ស៊ីរី -

អត្ថបទចុះផ្សាយនៅថ្ងៃ អង្គារ 07 សីហា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 07 សីហា 2012

ការផ្តាច់ខ្លួនដោយនាយករដ្ឋមន្ត្រីគឺជាជំហានឈានទៅរកការដួលរលំនៃរបបគ្រប់គ្រងអាល-អាស្សាដ

ទិដ្ឋភាពនៃសង្គ្រាមដ៏សោកសង្រេងនៅទីក្រុងអាឡេពនៅថ្ងៃទី៦សីហាឆ្នាំ២០១២

REUTERS/Shaam News Network

ដោយ សៀក សារិន

សម្រាប់សហរដ្ឋអាមេរិក ប្រមុខដឹកនាំផ្តាច់ការ បាស្ហារអាល-អាស្សាដបានបាត់បង់ការក្តោបក្តាប់របស់ខ្លួនទៅលើប្រទេសស៊ីរី។ ដោយហេតុថា នៅថ្ងៃចន្ទទី៦សីហាម្សិលមិញ មានមេដឹកនាំសំខាន់ៗជាច្រើននៃរបបគ្រប់គ្រងស៊ីរីបច្ចុប្បន្នបានរត់ចោលរដ្ឋាភិបាលហើយទៅចុះចូលជាមួយក្រុមបដិវត្តន៍ ដែលក្នុងនោះមានជាអាទិ៍ លោកនាយករដ្ឋមន្ត្រី Riad Hijab ដែលបានភៀសខ្លួនទៅប្រទេសហ្សកដានី។ លោកនាយករដ្ឋមន្ត្រីស៊ីរីបានបរិហារថា “របបគ្រប់គ្រងផ្តាច់ការបាស្ហារអាល-អាស្សាដបានប្រព្រឹត្តឧក្រិដ្ឋកម្មសង្គ្រាមនិងអំពើប្រល័យពូជសាសន៍”។

សេចក្តីរាយការណ៍របស់សៀក សារិន

ស្តាប់ (02:59)

07/08/2012 by សៀក សារិន

ថ្ងៃចន្ទទី៦សីហាឆ្នាំ២០១២គឺពិតជាថ្ងៃដ៏សែនចង្រៃសម្រាប់“របបគ្រប់គ្រងផ្តាច់ការស៊ីរីបាស្ហារអាល-អាស្សាដ” ហើយក៏ជាការសម្ដែងឲ្យឃើញថា របបគ្រប់គ្រងរបស់បាស្ហារអាល-អាស្សាដកំពុងឈានទៅរកការដួលរលំរលាយ។ ដោយហេតុថានៅថ្ងៃចន្ទម្សិលមិញ លោកនាយករដ្ឋមន្ត្រី Riad Hijab ដែលបានរត់ភៀសខ្លួនទៅប្រទេសហ្សកដានី បានថ្លែងបរិហារថា “របបគ្រប់គ្រងផ្តាច់ការបាស្ហារអាល-អាស្សាដបានប្រព្រឹត្តឧក្រិដ្ឋកម្មសង្គ្រាមនិងអំពើប្រល័យពូជសាសន៍ មូលហេតុនេះហើយដែលនាំឲ្យលោករត់មកចុះចូលរួបរួមជាមួយក្រុមបដិវត្តន៍ដើម្បីការពារសេរីភាព និងការពារសេចក្តីថ្លៃថ្នូរជូនប្រជាជនស៊ីរី”។ នៅថ្ងៃចន្ទម្សិលមិញនេះដដែល មជ្ឈមណ្ឌលទូរទស្សន៍និងវិទ្យុរដ្ឋស៊ីរី ដែលឋិតនៅកណ្តាលទីក្រុងដាម៉ាសបានទទួលរងការវាយប្រហារមួយយ៉ាងហិង្សា។

