួន”។ ហើយក្រុមប្រទេសអារ៉ាប់បានបរិហារពីការប្រើកាំភ្លើងធំ និងការបាញ់ទម្លាក់គ្រាប់បែកទាំងងងឹតងងុលដោយរថក្រោះនិងទាហានបាស្ហារអាល-អាស្សាដទៅលើប្រជាជននិងទៅលើទីក្រុងបះបោរ។ ពួកគេបានប្រកាសទាមទារឲ្យទីក្រុងដាម៉ាសគោរពពាក្យសន្យារបស់ខ្លួនដោយត្រូវយកទាហាននិងកាំភ្លើងធំទៅដាក់ទុកក្នុងបន្ទាយ។

សេចក្តីសម្រេចចិត្តរបស់មហាសន្និបាតនៃអ.ស.ប.បានទាមទារផងទៀត ចាត់តាំងឲ្យមានឡើងនូវ “ស្ថាប័នបណ្តោះអាសន្នមួយតំណាងរដ្ឋាភិបាលរួបរួមជាតិ” ដែលទាំងនេះអាចមានន័យថា បាស្ហារអាល-អាស្សាដត្រូវចាកចេញពីមុខតំណែង ហើយគេត្រូវរៀបចំឲ្យមានការបោះឆ្នោតសេរីមួយនៅក្នុងប្រទេសស៊ីរី៕