ស៊ីរី -

អត្ថបទចុះផ្សាយនៅថ្ងៃ ពុធ 29 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 29 សីហា 2012

ភាពចម្រូងចម្រាសនៅក្នុងរង្វង់អ្នកប្រឆាំងបាស្ហារអាល-អាស្សាដ

លោកស្រី Bassama Kodmani អ្នកទទួលខុសត្រូវខាងទំនាក់ទំនងក្រៅប្រទេសនៃក្រុមប្រឹក្សាជាតិស៊ីរី CNS

AFP/Andrei Smirnov

ដោយ សៀក សារិន

ការប្រយុទ្ធប្រហារគ្នានៅតែកើតមាននៅក្នុងប្រទេសស៊ីរី រវាងកងកម្លាំងយោធានិងយុទ្ធជនប្រឆាំងបាស្ហារអាល-អាស្សាដ ជាពិសេសនៅទីក្រុងអាឡេពនិងនៅទីក្រុងដាម៉ាស។ ចំណែកឯការចរចានៅក្នុងរង្វង់អ្នកប្រឆាំងបាស្ហារអាល-អាស្សាដ ដើម្បីរៀបចំខ្លួនសម្រាប់កសាងស្ថាបនាប្រទេសស៊ីរី ក្រោយសម័យអាស្សាដនៅតែជួបនឹងភាពចម្រូងចម្រាស។

សេចក្តីរាយការណ៍របស់សៀក សារិន

ស្តាប់ (02:13)

29/08/2012 by សៀក សារិន

ការចរចានៅក្នុងរង្វង់អ្នកប្រឆាំងបាស្ហារអាល-អាស្សាដ និងការរៀបចំត្រៀមលក្ខណៈដើម្បីជួយកសាងស្ថាបនាប្រទេសស៊ីរីមួយថ្មី ក្រោយសម័យគ្រប់គ្រងផ្តាច់ការរបស់អាល-អាស្សាដ នៅតែស្គាល់ភាពរកាំរកូស។ ជាក់ស្តែង នៅថ្ងៃអង្គារទី២៨សីហាម្សិលមិញ អ្នកទទួលខុសត្រូវខាងទំនាក់ទំនងក្រៅប្រទេសនៃក្រុមប្រឹក្សាជាតិស៊ីរី CNS លោកស្រី Bassama Kodmani បានប្រកាសលាលែងចេញពីមុខតំណែង។

នៅឯសមរភូមិឯណោះវិញ ទង្វើភេរវកម្មបំផ្ទុះរថយន្តបានផ្តាច់ជិវិតមនុស្សអស់២៧នាក់នៅតំបន់ចារ៉ាម៉ាណា ដែលមានអ្នកកាន់គ្រឹស្តសាសនាភាគច្រើនរស់នៅ។

សូមបញ្ជាក់ថា ការខ្វែងគំនិតគ្នានៅក្នុងវិស័យនយោបាយនៅតែកើតមាននៅក្នុងរង្វង់អ្នកប្រឆាំងស៊ីរី ដោយហេតុតែពួកគេមានចរន្តនយោបាយខុសៗគ្នា ទោះបីជាពួកគេសុទ្ធតែទាមទារចង់បានលទ្ធិប្រជាធិបតេយ្យក៏ដោយ។

ការលាឈប់ពីមុខតំណែងដោយលោកស្រី Bassama Kodmani

លោកស្រី Bassama Kodmani អ្នកទទួលខុសត្រូវខាងទំនាក់ទំនងក្រៅប្រទេសនៃក្រុមប្រឹក្សាជាតិស៊ីរី CNS បានប្រកាសលាឈប់ពីមុខតំណែង ដោយបានថ្លែងប្រាប់ទីភ្នាក់ងារ AFP ថា “លោកស្រីសោកស្តាយណាស់ដែល ក្រុមប្រឹក្សាជាតិស៊ីរី CNS ពុំចេះរក្សានិងធ្វើឲ្យប្រជាជនស៊ីរីមានទំនុកចិត្តកក់ក្តៅដូចនៅពេលបង្កបង្កើត ក្រុមប្រឹក្សាជាតិស៊ីរី CNS”។

គួរកត់សម្គាល់ថា ចរន្តខ្លាំងនៃក្រុមប្រឆាំងទល់នឹងរបបគ្រប់គ្រងផ្តាច់ការបាស្ហារអាល-អាស្សាដពោលគឺ ក្រុមប្រឹក្សាជាតិស៊ីរី CNS ច្រើនមានជំនោរទោរទៅរក ការក្តោបក្តាប់អំណាច។ ទាំងនេះជាមូលហេតុនាំឲ្យចលនាប្រឆាំងដទៃទៀត មានដូចជា CNCD Comité National de Coordiantion pour le Changement Démocratique ឬគណៈកម្មាធិការជាតិសម្របសម្រួលដើម្បីការវិវឌ្ឍន៍ប្រជាធិបតេយ្យ ចេញសម្ដែងការប្រឆាំងរបស់ខ្លួន។

ស្ថានភាពទាំងនេះ បានបណ្តាលឲ្យគណបក្សនយោបាយស៊ីរីម្ភៃប្លាយទៀតបាននាំគ្នាថ្លែងប្រឆាំងទល់នឹង របបគ្រប់គ្រងផ្តាច់ការបាស្ហារអាល-អាស្សាដ និងយោធា ហើយពួកគេបានថ្លែងឲ្យដឹងនៅថ្ងៃអង្គារម្សិលមិញថា ពួកគេនឹងរៀបចំឲ្យមានសន្និសីទមួយនៅទីក្រុងដាម៉ាស នៅថ្ងៃទី១២កញ្ញាឆ្នាំ២០១២ខាងមុខនេះ ដើម្បីរៀបចំឲ្យមាននូវរបបគ្រប់គ្រងប្រទេសស៊ីរីមួយដែលមានលក្ខណៈប្រជាធិបតេយ្យ ហើយពុំប្រើអាវុធយុទ្ធភ័ណ្ឌយកមកគ្រប់គ្រងប្រទេសជាតិ៕