នៅឯសមរភូមិនៃទីក្រុងអាឡេពវិញ ទាហានរបស់បាស្ហារអាល-អាស្សាដនៅតែបន្តធ្វើការវាយលុកយ៉ាងខ្លាំងក្លា ដែលបានបណ្តាលឲ្យអ្នកសង្កេតការណ៍របស់អ.ស.ប.បានដកខ្លួនចេញពីទីក្រុងអាឡេពនៅពេលថ្មីៗនេះ។ ប្រមុខបេសកកម្ម លោកឧត្តមសេនីយ៍ Babacar Gaye បានប្រកាសអំពាវនាវឲ្យយុទ្ធជនទាំងអស់ចេះគោរពការពារជនស៊ីវិល និងចេះគោរពច្បាប់មនុស្សធម៌។

គួរបញ្ជាក់ថា របបគ្រប់គ្រងផ្តាច់ការបាស្ហារអាល-អាស្សាដពឹងផ្អែកទៅលើប្រព័ន្ធយោធានិងសន្តិសុខស៊ីរី គណបក្សបាអាស ហើយនិងទៅលើសហគមន៍ alouite។

ការរត់ចុះចូលជាមួយក្រុមបដិវត្តន៍ដោយ លោកនាយករដ្ឋមន្ត្រី Riad Hijab បានបង្ហាញឲ្យឃើញថា ចាប់តាំងពីមានការងើបបះបោរនៅក្នុងប្រទេសស៊ីរីនៅខែមីនាឆ្នាំ២០១១មក គណបក្សបាអាសដែលមានសមាជិកប្រមាណ២លាន៥សែននាក់ បានស្គាល់ការធ្លាក់ស្រុតបាត់បង់យ៉ាងច្រើន។ ការបាត់បង់លោកនាយករដ្ឋមន្ត្រី Riad Hijab ដែលជាសមាជិកម្នាក់ដ៏ចំណាននៃគណបក្សបាអាសគឺពិតជាធ្វើឲ្យរបបគ្រប់គ្រងរបស់បាស្ហារអាល-អាស្សាដបាត់បង់នូវធម្មានុរូបភាពនៅក្នុងគណបក្សបាអាស ហើយនិងសម្រាប់សហគមន៍អ្នកកាន់សាសសនាអ៊ីស្លាមនិកាយស៊ុន្នីតដែលជាសហគមន៍ដ៏សំខាន់នៅក្នុងប្រទេសស៊ីរី។ ដោយហេតុថា លោកនាយករដ្ឋមន្ត្រី Riad Hijab ជាអ្នកកាន់សាសសនាអ៊ីស្លាមនិកាយស៊ុន្នីតម្នាក់ដ៏សំខាន់ថ្លៃថ្លា។

សសរទ្រូងមួយទៀតសម្រាប់របបគ្រប់គ្រងរបស់បាស្ហារអាល-អាស្សាដគឺយោធា។ កងកម្លាំងយោធាស៊ីរីដែលគេឃើញមានការរត់ចោលជួរកាន់តែច្រើនឡើងៗ។ មកទល់ពេលនេះ គេឃើញមានមេទាហានជាន់ខ្ពស់ជាច្រើនរយនាក់និងទាហានជាច្រើនពាន់នាក់បាននាំគ្នារត់ចូលរួបរួមជាមួយក្រុមបដិវត្តន៍ប្រឆាំងនឹងរបបគ្រប់គ្រងរបស់បាស្ហារអាល-អាស្សាដ។

ហើយនៅសល់សសរទ្រូងចុងក្រោយដែលគាំទ្របាស្ហារអាល-អាស្សាដគឺសហគមន៍ alouite ។ សមាជិកនៃសហគមន៍ alouite ដែលនៅរក្សាភក្តីភាពរួបរួមគ្នាជុំវិញប្រធានាធិបតីបាស្ហារអាល-អាស្សាដ ដែលចេញពី សហគមន៍ alouite ដូចគ្នា។
ក៏ប៉ុន្តែ បើប្រធានាធិបតីបាស្ហារអាល-អាស្សាដនៅតែពុំអាចស្រោចស្រង់របបគ្រប់គ្រងរបស់ខ្លួន ហើយនៅចំពោះមុខការដំឡើងបង្ហាញអានុភាពរបស់សហគមន៍ស៊ុន្នីត សហគមន៍ alouite ក៏អាចធ្វើការប្តូរប្រែឥរិយាបថរបស់ខ្លួនផងដែរ៕